Ads by Google Ads by Google

Tele polokalame e agava’a ai Fitafita Tuai e le o maua i AS


Le Faatonusili o le Ofisa mo Fitafita Tuai a le malo, ia Rosie Fualaau Tago-Lancaster i le taimi na molimau ai i luma o le maota o sui i le taeao ananafi. [ata AF]
ausage@samoanews.com

Na manino i le molimau a le Fa’atonusili o le Ofisa o Fitafita Tuai a le malo ia Rosie Fualaau Tago-Lancaster i luma o le maota o sui i le taeao ananafi, e tele naua polokalame mo fitafita tuai o lo o maua i setete uma e 50 o Amerika, e le o mafai ona maua i Amerika Samoa nei.

 

O ni isi o ia auaunaga e aofia ai tulaga o tautua i le falema’i, ma ua tatau ai ona moomia se falema’i fou mo fitafita tuai i Amerika Samoa nei, ina ia mafai ai ona agava’a i latou i polokalame uma nei o lo o agava’a ai fitafita tuai uma i isi setete o Amerika.

 

O le fesili la pe fa’apefea ona maua e fitafita tuai a Amerika Samoa polokalame eseese uma nei, na taua ai e Tago-Lancaster le tatau lea ona galulue fa’atasi le malo ina ia saili se auala e mafai ai ona aumai i le atunu’u nei polokalame.

 

O le iloiloga e pei ona fa’atautaia i le taeao ananafi a le maota o sui ma le tamaita’i Fa’atonu, na talosagaina e le afioga i le ali’i faipule ia Vesi Talalelei Fautanu Jr, ina ia fa’amanino ai e le tama’ita’i Fa’atonu auala e mafai ona fesoasoani ai lona Ofisa i fitafita tuai a le atunu’u o lo o autova’a atu i Hawaii mo talavai, atoa ai ma isi auaunaga e fa’atatau i lo latou soifua maloloina.

 

Na manino i le saunoaga a Vesi, o ia fo’i lea na taitaia le iloiloga, o le ulua’i taimi lenei ua valaaulia ai e le Fono Faitulafono se sui mai le Ofisa o Fitafita Tuai a le malo e oo atu latou te fetufaa’i ma fa’asoa i mataupu e fa’aleleia ai le tautua mo fitafita tuai.

 

O le fa’afitauli e pei ona saunoa le afioga a Vesi, e le o i ai se vaega tupe o fa’atino ai le auaunaga a le Ofisa mo fitafita tuai, sei vagana ai le tupe lea ua faapaketi e totogi ai tagata faigaluega.

 

Na talosagaina e le afioga i le ali’i faipule ia Gafatasi Afalava le tama’ita’i Fa’atonu, ina ia silasila i se auala e mafai ai ona fesoasoani i fitafita tuai i taimi o feoaiga mo talavai ma isi tulaga faapena i le atunu’u, ina ia i ai se Van e momoli ai i latou i le falema’i ma toe ave i o latou aiga.

 

Na fesili le afioga i le tamaitai faipule ia Vui Florence Saulo pe aisea e le maua mai ai se vaega tupe mai le feterale e fesoasoani ai i le ofisa a fitafita tuai, ae na saunoa le Fa’atonsili, e mafai ona maua lea fesoasoani pe afai ae galulue i ai le malo ma le Ofisa e saili se fautuaga mai le ofisa o le Initeria, poo i latou o lo o auala mai ai alagatupe.

 

Na taua e le afioga i le ali’i faipule ia Fagaoatua D. Salave’a e fa’apea, e tatau i le malo poo le fono ona fa’atulaga se tulafono ina ia maua ai e fitafita tuai fa’amanuiaga mai soo se auaunaga latou te moomia (discount).

 

Sa ia fa’afetaia fitafita tuai uma e tusa ai o le latou tautua i le malo o Amerika, faapea ai ma le malo o Amerika Samoa.

 

Saunoa le tama’ita’i Faatonu e fa’apea, o lo o mafai lava e le Ofisa ona ofo atu la latou fesoasoani i le to’atele o fitafita tuai e sulu atu i le Ofisa, e le gata o fitafita tuai i Amerika Samoa nei, ae faapena foi ma Samoa.

 

E silia i le 3,300 le aofa’i o fitafita tuai ua mae’a ona lesitalaina i le atunu’u i le taimi nei, e pei ona fa’amaonia e Tago-Lancaster i lana molimau.

 

O se tasi o moemitiga tupito i le taimi nei, o le faia lea o ni talanoaga ma le Initeria mo se alaga tupe e fausia ai se falema’i mo fitafita tuai, ina ia mautinoa e lelei auaunaga tau falema’i latou te maua.

 

Saunoa atili le tama’ita’i Faatonusili e fa’apea, e tutusa uma lava penefiti e agava’a ai fitafita tuai uma i lalo o le fu’a a Amerika, poo fea lava e nofo ma aumai ai le fitafita tuai, e tasi lava le tulafono o lo o pupuia ai i latou.