O le ali’i mai Fagatogo lea o lo o tuuaia i lona gaoia o le silia i le $700 mai totonu o se ato a se fafine, faapea ai ma lona sola ese ma leoleo ina ua latou o e saili le nofoaga sa ia nanaina ai le tupe, ua mae’a ona faila e le malo moliaga mamafa e lua fa’asaga ia te ia i le taeao ananafi.

O moliaga ua molia ai le ali’i o Malaki Sao e aofia ai le gaoi ma le sola ese ma leoleo a o taofia fa’apagota o ia.

E tusa ai o fa’amaumauga a le fa’amasinoga o lo o taua ai e fa’apea, o lenei mataupu na tofu atu i le ofisa o leoleo i le vaveao o le aso 1 Me, 2014, ina ua talosagaina e le tina na a’afia se fesoasoani a leoleo, ina ua gaoi e se tagata lana ato tupe o lo o i ai se tinoitupe e $700.

O le tina na a’afia e faigaluega i le faletalimalo o le Sadies Thompson Inn i Fagatogo, o iina fo’i lea o lo o taua na gaoia mai ai lana ato tupe.

Na taua e le tina i leoleo e fa’apea, o ia sa pisi i le pito i tua o le fale faigaluega i le fa’atinoina o isi galuega masani o le taeao, ae o lana ato sa i luga o le nofoa i le pito i luma o le ofisa, o lo o i ai i totonu o lana ato se teutusi o lo’o i ai le $700.

Pe tusa o le itula e 1:00 fa’asolo atu i le 2:00 i le vaveao o le aso lava lea, na taua ai e le tina lona vaaia o Sao o lo o fealua’i i fafo o le fale faigaluega, ua masani fo’i lana vaai i le tagata lenei o Sao e ui na te le i iloaina e i ai ni uiga faapenei ia te ia.

Na taua e le tina i leoleo le fa’afuase’i ona tatagi o le telefoni a le ofisa, ona alu atu ai loa lea e tali, ae na fa’ateia o ia ina ua ia le vaaia lana ato sa i luga o le nofoa ua leai se mea o i ai, mulimuli ane ina ua latalata ina manava, na fa’atoa ia iloaina ai loa ua leai le teutusi sa i totonu o le ato lea na teu ai le tupe i totonu.

Na taua e le tina i leoleo e fa’apea, e leai ma se isi sa i ai i totonu o le fale faigaluega i le taimi lea, na o ia lava sa galue ai, sei vagana ai le ua molia sa ia vaaia o fealualua’i solo mai i fafo o le faletalimalo.

Na iloilo e leoleo se masini pu’eata o lo o pipi’i i le pito i fafo o le fale a le G.H.C Reid i Fagatogo lava, lea e fa’a fesaga’i ma le Sadies Thompson Inn, ma vaaia ai le uu e le ua molia i lona lima o se teutusi pa’epa’e i le taimi tonu o le vaveao lea sa taua e le fafine na leiloa ai le tupe mai totonu o lana ato.

Pe tusa o le itula e 8:40 i le taeao o le aso lava lea ae maua ai loa e leoleo ia Sao i luma o le faleoloa o le ABC Fax Store i Fagatogo, ma le anoanoa’i o ni taga pepa fa’atau o lo o ia te ia, ma auina atu ai loa o ia i le ofisa o leoleo mo su’esu’ega.

Ina ua fesiligia o ia e leoleo, sa ia ioeina ai lona gaoia o le tupe mai totonu o le ato a le fafine na a’afia, ona ia fa’aaoga lea o le tupe lea e fai ai le latou fa’atau ae o le isi vaega o le tupe sa ia nanaina lea i le fale a ona matua.

Na su’e e leoleo le tino o le ali’i o Sao ma maua i ai le $189.00

Pe tusa o le itula e 9:00 i le taeao lava lea, na o ai leoleo e to’alua ma le ua molia e fa’asino le vaega sa ia nanaina ai le isi vaega o le tupe. Na paka le ta’avale a leoleo i le vaega e gata ai le auala, ona latou savavali lea i le vaega na fa’asino atu e Sao o lo o i ai le tupe. O Sao na muamua i luma i le fa’asinoina o le auala.

Na taua i fa’amaumauga a le fa’amasinoga, o le gaoa o le auala ma le lavelave i le tele o laau, na mafua ai ona tau punou le alii leoleo na o fa’atasi ma Sao i lalo ona o le lavelave o lala laau, ae maua ai loa le avanoa o Sao e sola ese ai ma tamo’e aga’i ai i le togavao, ma fiu ai loa leoleo e tau saili.

O le taeao o le aso Faraile na soso’o ai na fa’atoa maua ai o ia e leoleo, ma auina atu ai loa i le toese i Tafuna ma taofia ai.

E $10,000 le vaega tupe lea ua fa’atulaga e totogi ona fa’atoa mafai lea ona tatala le ua molia i tua, e fa’atalitali ai taualumaga o lana mataupu lea ua faamoemoe e amata fa’agasolo i le taeao nei i luma o le fa’amasinoga maualuga.