Ads by Google Ads by Google

Tala otooto o Fa’amasinoga

ausage@samoanews.com

TOE FA’AFO’I I SAMOA LE ALI’I LE USITA’I

 

O le ali’i mai Samoa lea ua fa’a 6 ona tula’i i luma o le Fa’amasinoga ona o tu’uaiga i solitulafono eseese na tu’uaia ma ta’usala ai o ia, ua poloaina e le fa’amasinoga maualuga i le vaiaso nei lona tuua o le teritori ae toe fo’i atu i Samoa, pe a mae’a ona tuli lana fa’asalaga fa’a falepuipui e 20 masina i le toese i Tafuna.

 

E 5 tausaga lea ua fa’anofovaavaaia ai le ali’i o Sivanila Tauinaola, ina ua ta’usala o ia e le fa’amasinoga maualuga i le moliaga mamafa o lona umia fa’asolitulafono lea o vaega o le laau fa’asaina o le mariuana.

 

E 5 tausaga na manatu le fa’amasinoga e taofia moi ai lava Tauinaola i le falepuipui, ae i le mae’a ai ona fa’afofoga o le fa’amasinoga i fa’afinauga a loia atoa ai ma le fa’atoesega a le ua molia, na manatu ai loa ali’i Fa’amasino o le a fa’amalumalu le tuliina o le 5 tausaga i le toese, ae o le a fa’anofovaavaaia ai o ia mo le 5 tausaga i lalo o tuutuuga e ao ona ia usita’i i ai.

 

O ni isi o ia tuutuuga e aofia ai lona tuliina o masina e 20 i le toese, a mae’a, ona ia tuua lea o le teritori ae toe fo’i atu i lona atunu’u na sau ai, ma nofomau ai mo le taimi atoa o lana fa’anofovaavaaia.

 

O le fa’alavelave e pei ona ta’usala ai e le fa’amasinoga ia Tauinaola, na alia’e mai i le masina o Aperila o le tausaga nei, ina ua taofia faapagota e Leoleo o ia ona o tu’uaiga i lona ‘ona ma fa’atino ni gaioiga e save’u ai le nonofo filemu o tagata lautele, ae maua ai e Leoleo ma se sikaleti mariuana i le taga o lona ofu i le taimi na sailia ai lona tino, ma mafua ai loa ona molia o ia i le moliaga mamafa e pei ona ta’usala ai o ia.

 

Na fa’atoese le ua molia e tusa ai o lana solitulafono sa fai, ma ia talosagaina ai se isi avanoa mo ia e toe fo’i atu ai i tua e saili sana galuega e fesoasoani ai i le tausiga o lona aiga ma ona matua. Sa ia ta’utino fo’i i le fa’amasinoga, ua lagona lona salamo mai lana solitulafono sa faia.

 

Na talosaga lana loia ia Douglas Fiaui ina ia tuu atu se fa’asalaga fa’anofovaavaaia mo le ua molia, ma se fa’asalaga fa’a falepuipui mama e aofia ai masina e 5 lea ua mae’a ona ia tuliina i le toese.

 

Ae ina ua fa’ailoa e le loia a le malo ia Kristy Dunn le leai o se fa’afinauga a le malo e uiga i se fa’asalaga mo Tauinaola, ae taoto atu pea i se finagalo o le fa’amasinoga, na fesili ai loa le ali’i fa’amasino sili ia Michael Kruse, poo le mea e le popole le malo i le fa’atele ona molia ma ta’usala o lenei ali’i i luma o le fa’amasinoga, ona o tu’uaiga i le ‘ona ma le fa’atupu veveesi nofoaga faitele.

 

Saunoa atili Kruse e fa’apea, o le fa’a 6 ai lenei ona tula’i mo Tauinaola i luma o le fa’amasinoga mo le tu’uina atu o lana fa’asalaga, e mafua mai i solitulafono eseese sa ta’usala ai o ia, ma o ia taimi auma e aofia ai lava le ‘ava malosi.

 

Sa ia taua atili fo’i e fa’apea, o le fa’alavelave mulimuli e pei ona ta’usala ai le ua molia e le fa’amasinoga, na mafua mai ina ua taofia o ia e Leoleo i le solitulafono mama ae maua ai ma fualaau fa’asaina i lona tino.

 

“Ua tele avanoa sa tu’uina atu e le fa’amasinoga ia te ia, ae foliga mai e le o i ai lava se aoga o ia avanoa mo oe, pau la le fa’aiuga a le fa’amasinoga o le tu’uina atu lea o se fa’asalaga fa’a falepuipui mamafa e a’oa’iina ai lou mafaufau, ae talu ai o le tulaga tumu ua i ai le toese i Tafuna, pau lena o le mafua’aga ua toe liliu ai se fa’aiuga a le fa’amasinoga”, o le saunoaga lea a Kruse ma poloaina loa ia Tauinaola ina ia taofia mo le toese mo le 20 masina, a mae’a, ona ia tuua loa lea o le atunu’u ae toe fo’i atu i Samoa.

 

ALOFA LETULI & OLAFOU WILSON

 

Ua taoto atu nei i se fa’aiuga a le Fa’amasinoga Maualuga le talosaga a le ali’i loia fautua sa avea ma loia a Alofa Letuli ma Olafou Wilson, ina ia talia lana talosaga e le toe avea ai o ia ma loia fautua a i laua ua molia, ona o ni isi o mafua’aga ua atagia mai ai le fete’ena’i fa’aletulafono o lona fa’atinoina o lea galuega.

 

O Letuli ma Wilson, o isi ia Leoleo sa galulue i le Falepuipui o Tamaiti i Tafuna e to’a 5 i ai i latou ua taofia ma molia e le malo, i le fa’alavelave lea o lo o tu’uaia na alia’e mai i le tausaga na te’a nei, i le tu’uina atu lea o fualaau fa’asaina i fanau laiti atoa ai ma le faia o isi gaioiga e le tusa ai ma ala o le tulafono fa’asaga i fanau laiti, a o taofia ai i latou i totonu o le falepuipui.

 

Na taua e le ali’i loia fautua ia Michael White e fa’apea, ina ua fa’atoa tu’uina atu ia te ia fa’amaumauga uma e uiga i lenei mataupu, aemaise ai lona tula’i mo Letuli ma Wilson, sa maua ai loa le avanoa na te faitauina ai fa’amatalaga uma mai le itu a le malo e uiga i lenei mataupu, e aofia ai ma igoa o molimau aemaise lava i latou o lo o tu’uaia sa a’afia i lenei mataupu, poo fanau laiti ia sa taofia i le falepuipui i le taimi na tula’i mai ai lenei fa’alavelave.

 

O le to’atele o fanau laiti o lo o a’afia i lenei mataupu, o i latou ia sa ia tula’i ai i le taimi o a latou fa’amasinoga, ma ua atagia mai ai le tula’i mai ai o se fete’enaiga pe afai e tula’i mo Letuli ma Wilson, o i latou ia o lo o tu’uaia e le malo fa’atasi ai ma isi Leoleo i le faia lea o uiga fa’asolitulafono fa’asaga i fanau laiti sa ia tauaveina muamua a latou mataupu.

 

Na talosaga White i le fa’amasinoga maualuga ina ia talia lana talosaga, ae maua ai le avanoa e saili ai e le fa’amasinoga ni isi Loia e tula’i mo i laua o lo o molia.

 

Ua toe taofia nei Letuli ma Wilson i le falepuipui i Tafuna e fa’atali ai le aso lea ua fa’atulaga e toe fofogaina ai le la mataupu, a o fa’atali ai se fa’aiuga mai le fa’amasinoga maualuga e tusa ai o le talosaga a le ali’i loia ia White.