Ads by Google Ads by Google

Le mautonu nisi i le fa’atu o se fale’aisa i Fagatogo

Ua fesiligia e nisi o faipule le fa’aiuga a le kovana e pei ona ia sainia ai le lisi mo le fa’atuina o le faleaisa i luga o le uafu, ona e i ai le talitonuga o le a feteena’i lea fuafuaga ma se polokalama ua mae’a ona fa’ataoto e le Initeria, mo le toe fa’ateleina o le uafu tele i Fagatogo mo le $7 miliona.

O le masina na te’a nei na fa’alauiloa ai e le afioga i le matua ia Togiola Tulafono lona sainia o le isi i le va o le malo ma le kamupani i’a o le StarKist Samoa, mo le fausiaina o se fale aisa i luga o le uafu e agai mai vaa fagota ma la’u i ai a latou i’a e maua mai i fagotaga.

O le mataupu i le fausiaina o le faleaisa lenei i luga o le uafu, ua tele i ai manatu o le toatele o le atunuu, ona o le latou le taliaina lea o le nofoaga o loo fausia ai lenei galuega tele.

Na taua e le toatele e faapea, o le nofoaga lea ua faamoemoe le kovana e fausia ai le faleaisa lenei, o le a afaina ai le saogalemu o le gataifale ma le siosiomaga o le Fagaloa, ona o le sua o le i’a o le a tafe mai i le faleaisa, peitai na saunoa Togiola e faapea, o manatu uma e pei ona faasea i ai le atunuu, ua uma ona suesue ma vailiili e le komiti e aofia ai ana loia fautua, ma ua latou fautuaina ai o ia, e leai se afaina o le fausia ai o le faleaisa i Fagatogo.

O le vaega tonu lava lea e masani ona taula ai le vaa o le M/V Sili i luga o le uafu i Fagatogo, latalata i le vaega lea e masani ona taula ai le vaa o le Lady Naomi ua faamoemoe e fausia ai le faleaisa lenei.

Saunoa le alii faipule ia Larry Sanitoa i le taeao ananafi, e selau pasene lona lagolagoina o le atina’e mo le manuia o le kamupani i’a o le StarKist Samoa, ona o se tasi lenei o kamupani o lo o tele ina faamoemoe i ai le tamaoaiga o le atunuu i galuega maua, aemaise ai ua loa foi le tautua a le kamupani, peitai o le nofoaga lea ua fuafua le kovana e fausia ai le falei’a, o lo o fesiligia e lona mafaufau.

Fai mai Sanitoa, ua maua tala i se vaega tupe e $7 miliona lea ua faaavanoa mai e le Matagaluega o le Initeria mai Tupe mo Galuega Tetele (Capital Improvement Projects), lea ua faamoemoe e toe fausia ai faatele le uafu ma faaleleia nisi o vaega o loo manaomia le toe faaleleia.

 “O popolega i lo’u sui faipule, ina nei avea le fuafuaga lea ua sainia e le kovana ma itu e afaina ai ma le polokalame a le Initeria mo le toe faaleleia o le uafu, ona le maua lea e le malo le avanoa ma le tupe ua fuafuaina,” o le saunoaga lea a Sanitoa i luma o le maota.

E le gata i le ono aafia o vaega tupe ua faatulaga mo le toe faaleleia o le uafu, ae na fesiligia foi e le alii faipule tulaga i isi vaa e pei o le Tatoso ma le MV Sili lea o loo avea le nofoaga lea o le uafu ma vaega e taula ai, poo fea o le a ave vaa nei e taula ai.

Na faaiu le saunoaga a Sanitoa i lona talosagaina lea o se avanoa e aami ai le loia fautua a le kovana, ina ia faamanino i luma o le maota le uiga tonu o lenei mataupu.

Na lagolagoina e afioga i alii faipule ia Puleleiite Tufele Liamatua ma Alexander Eli Jennings le finagalo o Sanitoa e uiga i lenei mataupu.

Saunoa Jennings, o ia foi lea o le taitai komiti o le Komiti o Fela’uaia ma Malaevaalele, e taua le faia o se iloiloga ina ia fesiligia ai le faatonu o Uafu ma Taulaga, pe o i ai se latou fuafuaga e uiga i lenei mataupu.

Na lagolagoina e Puleleiite le finagalo o Sanitoa ma Jennings i le tatau lea ona fesiligia le pulega o uafu ina ia mautinoa e le afaina le tupe lea ua faaagaga mai e le Initeria mo le uafu a le atunuu.

O le aso Gafua o le vaiaso fou i le itula e 11:00 ua faatulaga e faia ai le iloiloga a le komiti mo le fesiligiaina o le mataupu lenei, lea o le a molimau ai le faatonu o Uafu ma Taulaga ia Matagi R. McMoore, o le sui faatonusili ia Chris King, o le vaega a le ASEPA faapea ai ma le loia fautua a le kovana, le susuga ia Toetasi Tuiteleleapaga.