TAUVAGA TUSI ATA AOGA MAUALULUGA

Ua fa’ailoa mai, ua fa’aofi mai nei e le tatou Faipule i le konekeresi, Aumua Amata se avanoa lelei mo fanau a’oga i a’oga maualuluga i le teritori e tauva ai i le Tusiga Ata e fa’atautaia e le Konekeresi. O se Sailiga o Tagata Atisi.

O le tausaga lenei ua atoa i ai le lona 33 o tauvaga fa’aletausaga fa’apenei, ma o se avanoa e mafai ai ona tusia ata e le fanau a’oga.

O le ata o le a manumalo mai lenei tauvaga, o le a fa’atautauina pea lana ata i le Maota o le Malo i le laumua i Uosinitone mo le tausaga atoa e tasi, ma e agava’a fo’i o ia i ni avanoa fa’asikolasipi mai le Savannah College of Arts & Design.

E ese mai lea, o le sui fo’i e manumalo lana ata, e aumaia lona pasese e malaga fa’apitoa atu ai i Uosigitone DC mo le aiga fa’apitoa e fa’atautaia e taua’ao ane ai ia te ia ona ia fa’ailoga ua agava’a ai.

O lau ata mo lea tusiga ata, e tatau ona tusia lava e oe mo lea tauvaga, e 28-inisi i le 28-inisi le tele e aofia ai ma le fa’ava’a. O se avanoa matagofie lenei mo tatou fanau i a’oga maualuluga, ia fa’aulu lau ata e tusia i vali suau’u, po’o vali vai po’o isi ituaiga o vali lea e masani ai tagata atisi.

Ua fa’ailoa mai e Aumua Amata, “Ou te fiafia ma ou mimita e fa’alauiloa galuega ua tusia e tatou fanau i le laumua nei, o se ala fo’i e fa’ao’o atu ai se fa’amalo i fanau i le latou taleni ma le naunau e fa’aleleia atili o latou tomai fa’a-atisi.”

O le a fa’atulaga lava e le a’oga latou le aso e faia ai se latou tauvaga tusi ata mo lea fa’amoemoe, ae tatau ona fa’ao’o atu le lima ata ua mae’a pasia mai le teritori a’o le’i o’o ia Aperila 13-17, 2015.

TAUVAGA TAUSALA LALELEI AMERIKA SAMOA USA

Ua toe fa’alauiloa mai ua taliaina e le Miss Amerika Samoa United States Organization[MASUSO] ni talosaga a alo tama’ita’i o Samoa i Amerika Samoa e fia tauva i lenei tausaga e avea ma Tausala Lalelei e suia Amerika Samoa i le tauvaga a Tausala o le Iunaite Setete o Amerika e tauva ai i le Tausala a le Lalolagi atoa.

Ua fa’atulagaina lenei tauvaga tausala MASUSO ia Iuni 28 se’ia o’o ia July 5, 2015, ma e fa’atatuaia lea i Uosigitone DC. E faia ai fo’i i lena lava a’ai le tauvaga a le Miss United States Organization, lea e faatautaia i le aso Iulai 2 se’ia o’o ia Iulai 8, 2015 fo’i.

O le tausala sa manumalo i lea lava tauvaga i le tausaga ua te’a, o le tama’ita’i lalelei o Meagan Moana Palelei, ma ua mae’a fo’i ona asiasi solo o ia i atunu’u ma nofoaga sa fa’auia atu ai nisi o tausala sa latou tauva fa’atasi, e aofia ai Samoa, lea sa ia asia ai le Fa’aao o le Malo o Samoa, TuiAtua Tupua Tamasese Tupuola Efi, ia Novema 2014, ae o lana malaga ta’amilo lava lea sa o’o atu ai lana asiasiga i Niu Sila i le Kerisimasi i lena fo’i itu o lo’o sapaia malosi mai lenei fa’amoemoe.

Ua fa’atulaga le matutua o sui tauva mai le 17 tausaga se’ia o’o i le 25 tausaga le matua, ma e tatau lava ona fanau i Amerika Samoa po’o lona tupu’aga fo’i mai Amerika Samoa. Ua talia fo’i nisi o alo o le atunu’u o lo’o alaala tumau i so’o se setete e 50 o le Iunaite Setete ma ona teritori i le pasefika e aofia ai Guam, DC ma Amerika Samoa. O lea vala o le agava’a, e mafai ona so’otaga lelei ma le aiaiga o le Miss United States Organization ma le Miss World America.

Mo fesili faafesootai i le imeli: director.missAmSamoaUS@gmail.com