Ua faamalieina le finagalo o le Fa’amasinoga Maualuga i mau faamaonia na folasia e le malo e lagolago ai tu’uaiga faasaga i le alii pagota o Sierra Isaia, i lona le usitaia lea o se poloaiga sa tuuina atu e le Faamasinoga Maualuga ia te ia i le tausaga na te’a nei, i le faia lea o se suega i lona tino e faamaonia ai na te le o tagofia fualaau faasaina.

O le aso 26 o Iuni lea ua faatulaga e faia ai le isi iloiloga o lenei mataupu, ma tuuina atu ai loa se faaiuga a le Faamasinoga Maualuga faasaga ia Isaia.

O le vaiaso na te’a nei na tulai ai Isaia i luma o le afioga i le Faamasino Sili ia Michael Kruse, mo le tuuina atu o lana tali tete’e e tusa ai o le tu’uaiga faasaga ia te ia, i lona musu lea e faia se suega i lona tino e iloa ai poo ia faaaoga fualaau faasaina.

Ina ua valaau le mataupu a Isaia, na talosaga le loia a le malo ia Laura Garvey ina ia tolopo le iloiloga i se isi aso, ona o le alii Leoleo o le Toese lea o loo avea ma molimau autu i lenei mataupu, o lo o poloka o ia i Samoa i le taimi na tapunia ai femalagaaiga i le va o Samoa e lua talu mai puipuiga i le fa’ama’i o le COVID-19.

Na teena e Kruse le talosaga e tolopo ai le iloiloga, na valaau ai loa e le malo le latou molimau muamua, o se sui lea o le Ofisa Nofovaavaaia, le susuga a Saipale Vaouli.

Na taua e le susuga a Vaouli i lana molimau e fa’apea, i le aso 4 o Mati, 2020, na la o ai ma le isi sui o le Ofisa Nofovaavaaia, susuga a Tafito Aitaoto e fai suega a nisi o pagota o loo tuli a latou faasalaga faa falepuipui i le Toese i Tafuna, ina ia faamalieina ai le poloaiga a le Fa’amasinoga sa tuuina atu i le taimi na tuuina atu ai a latou faasalaga faanofovaavaaia, i le faia lea o ni suega e faamaonia ai latou te le o tagofia fualaau fa’asaina.

Na taunu’u sui e to’alua o le Ofisa Nofovaavaaia ma tuuina atu loa le la lisi o pagota e fia faia suega i le Leoleo Satini sa tiute i le Toese i Tafuna i le taimi lea. Sa aofia ai ma le igoa o Isaia i le lisi o pagota na manaomia le faia o suega.

E na o Isaia lava le pagota e le i mafai ona alu ane e faatino lana suega, ae na tali ane uma isi pagota ma faailoa ai i a latou suega lo latou nofo mama mai le toe faaaogaina o fualaau faasaina poo le ‘ava malosi.

Na faailoa ane e le Leoleo i sui e to’alua o le Ofisa Nofovaavaaia, ua le mafai ona alu ane Isaia e fai lana suega ona o loo oso le gugu i lona vae, ma ua le mafai ai ona savali.

O le taimi lea na talosaga ai loa sui o le Ofisa Nofovaavaaia i le Leoleo Satini o le Toese i Tafuna, mo se faatanaga la te aga’i atu ai i totonu o le Sela o loo loka ai Isaia mo le faia o lana suega. Na talia lea talosaga ma aga’i atu loa sui o le Ofisa Nofovaavaaia i le vaega o lo o loka ai Isaia mo le faatinoina o le suega.

Peitai e le i mafai ona ulufale sui a le Ofisa Nofovaavaaia i le Sela a Isaia, ona na taofi i laua e se alii pagota sa tu tu ai i luma o le faitoto’a.

Ina ua fesili le Faamasinoga poo ai le igoa o le alii pagota, na tali Vaouli, “O Gabriel”. O le alii pagota ia Gabriel Tinai o loo tuli sona faasalaga i le gaoi ma le talepe fale, faaopoopo atu ai fo’i ma isi faasalaga o le sola i tua mai le Toese ao taofia ai o ia.

Na taua e Vaouli i lana molimau e fa’apea, ina ua la taunuu atu ma lana paga i luma o le faitoto’a, na faatonu i laua e Gabriel e faatali atu ae sei alu e siaki poo le a se tala a Isaia e fai ane ia te ia. Na loka e Gabriel le filifili e loka ai le Sela a Isaia, ona savali lea i totonu. E le i leva ae taunuu ane fo’i ma le alii Leoleo o le Toese ma faatonu loa Gabriel e tatala le filifili o lo o loka ai le faitoto’a o le Sela.

E le i leva ona alu le alii Leoleo i totonu ae toe fo’i mai ma faailoa i sui e to’alua o le Ofisa Nofovaavaaia, e le mafai ona savali Isaia i lona vae o loo faaletonu.

Na taua e le molimau le le mautonu o la mafaufau i le taimi lea, ona o lea o loo la molimauina ni isi o pagota o loo feofeoa’i solo i le nofoaga lea, ae o loo la popole foi i lo la saogalemu. Na faia le faaiuga o le a la toe solomuli ese mai, ma la tuua ai loa le nofoaga lea, e pei ona taua e le susuga a Vaouli i lana molimau.

Na taua atili e le molimau e fa’apea, o le poloaiga a le Faamasinoga na tuuina atu i le taimi na lau ai le faasalaga a Isaia, e tatau ona malie e faia se suega i lona tino i soo se taimi e faatonu ai o ia e se sui o le Ofisa Nofovaavaaia poo se Leoleo foi a le malo.

Na tapena le la ripoti ma tuuina atu loa i luma o le Fa’amasinoga e tusa ai o lenei mataupou.

Na fesili le loia a Isaia i le molimau, pe sa i ai ni mau e faamaonia ai sa faatonu e Isaia le alii pagota ia Gabriel e alu e loka le filifili o le faitoto’a o le Sela. Na tali le molimau, e leai. Na toe fesili fo’i le loia a Isaia i le molimau, pe sa i ai se taimi o lea aso na la vaaia ai Isaia o fealua’i solo i totonu o le lotoa a le Toese. Na tali le molimau, e leai.

O le molimau lona lua na valaau e le malo, o le tamaitai Satini ia Sgt. Mokiana Yandall mai le Toese i Tafuna.

Na faamaonia e Sgt. Yandall le molimau a Vaouli i le taimi na taunuu ai ma tuuina atu le lisi o pagota e fia faia i ai le suega, atoa ai ma le le mafai e Isaia ona alu ane i le suega ona sa faaletonu lona aao i le gasegase o le gugu.

Na fesili le Loia a l e malo ia Sgt. Yandall, pe faataga ona tago se pagota i le ki o soo se Sela i totonu o le Toese, na tali le molimau, “E leai, e le mafai ona tago se pagota i soo se ki o soo se Sela, e leai fo’i se mafua’aga e ala ai ona tu tu le pagota i le faitoto’a o le Sela a le isi pagota.

Na talosaga le ali’i Loia Fautua ia McNeill i le Fa’amasinoga Maualuga, e leai se mea laa nofosala ai fua Isaia i lenei mataupu. E le gata e leai sana faatonuga na tuuina atu i se pagota e loka ai le filifili o le faitoto’a e aga’i atu i lona Sela, ae na mafua fo’i ona le auai ane o ia i le suega ona sa faaletonu lona aao.

Na finau le loia a le malo ina ia talia le latou talosaga, ma faasala Isaia i lona le usitaia o le poloaiga a le Faamasinoga e faia ai se suega i lona tino e iloa ai poo ia tagofia fualaau fa’asaina.

Saunoa le afioga i le Faamasino Sili, ua manino mau sa folasia e le malo, ua le usitaia e Isaia le poloaiga a le Fa’amasinoga e faataga ai ona faia se suega i lona tino poo ia tagofia le ‘ava malosi.

E 80 masina lea o lo o tuli e Isaia i le Toese i Tafuna, tusa lea e 6 tausaga, ina ua ta’usala o ia i moliaga mamafa e 2 o lona umia faasolitulafono lea o vaega o fualaau fa’asaina o le aisa.

O le moliaga muamua na tula’i mai i le aso 26 o Aokuso 2017 ina ua maua e Leoleo fualaau faasaina ia Isaia ina ua taofia lana ta’avale. Na tatala Isaia i tua e faatali ai le faaiuga o lana mataupu.

Lima masina mulimuli ane ai, na toe loka ai fo’i e Leoleo ia Isaia ina ua taofia lana ta’avale i le aso 11 o Tesema 2017 ae maua ai fo’i fualaau faasaina.

E 20 masina lea ua faasala ai Isaia mo le mataupu muamua na tula’i mai ia Aokuso, ae 5 tausaga lea ua faasala ai o ia i le mataupu na tulai mai i le masina o Tesema, ona maua ai lea o le faasalaga atoa e 80 masina poo le 6 tausaga.

Na poloaina e le Faamasinoga ia Isaia ina ia faia se suega i lona tino i soo se taimi e faatonu ai o ia e le Ofisa Nofovaavaaia poo se Leoleo a le malo.