E lua ni tagi ua mae’a ona fa’aulu i luma o le fa’amasinoga maualuga i le aso Lua na te’a nei, e fa’atatau i le faiga palota a Amerika Samoa na fa’atoa mae’a atu nei.

O tagi, e aofia ai le tagi na fa’aulu e le faipule a le Itumalo #9 o le Maoputasi #3 ia Va’amua Henry Sesepasara fa’asaga i le sui fou lea na manumalo i le palota na mavae atu nei ia Meauta L. Mageo ma le Komesina o Palota, atoa ai ma le tagi na faaulu e se sui tauva mo le Itumalo #14 ia Fatumalala L. A Al-Shehri, ona o ni isi o vaaiga sa ia maitauina i le aso o le palota e le i tusa ma tulafono tau palota.

TAGI A VA’AMUA

Ua talosagaina e Va’amua se fa’aiuga a le Vaega Apili o le Fa’amasinoga Maualuga a Amerika Samoa, e le gata ia fa’aleaoga le fa’aiuga o le palota e pei ona manumalo ai Meauta, a ia fa’ai’uina fo’i le fa’atamala o le Komesina o Palota ia Tuaolo M. Frean e fa’atino ona tiute i lalo o tulafono tau faiga palota.

Na taua e Va'amua, tauala atu i lana loia ia Matailupevao Leupolu Jr e fa'apea, i le aso 5 o Novema, na telefoni atu ai se tagata palota ia Va'amua ma fa'ailoa atu i ai ona popolega i le auala na fa'atautaia ai le faiga palota a le itumalo, ma taua ai le tulaga e fa'atatau ia Meauta ma se solitulafono na ta'usala ai o ia i se fa'amasinoga i Hawaii, ina ua ia le usitaia le poloaiga mo le totogiina lea o tupe e tausi ai lana fanau, atoa ai ma se solitulafono mamafa na ta'usala ai o ia i Oregon.

Na sailia e le itu tagi ni fa'amaumauga e fa'atatau ia Meauta, ma fa'amaonia ai faila mai fa'amasinoga sa ta'usala ai o ia, e pei o Hawaii, atoa ai ma le fa'amasinoga i Oregon lea na ta'usala ai o ia i se solitulafono i le tausaga e 2010.

Sa faapipi'i fa'atasi atu ma le talosaga kopi o fa'amaumauga mai fa'amasinoga i Hawaii ma Oregon, e lagolagoina ai solitulafono o lo o tu'uaia na ta'usala ai le susuga a Meauta.

Na taua foi e Va'amua i lana talosaga e fa'apea, ina ua fa'atumu pepa mo sui e tauva,  sa i ai se vaega o pepa fa'atumu na fesiligia ai sui tauva, pe sa ta'usala o ia i se solitulafono mamafa.

Na talosaga le loia a le itu tagi i le Komesina o Palota, e fa'amatu'u mai le pepa lea sa fa'atumu e Meauta ao lumana'i le palota, peita'i e o o mai lava i le taimi na faila ai lenei talosaga e lei tauaaoina lava e le itu tagi lea pepa e pei ona talosagaina.

Sa tuuina atu fo'i se talosaga i le ofisa o le tofa a Tuaolo e tusa ai o lea pepa, peita'i e le i maua lava e le itu tagi se tali mai le ofisa o palota e tusa ai o lenei mataupu.

E talitonu foi le itu tagi, ua fa'atamala le komesina o le ofisa o palota e fa'atino ona tiute, e ala i le iloiloina lea o agava'a o Mageo e mafai ai ona avea o ia ma sui tauva mo le itumalo, ma o le fa'atamala o Tuaolo, o se tasi lea o itu e matua taua lava i le iloiloina o lenei mataupu.

E talitonu fo'i le itu tagi, ana matua auiliili e Tuaolo faila ma fa'amaumauga uma a Mageo, atonu e le agava'a o ia e avea ma sui tauva mo le itumalo, ae tula'i mai ai loa na o Va'amua e avea ma sui tauva mo le itumalo, ae leai se isi la te tauva i le palota, e tatau fo'i i le fa'amasinoga ona latou fa'ai'uina loa, e na o Va'amua lava na ausia agava'a uma e mafai ai ona avea ma sui tauva o le itumalo.

TAGI A AL-SHEHRI

O ni isi o vaaiga sa tutupu i le aso tonu o le palota i le faiga palota a le itumalo #14, o lo o autu i ai le tagi ua fa'aulu e Fatumalala L. Al-Shehri i luma o le fa'amasinoga.

Mo se fa'ata'ita'iga e pei ona taua e Al-Shehri, e to'alua ni tama matutua sa le i mafai ona aga'i atu e fai a laua palota i le aso o le palota, lea na mafua ai loa ona la o atu i le aso lea ma avatu ni la alo tama'ita'i e fesoasoani i le faiga o la palota, e ui ua leva na faamuta le taimi e fai ai palota a i latou nei.

Ae o le mea sa tupu i le aso lea e pei ona taua e Al-Shehri, na o faatasi le isi tama matua lona afafine i le vaega e fai ai le palota mo le faiga o lana palota, ae o le isi tama matua na alu lona afafine ma lana pepa palota ua fai mai i totonu o le ta'avale.

I lalo o tulafono tau palota e pei ona taua e Al-Shehri, e le faatagaina ai se isi tagata ona fesoasoani i le faia o palota, sei vagana ai se tagata ua tofia e avea ma tagata fai palota, e le gata i lea, e nofosala i le vaega B o solitulafono mama se tagata e fa'alavelave i le nofoaga e faia ai le palota.

Na taua fo'i le i ai o sui o le itu a sui tauva o Savali Talavou Ale na faafuase’i ona toe avatu i le aso o le palota, ae ua leva ona tapunia le faailoaina o sui a sui tauva mo le vaaia o palota (poll watchers), ae maise ai fo’i o le faaaogaina o penitala e tusi ai palota.

Ua taoto atu nei talosaga ia e lua i luma o le fa’amasinoga mo le faatulagaina o se aso e fofogaina ai.