Ua fa’atonuina nei e le Sui Komesina le tumau o le Matagaluega o Leoleo ia Save Liuato Tuitele, le faia o se su’esu’ega atoatoa i le tulaga o lo o i ai le potu e teu i ai mea molimau a le malo o lo o i le ofisa autu o Leoleo i Fagatogo, ina ia mafai ai ona iloa tonu le aofa’i o mea molimau a le malo o lo o teuina i totonu o lea potu.

O lea fa’atonuga mai le afioga a Save sa tu’uina atu lea i le aso Faraile na te’a nei i le ali’i leoleo Satini lea ua tofia nei e le matagaluega, na te vaaia le potu o lo o teu ai mea molimau a le malo (Evidents Room), le susuga a Sgt. Sili Sea.

O le aso Faraile na te’a nei na talosagaina ai e le afioga i le ali’i fa’amasino sili ia Michael Kruse se la feiloaiga ma Save, ina ua fia silafia e le fa’amasinoga ta’iala ma auala o lo o taulimaina ai e le Matagaluega o Leoleo mea molimau a le malo e maua mai i mataupu tau solitulafono ma teu i totonu o le potu lenei, aemaise lava i fualaau fa’asaina.

O le aso Faraile fo’i na te’a nei na poloaina ai e le fa’amasinoga ni isi o Leoleo sinia ina ia o o atu i le fa’amasinoga, e fa’amanino le tulaga e fa’atatau i fualaau fa’asaina na maua mai i le mataupu a Ventilate Motuliki lea na teu i totonu o le potu e teu ai mea molimau a le malo, lea na taua i ni ripoti e fa’apea ua leiloloa.

Ae ina ua mae’a le iloiloga i le aso Faraile na te’a nei, na manino ai loa le fa’amasinoga, e le i leiloloa fualaau fa’asaina e pei ona fesiligia, ae o lo o auina atu i le Ofisa e suesueina ai fualaau a le malo tele o Amerika (Drug Enforcement Administration - DEA), ma o lo o fa’atali le taimi e toe fa’afo’i mai ai i le atunu’u, ina ia mafai ai ona fa’amaonia, o nei fualaau o vaega moni ia o le pauta fa’asaina o le aisa.

I se fa’atalatalanoaga ma le afioga a Save i le taeao ananafi, na taua ai e le sui komesina le tumau o le Ofisa o Leoleo le tele o se galuega e mana’omia le fia faia i totonu o le potu lea, ina ia mautinoa ai le aofa’i o mea molimau o lo o i ai.

“E i ai mea molimau ua fia tausaga o ta’atitia ai lava i totonu o le potu lenei, o le isi lena mafua’aga ua ou fa’atonuina ai le faia o se su’ega i le aofa’i o mea molimau o lo o i ai, ina ia mafai ai loa ona fa’atulaga fa’alelei le teuina ina ia fa’a faigofie ai ona iloa mea molimau mo mataupu eseese e tula’i mai i le fa’amasinoga”, o le saunoaga lea a Save.

Sa ia taua fo’i e fa’apea, o ni isi o mea molimau o lo o teuina pea i totonu o le potu, o mea molimau mo mataupu ua uma ona faia i ai fa’aiuga a le fa’amasinoga ma ua tapunia fo’i a latou faila, e tatau fo’i la ona fai se ripoti ae ave i le fa’amasinoga mo sana poloaiga e fa’atamaia ai mea molimau nei.

O ni isi o vaega na taua e Save o lo o taumafai e fa’alelei e aofia ai pepa o lo o saini ma fa’atumu i le taimi e taunu’u ai mea molimau i totonu o le potu, ina ia toe sui ma fa’amanino atili, atoa ai ma le auala e ulufale atu ai mea molimau i totonu o le potu ma le taimi e toe ulufafo mai ai.

“O lea ou te galue i le tau tu’u fa’atasia o ni ta’iala e lima e ta’ita’ina ai le fa’atinoina o galuega a i latou e vaaia ma pulea le potu lea, ma le fa’amoemoe a toe taliu mai le ali’i Komesina ona ou tu’u aloaia lea i ai o lea ta’iala e silasila i ai ma aumai sana fautuaga”, o le isi lea saunoaga a Save.

Sa ia taua fo’i e fa’apea, so o se taimi lava e fesuia’i ai i latou e pulea le potu e teu ai mea molimau a le malo, e tatau lava ona faia se suega i le aofa’i o mea molimau o lo o i totonu, peita’i o le itu na te’i ai lona loto, ua fa’atele ona fai suiga mo i latou e pulea ma va’ava’aia le potu ae leai lava ma se suega o mea molimau (Inventory) sa faia.