Ads by Google Ads by Google

Tala otooto o Fa’amasinoga

ausage@samoanews.com

SILIA TO’A 10 NA TAOFIA E LEOLEO I LE FA’AIUGA O LE VAIASO

 

E silia i le to’a 10 i latou na taofia e Leoleo i le fa’aiuga o le vaiaso na te’a nei, e mafua mai i ni fa’alavelave na alia’e mai i le fa’aiuga o le vaiaso sa a’afia ai i latou nei. Mai le to’a 14 na taofia e Leoleo i le fa’aiuga o le vaiaso, o le to’a 10 o i latou o lo o tu’uaia i le moliaga o le fa’atupu vevesi i nofoaga faitele atoa ai ma le fa’atupu misa, e to’alua ua tu’uaia i le fa’atupuina o vevesi i totonu o le aiga e aofia ai ma le fa’ao’olima i o la ta’ito’alua, ma isi ali’i e to’alua ua tu’uaia i lo la le usitaia o tuutuuga o la fa’anofovaavaaia.

 

O se misa na tula’i mai i Se’etaga i le po o le aso Faraile na te’a nei, na mafua ai ona taofia fa’apagota e Leoleo ni isi e to’alima, ma tu’uaia i moliaga mama eseese e aofia ai le fa’atupu vevesi i nofoaga faitele, fa’ao’olima i le tulaga tolu, fa’aleaga meatotino i le tulaga tolu, atoa ai ma le tu fua i le fanua po o le fale o le isi aiga.

 

E pei ona taua i fa’amaumauga a le fa’amasinoga e fa’apea, pe tusa o le itula e 9:00 i le po o le aso Faraile na te’a nei, na talosagaina ai ni isi mai le afioaga i Se’etaga le Ofisa o Leoleo i Leone mo se fesoasoani, ina ua tauai e se vaega to’atele o tagata se fale o se aiga ma fa’aleagaina ai meatotino a lea aiga, atoa ai ma ni isi na manunu’a ai.

 

Na taua e le aiga na a’afia i Leoleo e fa’apea, e fetaui loa le mae’a o le latou faigalotu i lea afiafi ae latou fa’alogoina loa le toulu o ma’a i luga o apa o le fale, ae o isi ma’a na ui mai i le vaega o loo i ai le umukuka ma fa’aleagaina ai tioata ma ni isi o meatotino.

 

O ni isi e to’alua na tu’uaia e le malo i lenei e aofia ai Lolesio Mikaele ma Siaosi Makesi, lea o lo o tu’uaia i le moliaga o le fa’atupu vevesi i nofoaga faitele.

 

O ni isi o tuutuuga na tu’uina atu e le afioga i le tama’ita’i fa’amasino le tumau ia Gwen Tauiliili-Langkilde e aofia ai le fa’asa lea ona la toe fa’atupuina se vevesi i le va o i laua ma le aiga na a’afia, a ia tausi le filemu i totonu o le nu’u i taimi uma.

 

Ua poloaina fo’i le fa’asa lea ona la toe taumafai e fa’afeso’ota’i molimau a le malo o lo o taua i fa’amaumauga a le fa’amasinoga, po o le taumafai fo’i e toe o i le fale o le aiga na a’afia.

 

BRIAN BENJAMIN LOMA

 

I le lata ai i le 2 tausaga o fa’agasolo mai pea le mataupu a Brian Benjamin Loma i luma o le fa’amasinoga, e mafua mai i le tagi sa faila e le malo fa’asaga ia te ia talu mai le masina o Setema 2015, ona o tu’uaiga i lona umia fa’asolitulafono lea o vaega o le laau fa’asaina o le mariuana, o le aso Faraile nei lea ua fa’amoemoe e fofogaina ai i luma o le fa’amasinoga maualuga le talosaga a le malo, ina ia solofua le tagi sa latou fa’aulu fa’asaga ia Loma.

 

O le iloiloga a Loma lea na faia i luma o le fa’amasinoga maualuga i le masina na te’a nei, na poloaina ai o ia e le fa’amasino sili ia Michael Kruse ina ia oo mai i le vaiaso nei ua maua se loia e tula’i mo ia, ona o lea ua tuua e lana loia ia Mark Ude le atunu’u, ae ua tatau ona fa’agasolo taualumaga o lana mataupu.

 

O le masina o Setema 2015 ina ua ulufale mai Loma i le va’alele o le Hawaiian Air, na masalomia ai e ta’ifau o le K-9 a le Ofisa o Tiute lona tauaveina o vaega o fualaau fa’asaina, ma mafua ai ona mana’omia le sailia o meatotino sa malaga mai ma ia, ae ina ua mae’a ona faia se suega i ni isi o meatotino na malaga mai ma Loma, ma fa’amaonia ai le i ai i totonu o ia meatotino o le vailaau o loo maua i le laau fa’asaina o le mariuana.

 

O le masina o Iulai 2016 na faia ai se iloiloga fa’apitoa i luma o le afioga i le Fa’amasili Sili lagolago ia Lyle L. Richmond, e iloilo ai mau ua sauni le malo e tu’uina atu i le taimi o le fa’amasinoga autu.

 

I le mae’a ai o lea iloiloga, na poloaina ai loa e Richmond le taoto atu o le mataupu i se fa’aiuga a le fa’amasinoga, ma, talu mai lava le masina o Iulai o le tausaga na te’a nei, e lei toe iloiloina lava le mataupu a Loma i luma o le fa’amasinoga seia oo mai i le masina na te’a nei, ma maua ai loa le avanoa o le afioga i le fa’amasino sili ia Kruse na te iloiloina ai fa’amatalaga uma e uiga i lenei mataupu, ma poloaina ai loa Loma e saili sana loia e fautuaina o ia i le isi ana iloiloga o le a sosoo ai nei, o le aso Faraile lea o le vaiaso nei.

 

O lo o tumau pea tuutuuga o lo o tatala ai Loma i tua e fa’atali ai le iloiloga lea ua fa’atulaga i le aso Faraile o le vaiaso nei, lea ua fa’amoemoe le malo latou te talosagaina ai le fa’amasinoga ina ia solofua le tagi sa latou fa’aulu fa’asaga ia te ia.

 

O lo o tu’uaia e le malo ia Loma i le moliaga mamafa e tasi, o lona umia fa’asolitulafono lea o vaega o le laau fa’asaina o le mariuana. O lea moliaga na mafua mai ina ua maua i oloa na malaga mai ma ia e pei o lole ma mea suamalie le vailaau o lo o maua i totonu o le mariuana.

 

WAYNE TOOMATA

 

E 12 masina lea ua fa’anofovaavaaia ai e le fa’amasinoga fa’aitumalo le ali’i o Wayne Toomata, e mafua mai ina ua ta’usala o ia i le moliaga mama o le fa’aoolima i le tulaga tolu, e mafua mai i le fa’alavelave lea na ia tu’iina ai foliga o se ali’i sa latou inupia ma pau ai i lalo o ia, ma mafua ai ona manu’a lona ulu i se pito sima.

 

O ni isi o tuutuuga o le nofovaavaaia a Toomata ua tu’uina atu e le fa’amasinoga fa’aitumalo, e aofia ai le fa’asa lea ona ia toe tagofia le ‘ava malosi i totonu o le 12 masina o lana nofovaavaaia, fa’asa ona ia toe fa’afesootai le ali’i na manu’a i lana gaioiga, totogi le salatupe e $250, atoa ai ma le avea lea o ia ma tagatanu’u lelei e tausisi i tulafono a le malo i soo se taimi.

 

E 30 aso na manatu le fa’amasinoga e taofia ai le ua molia i le toese, peita’i o le a fa’amalumalu lona tuliina o ia aso, fuafua lava i lona usitaia o isi tuutuuga o lana nofovaavaaia.