Foa’i DOC mo “A.P. Lutali Elementary”

“Ona o le fanoga o le afioga le Kovana Sili Lolo Matalasi Moliga sa amatalia ai lenei tausaga a’oga ua savalia, ia tofusia matagaluega o le malo ma le a’oga latou te sapaia ma galulue maumaua’i i ai e fa’aleleleia, o lea ua fa’aauau ai lenei galuega lelei e le Matagaluega o Fefa’ataua’iga [DOC].” O se saunoaga amata lea a le ali’i sui fa’atonu Willie Le’auanae i le aso ananafi i lumafale o le Ofisa o A’oga i Utulei.

O le foa’i na taua’aoina fa’apitoa mo le a’oga tulaga lua A.P. Lutali Elementary i Aunu’u e aofia ai le moavao toso, le moa vao manoa, le uilipaelo, o salu vao u’amea e lua, o salu vae una e lua, o le apefa’i, o le tane penisini o moavao ma mata tioata e fa’aaogaina e le tagata moavao.

“O mea nei, sa talosaga mai le a’oga e mo’omia lava e le ali’i teufanua ma falea’oga ona fa’aaoga i le tele o taimi, ae paga lea e le o i ai se tinoitupe e mafai ona fa’atau ai e le pulega o le a’oga  nei mea faigaluega.” O se tala lea sa fa’ailoa ane e le ali’i fa’atonu lagolago.

I le amataga o lenei tausaga a’oga, sa malaga uma sui o le DOC i Aunu’u ina ia fa’atino le latou tulaga sapaia o le a’oga ua latou loto e fesoasoani i ai. Ina ia fa’atumauina pea le lelei o galuega na latou amata fa’aleleia, na latou fa’ailoa i le pulega ma le aufaigaluega i le aoga “A.P. Lutali” ina ia fa’ailoa mai ia i latou i so’o se taimi mea e mo’omia, e fa’aauala atu ai fo’i le latou fesoasoani.

“Ou te fiafia, ona o lo’o mataala mai le pulega o le tatou aoga i Aunu’u, sa latou vala’au mai, ma fa’ailoa mai lea lisi, o mea faigaluega ina ia fesoasoani atu ai le matagaluega, o lea ua fa’ataunu’u, ae ao fo’i ona fa’alauiloa, ina ne’i fa’apea e na’o na lisia, ae le’i fa’atinoina lenei foa’i, ina ia mautu lava fa’amaumauga o nei mea uma!” O se isi lea toe saunoaga a Le’auanae.

O le tali mai a le ofisa o A’oga, le tama’ita’i fa’atonu Vaitinasa Dr. Salu Hunkin-Finau sa ia fa’ailoa atu ai lo latou agaga fa’afetai. “O le fa’afetai e fa’aleo atu” i le DOC  “aua e ui lava ina ua mae’a fa’atino galuega i le amataga o le tausaga a’oga, ae o lea ua fa’aauau mai lava le tapenaga mae’ae’a e o’o mai i le taimi nei. Ou te iloa e matua aoga tele lenei foa’i, ma e le taugofie fo’i meafaigaluega ua pa’au i ai outou, ona o le manatu, ia lelei lotoa ma falea’oga mo le fanau.”

I le aoauli ananafi e to’afa lava sui o lea matagaluega sa masi’i atu mo le auina atu o meafaigaluega mo le a’oga i le Ofisa autu o le DOE e fa’atino ai lea foa’i taua.

Vala’au Fa’apitoa - Aufai Siea ‘Rainmaker’

Ona o le afaina o le Ofisa tuai o le Faletupe o Atina’e o Amerika Samoa, lea e tauavea siea o le Malo i le American Samoa Development Corporation, o lea ua fa’alauiloa mai ai, mo i latou uma o lo’o ai i le Aufai Siea, e taua’aoina uma mai a latou pepa fa’amaonia o nei siea i le Ofisa o le Faletupe o Atina’e a’o le’i mae’a le tausaga 2013.  O le ofisa o lo’o i le Lumana’i building i Fagatogo, i le fogafale lua.

O le to’atele o nei aufai Siea ua maliliu, ae ailoga o iloa e nisi o latou fanau ma aiga o lo’o soifua mai, o latou tua’a o lo’o i ai siea i le faletalimalo.

E ese mai lea fa’asalalauga, sa mua’i fa’asalalauina fo’i le taofia o tagata lautele ua o ane i lea faletalimalo, ma latou ‘avea nisi o mea totino o lo’o i ai, ma ua mautinoa lava, o se mea e le tatau ona faia lena tulaga.