Ads by Google Ads by Google

Tatala vaiaso fa'amanatuga 30 tausaga Hope House i Fatuoaiga


O le taua'aoina o le Iugafono Malilie Fa'atasi a le Fono Faitulafono, e taualoa ai le tautua ma le aoga o le Hope House i le atunu'u. O le tina o le atunu'u, Cynthia Malala Moliga sa ia taua'aoina i le afioga Epikopo Peter Brown o le Pule'aga Samoa Pago Pago. [ata: Leua Aiono Frost]

Le ma'a fa'ailo o le atoaga o le 30 tausaga o le Hope House i Fatuoaiga ua maea saunia e le Komiti Fa'afoe ma ua fa'apa'iaina i le sauniga na tatala ai le vaiaso fiafia e fa'ailo ai le auaunaga ua au a lea nofoaga i le Fatuoaiga. [ata: Leua Aiono Frost]

O le sauniga lotu i le aso Sa ua te’a sa tatala aloaia ai le vaisao e fa'amanatu ai 30 tausaga o le Hope House, na ta'ita'ia e le afioga Epikopo Peter Brown ma le pa'ia o le Aufaigaluega totofi a le Ekalesia Katoliko i le latou Malumalu o le Aiga Pa'ia i Fatuoaiga.

 

I le sauniga sa momoli taulaga ai le Tina o le atunu'u, Cynthia Malala Moliga ma le vasega lava o tina masani o le Ekalesia i Fatuoaiga. O le Lauga sa fofogaina e Epikopo Peter Brown lea sa ia aumaia ai le fe'au mai le Tusi Pa'ia, "O le malo e Lagi e tusa lea ma le Matai sa alu atu e saili lana aufaigaluega e galueaina lona tovine..."

 

"O le galuega e le tatau ona tu'u, e tatau ona faia i so'o se itula e mana'omia ai. E tofu fo'i le tagata ma le taimi e vala'aulia ai mo le galuega, ae tasi lava le taui. E tutusa le taui i le leva ona faigaluega mai ma le tagata fo'i na fa'ato'a fa'afaigaluega i le toe itula o mana'omia ai le galuega ia faia. E o'o ina muamua e na mulimuli, ae mulimuli e na muamua."

 

"I le galuega a le Atua e tutusa tagata uma, e tutusa le taui, ma e tutu taito'atasi fo'i le tagata e tali i lana galuega na fai. O le galuega alofa, o le galuega e te le fa'atali mo se taui, aua e mautinoa le taui mai a le Atua. O ai na te iloa, ala o le soifuaga o lumana'i, e tele le avanoa e ono aoga ai lenei tautua i nisi o i tatou ma amata ona tino matutua ma ua mo'omia le tausiga fa'apitoa a le Hope House mo oe?"

 

Sa ia fa'afetaia le o'o mai o Sister Sheila ina ia auai i le fa'amanatuga o le 30 tausaga o lenei auaunaga aoga tele a le Hope House lea sa amatalia o le Nazareth Home. O le tofi fo'i o lo'o ia te i latou o ta'ita'i o lafu mamoe, sa tima'i lava Iesu ia Peteru, "Ia fafaga la'u lafu mamoe!" ma e fa'atolu lava ona tima'i Iesu i lena mana'oga taua.

 

O lana lauga fo'i sa tele le vaega o le fa'afetai sa ia fa'ao'o ia i latou uma sa avea ma o lo'o avea pea le Hope House ma nofoaga o lo'o foa'i i ai, e ala i tupe, o mea'ai o sapalai o mea uma e fa'aaoga i le tausiga o gasegase ae maise fo'i o fa'afiafiaga ma asiasiga ina ia fa'anofo leleia ai agaga o'otia o matua, fanau ma gasegase o lo'o tausia i lea nofoaga fa'apitoa.

 

O lana fa'afetai sa matele i Kamupani, le Malo, ma Fa'alapotopotoga Eseese i totonu o Amerika Samoa, ae masie o Aiga ma Tagata ta'ito'atasi, "Ia outou iloa, e leai se manuia o ia i matou a'o le Atua na te fa'amanuia ia te outou i le alofa ma le agalelei sa outou faia."

 

O le tala'aga o lenei Maota o Fa'amoemoega, sa mua'i fa'atuina o le Nazareth Home ma sa amatalia i le tausaga 1987 a'o va'aia fa'atasi le Pule'aga i Pago Pago ma Samoa e lana afioga Katinale Pio Taofinuu, ae faigaluega ai le tama'ita'i o le Ituaiga Sa, Sisters of Nazareth lea na fa'ato'a to'ai taunu'u o latou sui iloga e amata afuafua lea galuega i Amerika Samoa i le tausaga 1985.

 

Ua le gata la ina afuafua le fa'atula'ia o se nofoaga e tausia ai tagata matutua ae ua fa'apena ona fa'atalanoa ai ma le amataga o se nofoaga e tausia fa'apitoa ai fanau iti i aso ta'itasi. Lea fo’i ua aofia ai le Nofoaga e aoao ai fanau Fatuoaiga Montessori.

 

Peita'i, a'o le'i o'o ina tatala lea tautua mo fanauiti, ae toe maua mai le isi soso'oga o tautua a fanauiti e ala i Day Care ma ua toe fa'aofi atu ai fo'i ma lena tautua i le atufalega lava e tasi ua i ai fa'atasi ai ma le Hope House i le taimi nei.

 

O le oo mai o Sister Sheila mai Peretania, ina ia fa'ao'o ma fa'ailoa i tagata uma o Amerika Samoa lo latou agaga faafetai tele i le alolofa ma le lima foa'i o le atunu'u atoa ma le sapasapaia o i latou uma sa galulue faatasi i lenei nofoaga ma poloketi sa fa'aofi i ai, lea ua fa'aauau pea lava e o'o mai i le aso, nei tautua aoga.

 

"E ala ona tumau se auaunaga po'o se galuega tautua, ona o le lima foa'i o tagata lautele, kamupani ma fa'alapotopotoga ae maise le Malo, aua o lo'o fa'aolaola pea le auaunaga lenei ona o foa'i o fa'atupe ai." O se isi lea fua sa saunoa i ai le tama'ita'i Sa, i se talanoaga ma ia.

 

Na fa'alauiloa e Sister Sheila le galuega mai le amataga, ina ua faia le fa'aiuga a Epikopo Quinn Weitzel e lafo le galuega i le Domnican Sisters mai Filipaina e fa'aauauina ona ua to'agaogao atu lava le aofaiga o Tama'ita'i Sa mai le Nazareth Sisters iinei, sa tu'u ese ai loa ae toe taliu Sheila ma isi o i latou i o latou tofiga fou i fafo e galulue ai. O le tausaga e 2009 na tu'ua ai e le toe sui mai le Sisiters of Nazareth le atunu’u.

 

I le sauniga lava i le aso Sa, na fa'ailo ai le ma'a o le galuega sa tapena i ai Epikopo Peter Brown ma le Komiti Fa'afoe a le Hope House. O lea ma'a ua i ai le ata o le na moe manatunatu i mea lelei ma sa ia talosaga fo'i mo Tama'ita'i Sa o le Sisiters of Nazareth ina ia latou uluai tatalaina lea tautua, Le afioga Katinale Pio Taofinu'u!

 

Sa tutula'i le Failautusi a le Maota o Sui ia Fialupe Fiaui Lutu e tolaulauina le Iugafono malilie fa'atasi a le Fono Faitulafono e taualoa ai le auaunaga ma le tautua a le Hope House i totonu o le atunu'u e ala i le tausiga fa'apitoa o Tama ma Tina matutua, fanau ua i ai mana'oga fa'apitoa tau le tino ma le mafaufau, ae mise o fanauiti ua po'ia i gasegase tumau.

 

O pese ma vi'iga o le sauniga lotu fa'apitoa sa feauaua'i ai aufaipese tetele a le Ekalesia Katoliko sa tofia fa'apitoa e fa, fa'atasi ai ma le pese mulimuli lava sa fofogaina lea e le aufaipese o tagata faigaluega uma i le Hope House.