Ua talia e le Ta’ita’ifono o le Komiti o le Paketi a le maota o sui, le afioga i le ali’i faipule ia Timusa Tini Lam Yuen se fautuaga sa tu’uina atu e “sui o le latou itu”, ina ia taoto pea i le komiti pili tupe sa manatu le fono e aofia i mataupu o le fono fa’apitoa a le kovana o lo o nofoia nei seia i ai se aso, aemaise lava i le pili e fa’aopoopo ai le ta’i $10,000 i alauni a senatoa ma faipule, e pei ona ia taua i se fa’atalatalanoaga ma le Samoa News ananafi.

“Ou te iloa o le fa’aiuga sa’o lea ua aumai e le matou itu i totonu o le maota, ina ia taoto pea i le komiti pili tupe e pei ona naunau mai i ai le maota maualuga, aemaise lava i le pili e sii ai alauni a senatoa ma faipule, ona o lo o i ai ni isi o mafua’aga tatau e mana’omia le talanoaina muamua ona fa’atoa fai ai lea o se fa’aiuga mautu”, o le saunoaga lea a Timusa.

Mai faipule uma sa mafai ona fa’aalia o latou lagona e faatatau i le mataupu lenei i le Samoa News, e na o le afioga i le ali’i faipule mai Aua ia Faimealelei Anthony Fu’e Allen na finagalo e fa’ailoa lona suafa faatasi ai ma ona lagona e tusa ai o le pili e sii ai alauni a le fono, lea na ia taua ai lona matua le taliaina o le fuafuaga e fa’aopoopo ai le ta’i $10,000 i alauni a le fono.

Na taua e Faimealelei e fa’apea, na te lagolagoina le tatau lea ona sii alauni a le fono, peita’i e le o sa’o le taimi lea ua finagalo le fono e faatino ai lea tulaga, e le o sa’o fo’i le auala ua uia, e tatau ona fai ni iloiloga faalaua’itele e fesiligia ai finagalo o le atunuu e uiga i lenei mataupu.

Na taua e Timusa, le tele o le avanoa e mafai ai ona pasia le tulafono lenei pe ana tuuina atu i luma o le maota e palota ai afioga i faipule, e ui o lo o to’atele faipule o lo o fa’aalia o latou lagona tete’e i lenei tulafono.

Ina ua fesiligia le alii faipule e fa’amanino atili lana saunoaga, i le i ai lea o isi mafua’aga po o ni mataupu e tatau ona talanoaina muamua ona fa’atoa fai lea o se faaiuga e pasia ai le pili e faaopoopo ai alauni a le fono, sa ia taua ai mo se faataitaiga le pili na faaulu i luma o le fono i se taimi ua tuana’i atu e sui ai le Fa’avae, ina ia fa’aopoopo ai aso fono mo le Fono Faitulafono i le tausaga, mai le 90 o lo o i ai i le 120.

Na taua e Timusa e fa’apea, afai ua finagalo le fono e faaopoopo alauni, e tatau foi ona toe vaavaai pe fa’amata e le i talafeagai le toe faaopoopo o isi aso fono, ina ia talafeagai tulaga o totogi ma galuega faatino.

“Ou te iloa e toatele lava faipule ma senatoa o lo o faaauau pea ona galulue mo latou itumalo ma afioaga i le taimi e malolo ai le fono mai ana galuega masani, o se itu lelei lena, ae i aso fono lava e pei ona faatulaga mai e le Fa’avae, o se tasi lea o itu e ao foi ona toe silasila i ai ina ia talafeagai suiga o le Fa’avae ma le faaopoopo o totogi mo senatoa ma faipule”, o le isi lea saunoaga mai le alii faipule.

I le silasila mamao a le afioga a Timusa e tusa ai o lenei mataupu, sa ia taua ai lona lagolagoina o le fuafuaga, e tatau ona tulaga lelei totogi o taitai o le malo e pei o le kovana ma le lutena kovana, totogi o le faamasino sili, aemaise ai totogi o le peresetene o le senate ma le fofoga fetalai.

“O le mea moni lava ia e tatau ona maualuluga totogi o ta’ita’i o le faigamalo a Amerika Samoa i vaega e tolu, ae o totogi o le fono faitulafono i senatoa ma faipule, e tatau ona tutusa ma totogi o fa’atonusili, peita’i o le fa’afitauli lea o lo o maitauina, e i ai fa’atonusili ua matua ova lava le maualuluga o totogi ae o lea lava e maualalo totogi o le fono”, o le saunoaga lea a Timusa.

Ina ua toe fesiligia pe na te lagolagoina se finagalo na fa’aalia e se tasi o senatoa, fai mai o le Fono Faitulafono e pito maualalo ai lava o latou totogi i totonu o teritori a le Iunaite Setete, na saunoa Timusa, “ioe, e maualalo tele totogi o le fono”.

O le talitonuga o le ali’i faipule, afai e lelei ma maualuluga totogi o tagata faigaluega uma i le atunu’u, o le lelei fo’i lena ma malosi o le tamaoaiga o Amerika Samoa, ina ua fa’aalu e tagata lo latou tamaoaiga i pisinisi ma vaega uma i totonu o le teritori.

Na taua e le alii peresetene o le senate ia Gaoteote Palaie Tofau i luma o le maota maualuga i le aso Lua na te’a nei, lona fa’anaunauga o lo o i ai, talosia ae vave ona fai se fa’aiuga a le maota o sui i pili taua e pei ona toe aofia i mataupu o le fono faapitoa a le alii kovana.