Ads by Google Ads by Google

Tala otooto o Fa’amasinoga

ausage@samoanews.com

MOLIA SE ALI’I FA’AOOLIMA I LANA UO TAMA’ITA’I

 

E 4 moliaga mama ua molia ai e le malo o Amerika Samoa se ali’i e 27 tausaga le matua mai Tafuna, e mafua mai i le fa’alavelave lea ua tu’uaia ai o ia i lona fa’ao’olima lea i lana uo tama’ita’i.

 

O moliaga ua faila fa’asaga ia Aveia Levasa e aofia ai le moliaga e 3 o le faaoolima i le tulaga tolu, fa’apea ai ma le fa’atupu vevesi i totonu o lona aiga. O lo o tu’uaia e le malo ia Levasa i lona fa’aoolima i lana uo tama’ita’i, sosoo atu ai ma le fa’ao’olima i lona tausoga na alu atu e tau fa’afilemu le vevesi, atoa ai ma le isi moliaga o le faaoolima e mafua mai i lona togiiina o lona uncle i le nofoa.

 

O aiga tuaoi sa latou molimauina le vevesi na fa’afesootaiina le ofisa o Leoleo i Tafuna mo se fesoasoani, ma aga’i atu ai loa Leoleo e tali i le valaau. Na taua i fa’amaumauga a le fa’amasinoga e fa’apea, na ona vaai atu lava o Levasa ua taunu’u ta’avale a Leoleo, tu’u loa ma ana gaioiga o lo o fai ae savali sa’o atu loa ma tatala le faitoto’a o le ta’avale a Leoleo ma taumafai e ulufale i totonu.

 

Na taumafai Leoleo e fesiligia le ua molia ae na ia faailoa i ai, o ia lea o Levasa ua mafua ai ona o atu Leoleo i le latou aiga.

 

Na teena e le ua molia tu’uaiga fa’asaga ia te ia ina ua tula’i i luma o le Fa’amasinoga Fa’aitumalo i le vaiaso nei. I lona teena ai o tu’uaiga a le fa’amasinoga fa’asaga ia te ia, ua fa’atulaga ai loa e le fa’amasinoga le isi ana iloiloga e faia lea i le masina fou o Me.

 

E $500 na tupe na ulua’i fa’atulaga e le fa’amasinoga e tatala ai le ua molia i tua, ae i le mae’a ai ona finauina o lea mataupu e loia, na finagalo ai loa le Fa’amasinoga ina ia fa’aitiitia i le $300.

 

Afai ae mafai e Levasa ona totogi le tupe e pei ona fa’atulaga e tatala ai o ia i tua, ua poloaina o ia e aua ne’i ona toe taumafai e fa’afesoota’i lana uo tama’ita’i na a’afia, poo se isi fo’i o molimau a le malo o lo o aafia i lenei mataupu.

 

Ua fa’asa ona ia toe taumafai e alu i le fale o le tama’ita’i na a’afia, pe taumafai fo’i i soo se auala lava e fa’afesootai o ia poo nisi o lona aiga.

 

Ua toe taofia nei Levasa i le toese i Tafuna e fa’atali ai le taimi e mafai ai ona ia totogi le tupe ua fa’atulaga e tatala ai o ia i tua.

 

TU’UAIA NI ALI’I TALAVOU I LE FA’AOOLIMA MA LE TALEPE FALE

 

O ali’i talavou e to’alua ia o lo o tu’uaia sa la fa’aoolima i se Tama e 54 tausaga le matua ma taumafai e talepe lona fale ina ua musu o ia e tatala, ua la finau i le fa’amasinoga maualuga ina ia fa’atulaga loa se aso e faia ai le la fa’amasinoga autu.

 

O Avia Lomu ma Ryan Viliamu o lo o tu’uaia i moliaga mamafa ta’ilua o le fa’aoolima i le tulaga lua atoa ai ma le talepe fale i le tulaga lua. O lo o taofia pea i laua i le toese e fa’atali ai le aso e faia ai le la faamasinoga i le masina o Oketopa o le tausaga nei, ina ua le mafai ona la totogi le vaega tupe ta’i $10,000 ua fa’atulaga e tatala ai i laua i tua.

 

O le la iloiloga i le vaiaso na te’a nei na fa’ailoa ai loa e le la loia fautua ia Michael White i le fa’amasinoga e fa’apea, ua le mafai ona taunu’u a latou feutanaiga sa faia ma le malo i se maliliega aufa’atasi, ma ua talosagaina loa le fa’amasinoga ina ia fa’atulaga loa se aso e faia ai le fa’amasinoga autu o lenei mataupu.

 

O moliaga fa’asaga ia Lomu ma Viliamu na alia’e mai ina ua la faaoolima i le ali’i na a’afia, atoa ai ma le la taumafai e talepe lona fale ina ua sulu i totonu o le fale le na a’afia ae loka le faitoto’a o le fale.

 

O lo o taua fo’i i fa’amaumauga a le fa’amasinoga lo la faia o ni upu tau fa’amata’u i le na a’afia, i le susunu lea i lalo o lona fale pe afai e musu e tatala.