Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

SOLOMONA TEOFILO

 

O le ali’i e 56 tausaga le matua lea na tu’uaia e le malo i le moliaga mamafa o lona umia fa’asolitulafono o se a’upega, e mafua mai i le fa’alavelave na ia tu’uina ai se tama’i naifi i le ua o lona sister-in-law ma ia folafola i ai lona fasiotiina o ia, ua fa’atulaga e le fa’amasinoga le aso 1 Setema e tu’u atu ai lana fa’asalaga, i le mae’a ai lea ona talia e le fa’amasinoga maualuga o lana tali ioe i le moliaga lea ua ta’usala ai o ia.

 

Mai mataupu tau solitulafono e 2 na faila e le malo fa’asaga ia Solomona Teofilo, e 6 moliaga na tu’uaia ai o ia e le malo, ma o ia moliaga e aofia ai moliaga mamafa e 3 o lona fa’aaoga fa’asolitulafono o se aupega, fa’apea ai moliaga mama e 3 e aofia ai le fa’aoolima i le tulaga tolu, ma moliaga e 2 o le fa’atupu vevesi i nofoaga faitele.

 

I lalo o se maliliega na sainia e le malo ma Teofilo lea fo’i ua talia e le fa’amasinoga, na malie ai le ua molia e tali ioe i le moliaga mamafa e tasi o lona fa’aaoga fa’asolitulafono lea o se a’upega, ae solofua moliaga uma o lo o totoe ai i le pepa o tagi sa latou fa’aulu fa’asaga ia te ia.

 

I le tali ioe ai o Teofilo i le moliaga e pei ona ta’usala ai o ia, sa ia ta’utino ai e fa’apea, i se taimi o le aso 8 Setema 2016, sa tula’i mai ai se taugaupu i le va o ia ma lona sister-in-law na a’afia, e mafua mai i se ta’avale sa ia mana’o e fa’aaoga.

 

Ina ua fai fai tetele le vevesi i le taimi o le la taugaupu, na ia tago ai loa i se tama’i naifi fai meaai ma tu’u i le ua o le tama’ita’i na a’afia, ma folafola i ai lona fasiotia o ia.

 

O se tasi o tuutuuga o le maliliega a le malo ma Teofilo, e aofia ai le malie o le malo e lava masina e 6 e tuli e le ua molia i le toese, a mae’a, ona ia tuua lea o le atunu’u ae toe fo’i atu i fafo i le atunu’u o lo o nofo ai.

 

O lo o taofia pea Teofilo i le toese i Tafuna e fa’atali ai le aso lea ua fa’atulaga e lau ai lana fa’asalaga. O le ali’i loia ia Jedediah Bigelow o lo o tula’i mo le malo i lenei mataupu, ae o le ali’i loia fautua ia Douglas Fiaui o lo o avea ma loia fautua mo Teofilo.

 

VINCENT VILIAMU

 

O le ali’i lea na ta’usala e le fa’amasinoga fa’aitumalo i le moliaga o le faaoolima i le tulaga tolu, e mafua mai i le fa’alavelave lea na ia tu’iina ai se ali’i na ia lafo ni upu mataga i lana fanau, ua nofovaavaaia o ia mo le 12 masina i lalo o tuutuuga e ao ona ia usita’i i ai.

 

O ni isi o ia tuutuuga e aofia ai le faasa lea ona ia toe tagofia le ‘ava malosi, fa’asa ona ia toe soli se tulafono, a ia avea o ia ma tagatanu’u e tausisi i tulafono a le malo i taimi uma. Ua poloaina fo’i o ia e fa’atoese i le ali’i na a’afia ao molimauina e se sui o le Ofisa Fa’anofovaavaaia, ma ia auai i aoaoga fa’a faufautua e fesoasoani ai i le tulaga o le ita.

 

Na fa’atoese Vilimau i le toese e tusa ai o lana solitulafono sa faia, ma ia talosagaina ai se avanoa e fa’aauau ai pea ona faigaluega e tausi lona aiga. Sa ia faatoese foi i le ali’i na a’afia ina ia fa’amagalo sona sese i lo la va.

 

E pei ona manino i faafinauga a loia le mae’a lea ona toe fa’alelei le va o ali’i e to’alua, ma ua talia fo’i e le ali’i na a’afia le fa’atoesega a le ua molia.

 

Saunoa le afioga i le ali’i fa’amasino ia Fiti Sunia e fa’apea, e laki e lei matuia tele le tulaga na oo i ai le fa’alavelave, semanu e ono oo atu i le tulaga o le manu’a tuga ai o se tagata poo le ma’imau ai fo’i o se soifua o se isi, e mafua mai i le le mafai ona fa’atonutonu o le ita.