PASEFIKA

FAATULAGAINA SE KOMITI E TAOFIA LE AVEA O PEPE FANANAU I AMERIKA I MATUA MAI ATUNU’U I FAFO, MA SITISENI

faaliliu; Lali Staff

I se ripoti a le RNZ Pasefika (Radio New Zealand), ua fa’ailoa ai le taula’i mai o su’esu’ega a le Malo Tele o Amerika, i ana teritori i le Pasefika, a’o taumafai ai le laumua i Uasigitone, e tu’ufa’atasia ia se komiti, e latou te fa’asaga tau i le avea o pepe fananau i totonu o Amerika, i matua mai i atunu’u i fafo, ma sitiseni o le Iunaite Setete.

Aemaise lava teritori, e pei o Guam ma le atu Mariana.

E pei ona fa’ailoa mai e le Matagaluega a le Iunaite Setete, o le a tilotilo ia lea komiti, i le toe fa’afo’i ese mai i totonu o Amerika, ia i latou, o lo’o malaga atu i le Iunaite Setete, ina ia fananau ai a latou pepe, po o le taumafai, e tapuni le avanoa e mafai ai ona o latou ulufale atu.

Ua fa’ailoa mai foi, le silia ma le 600 visa, ua te’ena, mo tagatanu’u mai fafo, i le lalolagi atoa.

Ua faapea foi ona tulimata’i e Ripapilikana, ia visa faapitoa, lea o lo’o faatagaina ai tagatanu’u mai Saina, ona ulufale mai i teritori.

Ma o lea lava mataupu e tasi, sa iloiloina e le Maota Fono a Amerika Samoa, ona o le maualuga o le fuainumera o tagata mai atunu’u i fafo – aemaise tagata Asia – ua ulufale mai i totonu o le teritori.

Peitai, o tagatanu’u mai Samoa, o lo’o matele i lea tulaga, o le faimalaga mai i Amerika Samoa, e fananau ai a latou pepe ina ia maua le tulaga o le Nesionale a Amerika, ona toe fo’i lea o le tina ma le pepe i Samoa.

Ua faapea ona soalaupuleina e sui faitulafono lotoifale, ia ni fofo mo lenei mataupu, e pei o le le agava’a o se pepe fou, i le avea ma Nesionale o le Iunaite Setete, pe afai o nit agata mai atunu’u i fafo, ia ona matua.  Ae o le a filifili pe avea le pepe fou ma tagatanu’u o lona tama, po o lona tina.

E tusa ai ma se ripoti mai i le vaega fa’asalalau, a le Reuters, i lenei masina, sa sainia e le Peresetene o Amerika, i se vaitaimi lata mai, ia ni fa’atonuga aloaia se lua, i se taumafaiga fou, e lu’itau ai le faaiuga a le Faamasinoga Sili, lea sa te’enaina lana faaiuga, e fa’amalosia ai lenei tulafono fou, i pepe fou ua fananau, ma o le a fananau, i totonu o le Iunaite Setete.

TUTU FA’ATASI MOTU O LE PASEFIKA E FOFO LU’ITAU I GALUEGA FA’AVAITAIMI

O lo’o aofia potopoto, i le motu o Vanuatu, i lenei vaiaso, ia sui ma totino mai Iuni o Fefaatauaiga ma Tagata Faigaluega, mai motu o le Pasefika, mo le soalaupuleina ma le sailiga o ni fofo, i lu’itau, o lo’o feagai ma tagata faigaluega fa’avaitaimi, ona o polokalama fou ua faamalosia i Niu Sila ma Ausetalia.

O le PICTU (Pacific Islands Council of Trade Union) lea o lo’o ta’ita’ia lenei fa’atasiga ma o lo’o faamoemoega, o le sailiga o auala e mafai ona fa’amalosia ai ia tomai o i latou, ua gafa ma le fa’atulagaina o Iuni mo Fefaatauaiga i motu o le Pasefika, aua tagata faigaluega fa’avaitaimi, o lo’o galulue i le polokalama o le PALM Scheme, a Ausetalia.

E le gata i lea, o le atina’eina o pa’aga, i mataupu e mafai ona fa’aleleia ai le faatulagaga o galuega faavaitaimi, i totonu o le Pasefika.

Ma le fa’atulagaina o ni tulafono e mafai ona fa’aleleia atili ai polokalama, e fesoasoani i tagata faigaluega faavaitaimi pe a toe fo’i mai i aiga ma atunu’u, i lalo o le lagolago a le Iuni.

O le susuga ia Seveaoga Saina Tomi Fetalaiga, se tasi o sui Faatonu o le PICTU, na avea ma sui o Samoa, i lea fonotaga, ma o ia foi o le Faatonusili, o le ulua’i Iuni, i totonu o Samoa.

E to’atele nisi o tagata faigaluega sa auai i lenei fonotaga, ma o se ulua’i taimi lenei, ua mafai ona o latou auai atu ai.  Sa maua ni avanoa e latou te fa’asoa ai, e tusa ai ma lo latou iai i totonu o galuega fa’avaitaimi, o lu’itau faapea faigata, sa feagai ma i latou.

O nisi o i latou, o le a toe fo’i atu, i galuega faavaitaimi i Ausetalia ma sa mafai ona maua so latou avanoa, e talosagaina ai le PICTU ma le sui o le Iuni o Tagata Faigaluega a Ausetalia, ia Latileta Gaga, mo se fesoasoani, e tusa ai ma nei fa’afitauli, o lo’o tutupu mai pea, i totonu o a latou galuega.

O nisi o mataupu, ua masani ona tupu i tagata Pasefika, o lo’o galulue i galuega faavaitaimi, o nisi o faafitauli, ua mae’a ona fofoina, ae o lo’o iai lava nisi faafitauli, o lea ua fa’ato’a faafofoga ai sui o Iuni.

O se tasi o nei fa’afitauli, o le taimi faatulagaina, e fa’amalu ai tagata faigaluega.  Mo se faataitaiga, o nisi o tamaitai po o tina, sa o latou fa’amaonia, i le fonotaga, ia le na’o le ta’i ono (6) minute, e tu’u atu, e latou te fa’amalu ai.  

O taimi ua tuanai, sa na’o le ta’i tolu (3) minute, ae ina ua o latou fa’asea i a latou pule, sa toe fa’aopoopo ai leisi tolu (3) minute.

Na fa’ate’ia ia Latileta Gaga, i lea ripoti.

O seisi faafitauli, o sauaga mataga, o lo’o feagai ma tamaitai po o tina, i le galuega.  Sa iai se mataupu fou, na ripotia, ma ua tapunia ai lea kamupani.  Peitai, sa toe fa’atu e i latou na pulea le kamupani muamua, ia seisi foi kamupani, i lalo o se igoa fou, ma o lo’o latou toe taumafai e saili mai ni a latou tagata faigaluega, mai i motu o le Pasefika.

E tusa ai ma se manatu fa’aalia a Latileta, sa tatau ona molia ia nei tagata, i le tulafono.