AMATA LE POLOKALAMA 13 ASO O LE KERISIMASI

O le afiafi o le aso Faraile na sei mavae atu nei na faasalalauina sa’o mai ai e le 2AP, le Siufofoga o Samoa, le polokalama o pesepesega o le Kerisimasi a le Ekalesia Faapotopotoga Kerisiano i Samoa i Vaitele-uta, o le 13 Aso o le Kerisimasi .

E pei ona silafia, o se tasi lenei o polokalama o le Kerisimasi e tulimataia e le toatele o le atunuu i tausaga taitasi i faasalalauga a le 2AP faapea le TV1, talu ona faavaeina 1990 e le susuga i le Faafeagaiga ua faiilagi le folauga, le susuga Faitala Talapusi, sosoo ai ma le susuga ia Fomai Lafaialii, ua faiilagi foi le folauga. O le tausaga nei la lea ua faaauau e le susuga i le faafeagaiga taulagi o le EFKS i Vaitele-uta, le susuga Muao Su’a ma le faletua ia Tauvela.

O se faaopopoga fou o le polokalama i lenei tausaga, o le a maimoa ma faafofoga ai le atunuu i pesepesega a se aulotu a le ekalesia mai fafo, e pei ona lautogia ai le Ekalesia Faapotopotoga Kerisiano i Samoa mai Suva i Fiti, e pepese i le aso 21 o Tesema. O le ekalesia EFKS i Suva i Fiti o lo o galulue ai le susuga i le faafeagaiga ia Afa Afato ma le faletua ia Iutita. O sui o lenei aulotu e aofia ai nisi o le mamalu o le atunuu o lo o alala ai i Fiti ona o galuega ma aoga e pei o alo ma fanau o le atunuu o lo o aotauina i le Iunivesete o le Pasefika i Saute, le USP i Fiti. O le susuga i le faafeagaiga ia Muao Su’a sa aotauina foi i le USP i Fiti i tausaga ua tuanai lea sa faauu mai ai ma le faailoga tikeri faasaienisi o le BSc.

PEPESI PEA LE CHIKUNGUNYA

E tusa ai ma le lipoti aupito i lata mai mai le Matagaluega o le Soifua Maloloina i le tulaga ua i ai le pepesi o le faamai o le Chinkungunya, na faaalia ai e faapea, ua maitauina i le 19 vaiaso talu ai le aafia o tagata e to’a 3,135 po o le 1.7% o le faitau aofai o le atunuu i lenei faamai e feaveai e namu. Mai lea fuainumera, e to’a 1692 tamaitai, ae 1443 alii ua aafia. O ia faamaumauga a le matagaluega na maua mai tagata ua aafia o lo o saili togafiti atu i maota gasegase eseese i totonu o le atunuu.

E leai ni maliu ua faamauina ona o lea faamai. Na faaalia i faamaumauga, le faatupulaia o vaega eseese o le atunuu e le gata i Upolu neoi ae faapea foi Savaii, ua maua ai tagata ua aafia i lea faamai. O lo o aupito i toatele i latou e i le va o le 20 ma le 24 tausaga le matutua o lo o aafia. O lo o faaauau pea taumafaiga a le Matagaluega o le Soifua Maloloina ina ia tau taofiofi ai le pepesi o lea faamai ma o lo o fautuaina le mamalu o le atunuu ina ia faatamaia nofoaga e toa ai le suavai ma tautuufua ai namu, laei i laei e pupuni ai le tino ma ia faaaoga tainamu ma mea tulinamu pe a tofafa. 

FALEPUIPUI I LE GAOI O MEA AOGA

E lua tausaga lea ua faafalepuipui ai nei e le Faamasinoga Maualuga le alii o Junior Seumanutafa, o se alii sa faigaluega i le Matagaluega o Aoga, Taaloga ma Aganuu ina ua faamaonia ona moliaga o le gaoi ao avea ma tagata faigaluega. E 17 moliaga na molia ai lea alii ma ua faasala ai nei i le toese i Tafaigata. O le ua molia faatasi ai ma ni sui sinia se toalua faapea ai se tasi sa avea ma ofisa sili lagolago o le matagaluega, lea o lo o talia le taimi e tutulai ai i luma o le Faamasinoga. O lo o teena e i latou ia o latou moliaga.

O nei moliaga e mafua mai i le toesea ai o ni mea totino a le matagaluega mai lona ofisa autu i Malifa e aofia ai pusa api, pusa peni, computer feaveai po o laptops ma isi mea totino e faaaoga i aoaoga a le fanau. Na faaalia i faamaumauga a leoleo e faapea, o nei solitulafono sa faatinoina i le va o le masina o Novema 2012 ma le masina o Aperila 2014.

Saunia: Lilomaiava Andrew Fa’asau, Naenae Productions