Na taua e le molimau e to’atasi a le itu tete’e i luma o le vaega iloilo iuga i le taeao ananafi, e lua lava nofoaga sa masani ona ia momoli i ai tama’ita’i e to’alua o lo o avea ma molimau autu a le malo i le mataupu fa’asaga ia Fa’asaina Park ma Lusia Tusi po o Sheila, “a le o le faletalimalo a Scanlan o luga o va’a fagota”.

Na taua fo'i e le molimau e fa'apea, e ova atu ma le fa'a 10 ona ia piki mai tama'ita'i ia e to'alua mai le nofoaga masani lava lea e tasi, i le leva o le po ma le aga'i atu i le vaveao, ma e le fesiligia i lana molimau, o tama'ita'i sa ia piki ma momoli i lana taxi, o tama'ita'i tonu lava ia o lo o avea ma molimau autu a le malo i le mataupu sa fa'agasolo i le vaiaso atoa lenei.

E le i atoa se itula na tuu atu ai le avanoa i le itu tete’e mo le valaauina o ana molimau ae mae’a loa, ma tuu atu ai loa se fa’aiuga o lenei mataupu i aao o ali’i ma tama’ita’i iloilo iuga, latou te iloiloina se fa’aiuga talafeagai mo lenei mataupu.

A o le i valaau e le loia a Park ia Fiti Sunia le molimau e tasi a le latou itu e molimau, na muamua fa’afetaia e le ali’i loia ali’i ma tama’ita’i iloilo iuga, i lo latou onosa’i atoa ai ma le fa’aavanoaina o latou taimi e fa’afofoga ai ma le toto’a i mau o lenei mataupu.

Na toe fa’atepa e Sunia finagalo ali’i ma tama’ita’i iloilo iuga i se vaega o le molimau a le tamaitai o “M.W”, o le molimau lona lua lea a le malo, lea sa ia taua ai se tagata e igoa ia “Ralph” i lana molimau.

Na fa’ailoa e Sunia e faapea, o le tagata e igoa ia Ralph lea na fa'atele ona taua e "M.W" i lana molimau tauto, o lona igoa mo’i lava o Tuia’i Leota Jr, o ia o se ali’i ave taxi mo le tele o tausaga, lea fo’i o le a ia fa’ailoa le moni o lana molimau i le taimi e valaauina ai o ia e molimau, ma ua ia sauni e fa'amatala i luma o le fa'amasinoga le moni ma le fa'amaoni o le mea sa tupu i tama'ita'i na a'afia.

Na taua e Leota Jr i luma o le vaega iloilo iuga e fa’apea, a o le i galue o se ali’i kamuta mo le umi e tusa ma le tasi nei le tausaga, o ia sa avea ma ave taxi i le fale ta’avale o le Aeto Stand mo le umi e 12 tausaga, lea na amata mai i le 1994 ae mae’a i se taimi o le 2012.

Na fesili Sunia i le molimau pe faapefea ona maua ana pasese i taimi a o avea o ia ma ave taxi, na tali le molimau, o le tele lava o tagata e telefoni atu i le Fale Ta’avale ma talosaga atu mo se taxi, ae o isi e valaau sa’o atu i lana telefoni feavea’i.

Na taua foi e le molimau e faapea, o ni isi o pasese sa masani ona ia pikiina mai luma o le pamu kesi i Leloaloa, o tama’ita’i e to’alua ia o lo o avea ma molimau autu a le malo i le mataupu lenei, o “I.M” ma “M.W”, lea e masani ona ia piki pe tusa o le itula e 3:00 i le vaveao, ona momoli lea i le faletalimalo a Morris Scanlan i Fagatogo i ni isi o taimi, ae o isi taimi e momoli sa’o ai i le vaega o lo o ia i va’a fagota.

E leai ni fesili a le alii loia o Joel Shiver o lo o tula’i mo Tusi na fesiligia ai le molimau, sei vagana ai le loia a le malo sa ia fesiligia le molimau a le itu tete’e e tusa ai o ni isi o vaega o lana molimau.

Na fesili le loia a le malo ia Jessica Bargmann i le molimau, pe na te manatua e fia ni pasese sa ia la’uina i totonu o le 12 tausaga na avea ai o ia ma ave taxi, na tali le molimau, “e tele naua pasese sa ou lauina”, ae fuafua lava le tele o pasese e piki e lana taavale i le manaomia e tagata o le tautua a lana taxi.

Na fesili le loia a le malo i le molimau, pe masani ia Park, na tali le molimau, e le masani tele ia Park, sei vagana ai lona iloa o le ua molia, ona o le tele o taimi e paka ai lana taxi i luma o le fale kalapu a Park, pe afai e alu atu e piki mai ni ana pasese i luma o le fale kalapu.

Na fesili le loia a le malo i le molimau, pe sa faia se la feutanaiga ma Park e alu atu e la’u mai pasese mai le Karaoke Bar pe a o o i le taimi e tapuni ai le fale kalapu, na tali le molimau “e leai”, ae ina ua toe fesili le loia i le molimau, pe masani ona alu ma piki mai ni pasese i luma o le Karaoke Bar i le taimi e tapuni ai le fale kalapu, na tali le molimau “ioe”.

Na fesili le loia a le malo i le molimau i le umi talu ona la masani ma Park, ae na tali le molimau, na ia iloa Park talu mai lava le taimi na fa’atoa ave taxi ai.

“Lona uiga la o le 12 tausaga lea na e ave taxi ia, o le umi fo’i lena na e iloa ma masani ai ia Park?”, o le fesili lea a le tama’ita’i loia, ae na tali le molimau, “o lea lava”.

Na fesili Bargmann ia Leota Jr pe i ai ni isi tamaitai faigaluega a le Karaoke Bar e masani ona ia pikiina mai i luma o le fale kalapu pe a tapuni, na tali le molimau, “ioe, ae ou te le momolia i latou i le faletalimalo”.

Na toe fesili le loia a le malo i le molimau i tamaitai e to’alua lea e masani ona ia pikiina ma momoli i le fale talimalo po o luga o va’a fagota, pe sa i ai fa’atasi ma ni tamaloloa i le taimi lea, na tali le molimau, “o lea lava”.

I le aotelega o molimau sa mafai ona tuuina atu a latou faamatalaga tauto i luma o alii ma tamaitai iloiloga, o lo o manino mai ai ni isi o mataupu o lo o finauina e itu e lua e lagolagoina ai la latou itu.

Na taua e le isi molimau a le malo e faapea, o le tele o taimi e faia ai fonotaga a le aufaigaluega ma Park, e fautuaina ai i latou e Park e taumafai e faatosina alii fagogota o lo o aga’i atu e tafafao i le fale kalapu, e le gata ia faia i ai uiga e faatosina mai ai latou e eva pea i le fale kalapu, ae sa ia fautuaina foi le toaaga e inu pia ia vave uma, ina ia faaalu ai e i latou nei a latou tupe e toe faatau ai nisi pia.

Na taua foi e le molimau le faatonu e Park o ia ma isi teine faigaluega, ina ia talia so o se mea e manana’o atu i ai ali’i fagogota o lo o aga’i atu e tafafao i le fale kalapu, aemaise lava pe afai e fia tago atu le tagata tafao i vaega o latou tino.

Ae na taua e Park i lana fa’amatalaga tusitusia sa tuuina atu i leoleo, na mafua ona ia fasia tama’ita’i e to’alua o lo o tu’uaia na a’afia i lenei mataupu, ina ua tete’e atu i lana fa’atonuga ae manana’o e o e pati ma inupia ma ni isi o ali’i fagogota i luga o le va’a fagota.

Na taua e Park e fa’apea, sa popole tele lona mafaufau i le saogalemu o tamaitai nei, o le mafua’aga lena e le mana’o ai e o e pati ma fiafia ma tamaloloa i luga o va’a fagota.