Ads by Google Ads by Google

Tatala i lalo le maota fono tuai ua silia 40 tausaga le matua


Se vaaiga i le nofoaga sa i ai le maota fono tuai a le atunu’u, lea ua mae’a ona tatala i lalo, mo le fa’amoemoe e toe fausia ai le maota fono fou. [ata AF]
ausage@samoanews.com

O le fa’aiuga o le vaiaso na te’a nei na tatalaina ai i lalo le maota fono tuai a le atunu’u ua silia i le 40 tausaga lona matua, ma le fa’amoemoe e sauniuni ai mo le fausiaina o le maota fono fou i se taimi e le o toe mamao.

 

O le kamupani faufale a le Paramount Builders lea o lo o fa’atinoina le galuega mo le tatalaina lea i lalo o le maota fono tuai, ina ua manumalo i latou i le tauofoga sa tausinio ai ma isi kamupani e 5 i le atunu’u.

 

E silia i le $130,000 le tau o le galuega lea o lo o fa’atinoina nei e le kamupani a le Paramount Builders, e pei ona fa’amaonia mai e le Fa’atonusili o le Ofisa o Oloa a le malo, le tama’ita’i foma’i ia Dr. Oreta Crichton i le Samoa News i le vaiaso na te’a nei.

 

O kamupani sa tausinio ma le Paramount i le tauofoga e aofia ai Tony’s Construction, RM Construction, E&W Construction, Happy Trucking ma le Hollister General Services.

 

O le masina o Me na amata mai galuega mo le tatalaina i lalo o ni isi o vaega o le maota fono, e aofia ai ma le tapena ese o Ofisa a afioga i Senatoa ma Faipule, e sauni au mo le tatala aloaiaina i lalo o lenei galuega.

 

E pei ona fa’amaonia mai e le Fofoga Fetalai o le maota o sui, tofa Savali Talavou Ale i le Samoa News, o le a faia se sauniga lotu ao lumana’i ai le tatalaina i lalo o le maota fono tuai, peita’i na fa’amaonia mai e ni isi o le aufaigaluega a le Fono sa i ai i le tatalaina i lalo o le galuega i le aso Toona’i na te’a nei, e le i mafai ona fa’ataunu’uina lea fuafuaga.

 

O lo o i ai pea i fafo le Fofoga Fetalai, ma le fa’amoemoe o le po nanei e toe taliu mai ai i le atunu’u.

 

O se tasi lenei o moemitiga ua leva ona taula’i i ai le silasila mamao a ta’ita’i o le Fono, o le fausiaina lea o se maota fono fou a le atunu’u, e sui tulaga i le maota fono tuai lenei, lea sa fa’aulufale i le tausaga e 1973.

 

O lenei galuega o lo o fa’atupe i se vaega tupe mai le aitalafu o le Pone a le malo, i lona aofaiga e $1.5 miliona.

 

Talu ai galuega mo le fausiaina o se maota fono fou, ua mafua ai ona suia nofoaga ua fa’ataunu’u ai galuega a maota ta’itasi. O galuega fa’atino a le Senate o lo o latou fa’aaogaina ai le Fale Samoa a le Fono, ae o le maota o sui o lo o latou fa’aaogaina ai le fale i le itu i sasa’e o le Fale Laumei i Utulei.

 

O le kamupani a le Paramount Builders, o i latou fo’i ia sa fa’atinoina galuega mo le toe fa’afouina o le Fale Samoa a le Fono Faitulafono, lea e silia i le afa miliona, o se galuega sa tele ai fesili a le atunu’u ona e le i faia se tauofoga.

 

E le o mautu mai i le taimi nei po o fea tonu le aso e amata aloaia ai le galuega mo le fausiaina o le maota fono fou.