Ads by Google Ads by Google

Tete’e Folasa Galea’i i tu’uaiga a le malo fa’asaga ia te ia

ausage@samoanews.com

Ua teena e le ali’i o Folasa Galea’i le moliaga mamafa e tasi lea ua molia ai o ia e le malo, ina ua tula’i i luma o le Fa’amasinoga Maualuga i le vaiaso na te’a nei mo lana ulua’i iloiloga.

 

O loo tu’uaia Galea’i i le moliaga o le ave ta’avale fa’atamala ua mafua ai ona oo le maliu i se isi tagata, o se solitulafono D lea i le fa’atulagaina o solitulafono mamafa, lea e mafai ona fa’a falepuipui se tasi i le toese mo le umi e le sili atu i le 5 tausaga pe fa’asala fo’i i le salatupe e le sili atu i le $5,000, poo le fa’asala uma fo’i i fa’aslaga ia e lua.

 

O le iloiloga faapitoa a Galea’i sa faia i luma o le Fa’amasinoga Faaitumalo, na faia ai le fa’aiuga a le afioga i le ali’i Fa’amasino ia Fiti Sunia ina ia tofu atu le mataupu a Galea’i i luma o le fa’amasinoga maualuga, ina ua fa’amalieina le fa’amasinoga i mau sa tu’uina atu e le malo, e lagolagoina ai le latou mau, ua soli se vaega o le tulafono, ma, o Galea’i fo’i lea o lo o tu’uaia i le soliina o lea vaega o le tulafono.

 

E to’atasi le molimau na valaau e le malo mo le ulua’i iloiloga i luma o le fa’amasinoga fa’aitumalo, o le ali’i leoleo fo’i lea sa autu i ai le su’esu’eina o lenei mataupu, susuga PSO Lomu Mosese.

 

O le tama’ita’i loia fautua ia Kate Hannaher na tula’i mo Galea’i i le iloiloga lea, ae o le ali’i loia sili lagolago ia Robert Morris na tula’i mo le itu a le malo.

 

Na taua e Mosese i lana molimau e fa’apea, pe tusa o le itula e 2:15 i le aoauli o le aso 9 o Iuni na te’a nei na maua ai e le Ofisa o Leoleo se telefoni e fa’atatau i se fa’alavelave tau ta’avale, sa tula’i mai i Fagaalu i luma tonu o le Faleaoga mo Fanau e i ai manaoga faapitoa o le tino, ma tofia ai loa o ia na te su’esu’eina lenei mataupu.

 

Na taua e le ali’i Leoleo se vaaiga uiga ese sa ia molimauina ina ua taunu’u atu i le nofoaga na tula’i mai ai le fa’alavelave, e le gata o loo pisi sui o le EMS ma ni isi o Leoleo e tau fa’amanava se Tama matua o loo ta’atia i luga o le auala, ae sa ia vaaia fo’i se ta’avale piki apu o lo o lavea i luma tonu o le faleaoga, ma fa’aleagaina ai le pou sima o le pa o loo i luma o le auala.

 

Na fesili le loia a le malo i le ali’i Leoleo poo a isi vaaiga sa ia molimauina i le taimi lea, ae na tali Mosese, ina ua savali atu i le vaega o lo o ta’atia mai ai le Tama matua na a’afia, sa ia vaaia ai le minoi o lona tino ao taumafai sui o le EMS ma Leoleo e tau fa’amanava o ia, mulimuli ane ona latou si’i lea o lona tino i le ta’avale a le Falema’i ma fa’anatinati atu loa i le falema’i mo togafitiga, ona ia savali ane ai loa lea i le itu o lo o i ai le faletua o le Tama na a’afia ma ia fesiligia loa i le mafua’aga o le fa’alavelave.

 

Na taua e le faletua o le Tama matua na a’afia i Leoleo e fa’apea, o le la ta’avale ma lona to’alua na aga’i mai i luga o le aega o lo o i ai le latou fale, ma le fa’amoemoe la te o e momoli teu fugalaau i se tasi o a la uo, ae ina ua taunu’u le la ta’avale i luma tonu lava o le vaega e fesootai ai le latou auala ma le auala a le malo, ae fa’alogoina loa e lona to’alua se mea o lo o pao mai i totonu o le afi o le ta’avale.

 

O le Tama matua na a’afia, o ia lea sa aveina le ta’avale. Sa ia fa’atu le ta’avale, ona alu lea i fafo e siaki le vaega sa fa’aletonu.

 

Na taua e lona faletua i Leoleo e fa’apea, e mae’a loa ona siaki e lona to’alua le vaega o le afi o le ta’avale na fa’aletonu, ae ona vaaia loa i le itu sisifo le aga’i mai o se ta’avale piki-apu lanu moli i se saoasaoa e uiga ese le mata’utia, ma le fa’amoemoe e aga’i i le itu i sasa’e o le taulaga, poo le aga’i atu lea i Fagatogo.

 

Na taua e le faletua i Leoleo le alu atu sa’o lava o le ta’avale piki-apu lea ma taia lona to’alua o lo o tu i luma o le la ta’avale, ma lelea atu ai lona toalua i le isi itu, ma toe tifa ai le ta’avale i totonu o le auala ma alu atu ai ua taia le pou sima o le faitotoa e ulufale ai i totonu o le faleaoga ma tu ai loa iina.

 

Na taua e le ali’i Leoleo i lana molimau e fa’apea, mai lana su’esu’ega sa faia i le vaega sa i ai le ta’avale a le Tama matua na a’afia, o le vaega sa i ai le pa na fa’aleaga, aemaise ai o vaega o le ta’avale sa fa’aleagaina, na ia iloa ai, o le saoasaoa tele o le ta’avale na mafua ai ona tula’i mai lenei fa’alavelave.

 

Na fesiligia e Mosese le ua molia ao i totonu o ia i se tasi o ta’avale a Leoleo, lea sa ia taua ai e fa’apea, o ia sa moe i le taimi na tula’i mai ai le fa’alavelave, na fa’atoa te’i lava ina ua fetoai le ta’avale ma le pou sima o le faitoto’a e ulufale ai i le faleaoga.

 

Sa ia taua foi i Leoleo ina ua mae’a ona fa’ailoa i ai ona aia tatau, o ia na malaga mai e ave ni pepa i le Ofisa o Lafoga a le malo i le fale o le EOB i Utulei, ae tula’i mai ai loa le fa’alavelave i Fagaalu.

 

O le mae’a ai ona fesiligia e Leoleo o Galea’i e uiga i lenei fa’alavelave, na aga’i atu ai loa Mosese i le falema’i e siaki le Tama na a’afia pe ua i ai se suiga, peita’i na fa’ateia o ia ina ua taunu’u atu, ae fa’ailoa ane e le foma’i ia Dr. Poretesano, ua maliu le Tama na a’afia, e mafua mai i le tele ma le tuga o manu’a sa a’afia ai lona ulu ma ona foliga.

 

O lo o tumau pea tuutuuga o lo o tatala ai Galea’i i tua mai le toese i Tafuna, i le mae’a ai lea ona ia totogi o le tupe e $2,500 na fa’atulaga e tatala ai o ia i tua.

 

E le o se taimi muamua lenei ua a’afia ai Galea’i i le tulafono. O le tausaga e 2014 na fa’asala ai o ia e le fa’amasinoga i le salatupe e $1,000, e mafua mai ina ua ta’usala o ia i le moliaga mama o lona fesoasoani lea i le fa’atinoina o le solitulafono o le umia fa’asolitulafono o fualaau fa’asaina o le aisa ma le mariuana.

 

O lea fa’asalaga na mafua mai i le fa’alavelave lea na tula’i mai i le 2012, ina ua alu Galea’i e piki mai se afifi na aumai i le Falemeli i Fagatogo, ae maua ai i totonu o le meli vaega o fualaau fa’asaina o le aisa ma le mariuana. Ina ua fesiligia e Leoleo ia Galea’i poo ai e ana le afifi na aumai i le meli, na tali le ua molia, o le afifi a lona uncle, peita’i na musu o ia e fa’ailoa i Leoleo le igoa o lona uncle.