O LE TALA I LE TAMA O ALO

Alo maia, o le toe faaauauina mai lenei o le tatou polokalame o tala i Vavau o Samoa, le tala i le tama'ita'i tagivale o Meto ma le ali'i o Alo.

Ona fai atu loa lea o Meto ia Alo, “ua lelei, ou te le toe tuuina atu lava oe e te alu sei vagana ua e faia le mea lea ou te manao i ai.” Sa fesili ia Alo pe o le a le mea o loo ia manao i ai, sa tali mai Meto, “Ou te fia nofo i se fale e Lau i ‘Ula, pou i le Toa, ‘aso i le U’unu, afa i le a’a o le Aoa, ae paepae i le Lei fanau o Faasavalu i Falelatai.’

Ua maea ona faailoa e Meto ia Alo lona fanoga, ona toe foi loa lea o le tama i lona  tina ma faamatala i ai le mea ua manao i ai Meto, peitai sa faailoa atu i ai e lona tina, e leai se faigata, peitai, e tatau ona alu ma ia e moe i le vaega tonu lea o loo manao Meto e faatu ai lona fale. Ua ioe i ai Alo, ona alu ese loa lea ae ua valaau e le tamaitai o Sinalefatumoa Imoa uma lava o le vao, ma faailoa i ai le manaoga o Meto.

Ua sauni le fauina o le fale o Meto, ona fai lea o Sinalefatumoa i lana tama o Alo, ina ia alu e moe i totonu o le Ana o Meto, o le mea tonu e faatu ai le fale, ma ia aua lava nei tilotilo i luga pe ala foi i le taimi e fau ai le fale, ae tau lava o lona taoto ma moe, ona alu loa lea o le tama ua faatino uma faatonuga e pei ona tuuina atu.

Fai mai ao moe Alo, sa agai ane loa isumu poo imoa uma o le vao ua amata ona fau le fale i le po atoa. Ua oo ina tafa mai ata ae o loo faia pea le galuega, peitai, ua oo ane lagona ia Alo, ua fia vaai lava i le galuega o loo faia, ma, ua avea lona fia vaai i le galuega ma itu ua galo ai ia te ia le faatonuga sa tuuina atu e lona tina.

Sa faafuasei loa ona nofo i luga Alo i lona fia vaai, peitai, sa faafuasei ona laga isumu poo imoa sa faia le galuega, ae tuu ai loa le fauina o le fale o Meto ua le maea seia oo mai lava i ona aso nei. O iina la lea e maua mai ai nisi o upu o loo tele ina faaaogaina e faleupolu i upega lauga e faapea, “O le Fale Nai Amoa e lau i ‘ula ae pou i le toa...” O le tamaitai foi lenei o Meto o loo faaigoaina, “O le Tamaitai mai Amoa o Meto Tagivale.

Soifua.