MATHEW FUIAVA

Ua tu’uaia nei e le malo se ali’i i le moliaga mama o le fa’atupu vevesi i totonu o lona aiga, ona o le fa’alavelave lea na tula’i mai i le fa’aiuga o le vaiaso, ina ua ia ‘ona ma faia ni gaioiga e ono save’u ai le nonofo filemu o aiga.

I fa’amaumauga a le fa’amasinoga o lo o taua ai e fa’apea, o le ali’i o Mathew Fuiava na taofia mai i le fa’aiuga o le vaiaso, ina ua talosagaina e lona aiga se fesoasoani a leoleo, e mafua mai i gaioiga e faia e lenei ali’i.

Na aga’i atu leoleo i le po o le aso Faraile na te’a nei ina ua talosagaina e le aiga o le ua molia se fesoasoani, e taunu’u atu leoleo o lo o taofi mai e le tama o le ua molia lona atali’i ma taumafai e fa’afilemu o ia.

Na taunuu leoleo ma taumafai loa e taitai le ua molia i le ta’avale, i le mae’a ai o talanoaga sa faia ma ni isi o le aiga e tusa ai o le mea sa tupu.

A o taitai atu e leoleo le ua molia i le ta’avale, sa palauvale le ua molia i leoleo ma fai i ai, o ia e le fefe i soo se mea, ma ia folafola lona fasiotiina o le isi ali’i leoleo e ala i lona fai i ai, pe na te iloa o ia sa tautua i Iraq e le fefe lava fo’i i se mea.

Na tuu e leoleo le ua molia i totonu o le ta’avale a leoleo ma latou aga’i atu loa i le ofisa, peita’i na taumafai le ua molia e fa’aaoga lona ulu e tu’i ai le tioata o le ta’avale, ae ina ua taumafai atu se ali’i leoleo e taofi o ia, sa folafola i ai e le ua molia lona fasiotiina o le ali’i leoleo lea.

Ua tolopo le iloiloga o lenei mataupu e toe fofogaina i le vaiaso fou.

MOLIA SE ALI’I FA’AO’OLIMA I LONA TO’ALUA

O le ali’i lea na taofia mai e leoleo i le fa’aiuga o le vaiaso mai Iliili ona o tu’uaiga i lona fa’ao’olima i lona to’alua, ua molia nei o ia i le moliaga o le fa’atupu vevesi i totonu o lona aiga, ae o lo o fa’aauau suesuega a leoleo pe ono i ai ni isi moliaga e fa’aopoopo e mafai ona faila fa’asaga ia te ia.

O le vevesi na tula’i mai ina ua sulu le fafine i se aiga tuai mo se fesoasoani, ina ua mae’a ona fa’ao’olima i ai le ua molia. Na fa’ailoa e le fafine i leoleo le faia e le ua molia o folafolaga tau fa’amata’u ia te ia ma lana fanau.

O lo o taofia pea i le toese le ua molia e fa’atali ai le aso Tofi lea ua fa’atulaga e toe fofogaina ai lana mataupu.

NOFOVAAVAAIA LE ALI’I I LE FA’AO’OLIMA

E 12 masina lea ua nofovaavaaia se ali’i e 35 tausaga le matua o Tafuna, ina ua ta’usala o ia i le moliaga mamafa o le fa’ao’olima i le tulaga tolu, ona o le fa’alavelave lea na ia fa’ao’olima ai i se isi ali’i sa latou inupia fa’atasi.

Na fa’atoese le ali’i o Victor Apelu i le fa’amasinoga fa’aitumalo i le vaiaso na te’a nei e tusa ai o lana solitulafono sa faia, ma ia talosagaina ai se isi avanoa se tasi mo ia. Sa ia fa’atoese fo’i i lana uo sa a’afia ona o lana gaioiga sa faia.

O le vevesi na tula’i mai ina ua ova le ‘onana o Apelu ma le ali’i na a’afia, ma fa’ai’u ai loa i le fa’ao’olima o le ua molia i lana uo e ala i lona tu’i o ia ma pau ai i lalo, ae ina ua taumafai ni isi e fa’ato’a filemu le vevesi i lena aso, sa atili ai ona pisapisao le ua molia ma lafo solo upu mataga, ma fa’afeso’ota’i ai loa e ni isi sa i ai leoleo mo se fesoasoani.

Na fa’ailoa e le ali’i fa’amasino ia John L. Ward II i le ali’i ua molia, e ui o le ‘ava malosi o se fualaau oona e fa’ataga ona fa’atau ma fa’aaoga e tagata, peita’i o le mea moni e matua tele le a’afiaga o le mafaufau o le tagata na te tagofia le ‘ava malosi.

O ni isi o tuutuuga o le nofova’ava’aia a Apelu e aofia ai le fa’asa ona ia toe tagofia le ava malosi, auai i aoaoga e fesoasoani ai i le ita, ma ia alu fo’i e fa’atoese i lana uo na ia fa’ao’olima i ai.