Ads by Google Ads by Google

Tala I Vaifanua


O se vaaiga i le taeao o le aso Lulu i le masaga 4 o teine i latou: Maureen, Mariya, Melisha ma Miracle. [ata: Leua Aiono Frost]

Pago Pago, AMERIKA SAMOA - 

 

FA’AAUAU FOA’I  A LE P.I.D MO LE MASAGA FA

 

O le taeao o le aso Lulu na toe oo atu ai sui o le Kamupani loto alofa, Pacific International Distributors (PID), na latou ofoina i le masaga 4 a Filomena ma Sokimi Sokimi le sapalai o Diapers ma Wipes mo le ulua’i tausaga o le latou soifua.

 

O lea foa’i e taua’aoina fa’apitoa i le atoa ai o le ta’i lua masina le matutua o le masaga tamaitai lalelei e to’afa.

 

I le matou oo atu i le aiga o lenei masaga sa saunia i latou e lo latou tina ina ia talia fo’i le foa’i mai le Kamupani loto alofa i le tausiga fa’apitoa o i latou, e ala i le foa’ia o nei oloa lelei tele mo le tausiga o pepe fa’apitoa, mo le tausaga atoa mo Maureen, Manya, Melisha ma Miracle Soakimi.

 

I lenei foa’i lona lua ua fa’atinoina e le PID ua matauina ai ua malolosi lelei i latou nei. Ua atoa fo’i le latou ta’i fa masina le matutua, ma o lo ua lava ma totoe fo’i le foa’i na faia i le lua masina talu ai mo le tausiga lelei o i latou se’ia oo mai i lenei fo’i foa’i.

 

Ua atoa le 12 pauna le mamafa o Maureen le ulumatua, o le tamaitai na lona lua o Mariya ua 10 pauna lona mamafa, o le tamaitai lona tolu o Melisha ua 12pauna fo’i o ia, ma le uii o Miracle ua atoa le 11 pauna lona mamafa.

 

Peitai, a tuu mai fa’atasi i latou uma nei, ua iloga mai, e matua foliga tutusa lava i latou, e leai ma so latou eseesega se’i vagana ai lo latou mamafa.

 

Na fesiligia le tina poo mafai ona ia matauina lana fanau, pe afai o le a tuuina mai ia te ia. O lana tali, “O Maureen e i ai lona ila i lona vae, o le lona tolu e i ai lona ila la’ititi i luga a’e o Filomena Sokimi le foai taua a le Pacific International Distributors Inc. Fa’afetai le agalelei, o se foa’i sili ona taua ua ma’ua maua mo le tausiga o le fanau.”

 

O i la’ua nei ua la’ua fanaua le ulua’i masaga fa i totonu o Amerika Samoa, Filomena ma Sokimi Sokimi o Iliili ma Fagaima.

 

LAINA UUMI SUIA I FALEIE E FA’AGASOLO AI TAGATA E TALA SIAKI

 

O le lona tolu o aso talu ona taumafai tagata lautele e talaina a latou siaki stimulus, ae va’aia loa ua suia mai laina tetele ma le u’umi o tutu ai le to’atele i fafo o faletupe i le saofafa’i lelei ma fa’asolo mai i lalo o fale’ie. O le aso lona tolu fo’i ua amata mai le taeao ua fa’atimutimu ma aupouli, ma ua faia ai le fa’aiuga ina ia fa’atutuina fale’ie nei.

 

O se faiga lenei sa tatau lava ona amata mai ai le auaunaga peita’i e pei lava so’o se taumafaiga e tautuaina ai le mamalu lautele, e i ai fa’aletonu e amata mai o le tautua ae ua aoaoina lelei ai le tapenaga mo le lumana’i.

 

Ua fa’ailoa fo’i e Iulogologo Pereira o le Ofisa o le Kovana, “E ui lava ina fa’atulaga le fesoasoani mai le vasega o Leoleo ina ia fa’atautaia ai le fa’amoemoe ma fa’amalosia lava le fa’asa, ae le mafai ai le atunuu i o latou manaoga e tala loa lava latou siaki.”

 

“Ua fa’aaoga foi le falemeli e tufaina atu ai siaki, ona o se fuafuaga ua tau faigofie ai lea fa’amoemoe, peita’i e le tu’ua ai lava le uumi o laina mai le taeao po e le’i taitai ona malamalama, ona o le naunau lava o le atunuu ia maua latou tupe. O nei siaki e tolu masina e aoga ai, ae leai lava se fa’atali a le atunuu, ua manatu ia talaina loa.”

 

“O le to’atele o i latou ua e va’aia atu lava lo latou naunau ia tala latou siaki, ma ua le manatu lava se’i fa’atali teisi se’ia oo i le isi aso fa’ato’a fa’aaogaina ai lea fa’amanuiaga. O lo ua i ai foi leoleo i nofoaga uma sa fa’atula’ia ai nei laina uumi, ia mautinoa o lo’o fa’atumauina pea le filemu aua ua tatou iloa lelei, o taimi e tumutumu ai nofoaga mo tautua lautele, e masani lava ona tutupu ai fevesiaiga. Peita[‘ e le’i i ai lava se faaletonu na tupu i nofoaga uma nei i le tolu aso ua mavae nei o laina uumi e faasolo i le falemeli ma ua fa’apea fo’i i faletupe Fagatogo, Utulei ma Tafuna.”

 

I nei fo’i faleie ua fa’atula’ia e faletupe ina ia sasao ai le atunuu a’o tatalia le auaunaga, sa tufatufaina ai fagu vai mo le mamalu o le atunuu e le faletupe a le ANZ ma faleie fo’i  ua fa’atutuina e le TBAS, ma na foa’ia mai lea auaunaga e le Cost U Less. 

 

O nisi o le vasega o e na tatalia siaki stimulus ia talaina, sa latou fa’ailoa mai, “Afai e manaomia ona faia se suiga lelei i le tufatufaina o nei siaki e le Matagaluega o le Tupe, e tatau ona muamua fa’atulaga se taimi tatau lava e tufa muamua siaki mo tagata matutua i le latou lava nofoaga autu, pe fa’aaoga fo’i le fa’atulagaga o mata’itusi o fa’aiu e fa’asolo ai le lisi o i latou e o atu e talia latou siaki.”