Vaega: 9

Fa’atalofa atu ma fa’afeiloa’i atu i le mamalu o le atunu’u ae maise o i latou o lo’o fiafia pea e faitau i a tatou tala fa’asolo i lea aso ma lea aso. E i ai pea le fa’amoemoe o lo’o manuia tutusa pea i tatou uma, i le tausiga alofa a lo tatou Matai oi le lagi. E ao ai ona o tatou fa’apea ifo, “Le Ali’i e, ia E alofa ma fo’ai mai le filemu i o matou loto i lenei aso, ina ia mafai ai ona o matou maua le agaga o le alofa atu i o matou uso a tagata, a’o le vi’iga ma le fa’afetai e fo’i atu lava i Lau Afio e fa’avavau, fa’avavau lava, Amene.”

Ua tomumu le lo’omatua, ae ua ‘ata’ata le toeaina ma tilotilo mai i tua i le umu i si ona atali’i lea o lo’o feagai nei ma le tausiga o la’ua i mea uma e fai. Ua alu lava le tomumu a le lo’omatua, ae na o le nofo lava o le toeaina ma fa’alogologo i ai. Na ona o’o lava o le tomumu a le lo’omatua i isi mataupu fa’alupelupeina, oso loa ma le toeaina ua le toe taofi, ona ua fa’alogo atu nei ua ‘ese le mea lea ua talanoa ane ai le lo’omatua.

“Seka, Seka, tu’u la’ia o lau tomumu, fa’alogo mai oe, o sau ia Samuelu e fai se mea’ai ta te a’ai ai, o sau Samuelu e fafaga pua’a ma sui povi ma fafaga moa, o fai e Samuelu. Va’ai la oe i lou leo leaga le na e leaga ai aiga, e le fealofani ai le ta fanau. O le mea tonu lava lea e tupu nei, tu’u la’ia o au tala i o’u tu atu i luga sasa lou ulu i le ‘ali. Tu’u la’ia, ua tiga o’u taliga, a pologa Petelo e fai mea uma o le aiga, ae na o le sala sala, i a Samuelu, ae e nofo ma fai na fa’amatalaga le lelei, tu’u la’ia, ua pei oe o se matuamoa ua to’ulu fulufulu. Ua tiga lava o’u taliga e fa’alogo atu i tala na e te faia, e te le tautala mai i mea e lelei aiga, ae na o tala e te au mai i ma o.”

Ua nofo sasa’e a’e nei i luga le lo’omatua sa ta’oto’oto i lea taimi ma tauvala’au i a Samuelu, “Elu, Elu, o fea ea oe, Elu, sau ua lava le na galuega ua alu ifo le pogisa.”

O le taimi tonu lea, o lo’o fai le ti’eti’ega a Samuelu i luga o le pasi, e alu aga’i i Tula. O le nu’u lea o lo’o Faifeau ai le uso o lona tama e igoa i a Sila ma lona Faletua o Su’e. Ua fiu le lo’omatua e tau vala’au, ae leai se tasi na tali mai, na toe liliu nei ma tilotilo ane i le toeaina, ua le mautonu lona loto po’o fea ua alu i ai Samuelu.

E fetaui lava le liliu ane o le lo’omatua, ae palasi loa ma le fa’alifu talo ma le moa Samoa sa fa’asupo, o lea sa galue ai le la tama ulumatua o Petelo. Na tau tonu lava i le pogaisu o le lo’omatua le sasala o le koko Samoa i lea taimi, ae salani e le manogi o le supo moa. “E, si a’u tama e, o Kelo, e fai fa’alifu manogi, e sefulu niu e a’e ai e le e’eva, si a’u tama e fai mea lelei, e tausi matua, fa’afetai Kelo, ua malie lo’u loto i lau tausiga.”

Ua le tautala le toeaina o Paulo, ae ua na o le tilotilo ane i lona to’alua ma fa’apea ona mafaufauga, “Leaga lava le lo’omatua e palu vai tele, ae e le o ni vai e tau feololo mai, o le matua’i malolosi lava o vai a le lo’omatua lenei. O lea fa’atoa uma lava ona tomumu mai nei e uiga i si o’u atali’i o Petelo, a’o lea, na o le tau lava o le manogi o le supo moa Samoa i poga isu, pei o le a noa le toe tautala. Pei e sili ai pe a ave i Aferika, se i fai i ai su’esu’ega a foma’i, pe i ai se uaua o le fai’ai ua tau pe.”

E faia pea…