Ads by Google Ads by Google

Amata maua siaki Stimulus i pusameli I le aso Toona’i

Fa’ailoa mai e le Teutupe a le Malo, Ueligitone Tonumaipe’a, o le aso toona’i nei e amata ai ona maua siaki o le Stimulus i pusameli mo i latou e agava’a i lea fa’amanuia mai le malo tele. 

 

Ua fa’atulaga o siaki nei o le Stimulus o le a fa’aoo atu i le falemeli i le aso Faraile ae maua i le pusameli i le aso Toonai. O le aotelega o siaki stimulus fa’atulaga lea mo i latou ua mae’a faila latou lafoga mo le tausaga 2019 e oo ia Me 13, 2020 e tusa ma le $23.7 miliona. 

 

O le isi vaega o le a fa’ailoa mulimuli atu lona taimi e toe saunia o le vaega e le’i maua le avanoa e faila ai latou lafoga mo lenei tausaga, ae sa faila mo le tausaga 2018. O lo ua i ai lava le fa’amoemoe e toe maua lava le masina o Me e toe fa’auia atu ai Stimulus a nei sui uma ua aofia i lea vaega o le tautua.

 

O so’o se tasi e le maua a latou siaki ae ua mae’a faila latou lafoga o le 2019, ia oo ane e fesiligia le Ofia o Lafoga pe a fai ae mae’a lea vaiaso e le’i maua lava latou siaki stimulus. Peita’i o i latou e le’i faila lafoga o le 2019, e tatalia le vaega lua o le tufatufaga, a leai foi sau siaki, ia fa’afesiligia le Ofisa o Lafoga pe a le maua fo’i sau siaki. Peita’i, o lea e le’i oo i le vaega lua o le tufatufaga.

 

Afai sa le maua lava sau pusameli e lafo atu i ai lau siaki stimulus e mafai ona e oo ane i le fa’amalama o le Ofia o le Disbursing i le Ofisa o le Malo i Utulei poo le telefoni ane i le 633-4155 i le aso Lua, Me 26, 2020.

 

O loo aofia fa’atasi ma lau siaki ni tusi se lua, o le tusi muamua o lo’o ua fa’auia mai le Peresetene o le Iunaite Setete o Amerika, Donald Trump, ua fa’ailoa mai ai lou umia o lau siaki Stimulus poo le EIP ma le isi tusi mai le Ofisa o Tupe a le Malo o Amerika Samoa e fa’ailoa mai e na’o le tasi lava le taimi e te mauaina ai lenei siaki, afai ae toe maua e oe se isi siaki o le Stimulus, ua fa’ailoa atu ai foi ia te oe le mea e ao ina e faia i lena siaki.

 

Mo i latou uma e maua penefiti o le Saogalemu, ae oo mai lava i le taimi nei e le’i maua latou siaki Stimulus, e mafai ona oo ane i le Ofisa o Lafoga mo le fesoasoani a le Ofisa o Lafoga ia te oe, ae ia e malaga ane ma tala’aga atoa o au penefiti fa’aletausaga ua e maua mai le Saogalemu. 

 

O le aso Toonai lava fo’i lea e tasi, Me 23 o le a maua ai le Vaega 10 o lafoga a tagata ua mae’a faila o le 2019 i le va o Fepuari 12 se’ia pa’ia Mati 05, 2020. O le aofaiga o nei siaki e $1.9 milion