Ads by Google Ads by Google

Tala otooto mai le Fa’amasinoga

ausage@samoanews.com

TU’UAIA SE ALI’I TALAVOU I LE GAOI

 

E 2 moliaga mamafa ua tu’uaia ai e le malo se ali’i talavou, e mafua mai i le fa’alavelave lea na ia osofaia ai se fale i Atu’u ae ave fa’agaoi ni meatotino sa i ai e aofia ai ma se tinoitupe.

 

O moliaga ua tuuaia ai e le malo ia Melvin Eteuati e aofia ai le gaoi ma le talepe fale, o moliaga mamafa uma o le vaega D, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala foi i le fa’asalaga tupe e le silia i le $5,000.

 

I fa’amaumauga a le fa’amasinoga o lo o taua ai e fa’apea, na aga’i atu le tagata e ana le fale na osofaia ma ia maua atu ai se mitiafu o lo o ta’atia mai ai, o le mitiafu lea o le ali’i a se tasi o ana tagata faigaluega.

 

Na taua e le ali’i talavou lea e 14 tausaga le matua e fa’apea, o laua ma le tagata e igoa ia Melvin Eteuati na la osofaia le fale mautotogi na a’afia, ma la gaoia ai meatotino e pei ona fesiligia. O ia meatotino e aofia ai se laptop, o ni isi o meatotino taua atoa ai ma se tinoitupe.

 

Na aga’i atu leoleo ma saili le ali’i o Eteutai, ma latou maua atu ai i se nofoaga e le mamao ma le fale na a’afia. Ina ua fesiligia o ia, sa fa’amaonia ai e Eteuati i leoleo lo le ulufale ma le ali’i talavou e 14 tausaga i totonu o le fale ma ave faagaoi meatotino sa i ai, e aunoa ma se fa’atanaga a le tagata e ana le fale.

 

Na fa’asino e le ua molia i leoleo se tama’i fale tu’ufua o lo o ia nana ai mea totino sa ia gaoia, ma mafai ai loa e leoleo ona toe fa’afoi ia meatotino.

 

E $5,000 le vaega tupe lea ua fa’atulaga e totogi ona fa’atoa mafai lea ona tatala le ali’i o Eteuati i tua, e fa’atalitali ai taualumaga o lana mataupu i luma o le fa’amasinoga.

 

SAILI PEA E LEOLEO SE TALI

 

Talu mai le fa’alavelave lea na tula’i mai i Malaeloa i le vaiaso na te’a nei, lea na maua ai le tino maliu o se tina pe tusa ma le 31 tausaga i totonu o le latou fale, o lo o fa’aauau pea i le taimi nei su’esu’ega a le Ofisa o Leoleo e uiga i lenei mataupu.

 

Saunoa le afioga i le Komesina o Leoleo ia Save Liuato Tuitele i le Samoa News e faapea, o lo o galulue malosi pea le ofisa o leoleo i le fa’amae’aina o le latou su’esu’ega e uiga i le fa’alavelave sa tupu, ma e le o mautu mai i le taimi nei le mafua’aga o lenei fa’alavelave.

 

Sa ia taua atili e fa’apea, o ripoti ua maua e leoleo o lo o taua ai e fa’apea, o le tina ua maliu o lo o masalomia sa i ai se taugaupu na tula’i mai i le la va ma lona to’alua, ma alu ai loa ua loka le potu ae nofonofo ai i totonu. O le taimi nei, o lo o soifua mai pea le Tama o le aiga ma le la fanau e to’afa.

 

I luma o le fonotaga a le Kapeneta i le vaiaso nei, na fa’ailoa ai e le afioga a Save e fa’apea, o fa’alavelave e pei ona maliliu ai ni isi o le atunu’u pe a ma le to’afa i totonu o le 3 masina, o lo o masalomia le a’afia ai o tulaga i fualaau fa’asaina o ni isi o ia mataupu.

 

Saunoa atili le komesina o leoleo e fa’apea, o lo o galulue pea le Ofisa o leoleo e saili mafua’aga o nei fa’alavelave, atoa ai ma le taumafai e saili se auala e foia ai le fa’afitauli tau fualaau fa’asaina i le atunu’u.

 

TOE AVE TA’AVALE LE ALI’I O LO O SE’I LONA LAISENE

 

O le ali’i e 45 tausaga le matua lea na sei e le fa’amasinoga fa’aitumalo lona laisene ave ta’avale mo le 2 tausaga i le tausaga na te’a nei, ua tu’uaia nei o ia i le moliaga mamafa o le ave ta’avale ao se’i lona laisene, e mafua mai i le fa’alavelave lea na maua ai o ia e leoleo o lo o ia fa’afoeina se ta’avale i luga o le auala o le malo.

 

O se isi ave ta’avale sa ia logoina leoleo i le mata’utia o le saoasaoa sa alu ai le ta’avale na ave e Onosa’i Felise, na mafua ai loa ona aga’i atu leoleo e saili le ta’avale e pei ona taua, ona sa taua ai le toeititi lava lavevea ai ni tagata i luga o le auala i Fagaalu.

 

Na fesiligia e leoleo le ali’i o Felise i le taimi na taofia ai lana ta’avale i Nuuuli e uiga i lenei mataupu, ma ioeina ai e Felise le alu saoasaoa o lana ta’avale, ona o lo o alu e piki mai lona to’alua ua manava, ae ina ua fesiligia o ia i lona laisene, na tali ai le ua molia, o lona laisene ua leiloa.

 

O su’esu’ega sa faia i le taimi lava lea a leoleo na maua ai, o lo o se’i e le fa’amasinoga le laisene ave ta’avale a Felise, e mafua mai i le fa’alavelave lea ua fa’alua ai ona ta’usala o ia i le moliaga o le ave ta’avale ‘ona.

 

I le aso na lau ai le fa’asalaga a le ua molia, sa fautuaina ai o ia e le fa’amasinoga ina ia aua ne’i ona toe fa’afoeina se ta’avale i totonu o le 2 tausaga lea ua se’i ai, afai fo’i e maua o ia o loo ia fa’afoeina se ta’avale, o le a mafai ona molia o ia e le malo i le moliaga mamafa o le ave ta’avale ae o lo o se’i le laisene, ma afai ae fa’amaonia, e fa’amalosia lona tuliina o le umi e 90 aso i le toese i Tafuna.

 

E $500 le vaega tupe lea ua totogi e le ua molia e tatala ai o ia i tua, e fa’atalitali ai le isi ana iloiloga lea ua fa’atulaga e faia i le amataga o le masina fou.

 

NOFOVAAVAAIA LE ALI’I GAOI

 

O le ali’i lea na ta’usala e le fa’amasinoga fa’aitumalo i le moliaga mama o le gaoi, e mafua mai i le fa’alavelave lea na ia gaoia ai ni meafaigaluega mai tua o se ta’avale pikiapu i Tafuna i le lua masina talu ai, ua fa’anofovaavaaia nei o ia mo le umi e 12 masina, i lalo o tuutuuga e ao ona ia usita’i i ai.

 

O ni isi o ia tuutuuga, ua fa’asa ona ia toe soli se tulafono, fa’asa ona ia toe alu i luma o le faleoloa na tula’i mai ai le fa’alavelave, fa’asa fo’i ona ia toe tagofia le ‘ava malosi i totonu o le 12 masina o lana nofovaavaaia.

 

O le fa’alavelave e pei ona nofosala ai le ali’i o Fatu Filemu, na afua mai ina ua fiu se ali’i e saili ni isi o ana mea faigaluega sa i tua o le keli o lana pikiapu, lea sa paka i luma o se faleoloa i Tafuna i le taimi na alu ai i totonu o le faleoloa e fai lana fa’atau.

 

O se alii talavou sa ia iloaina le gaioiga a Filemu sa faia, na ia logoina leoleo e uiga i le mea sa tupu, ma mafua ai loa ona fesiligia e leoleo le ua molia, lea na ia ta’utino ai e sa’o o ia na gaoia mea faigaluega, ona o lona mana’o e fa’atau atu i se isi ali’i kamuta o le latou tuaoi, ae maua mai ai se tupe e fa’atau ai a latou pia ma ana uo.

 

O le avanoa e tasi lea ua tu’u atu e le fa’amasinoga i le ali’i o Filemu, e le mafai ona ia toe mauaina, pe afai ae toe molia o ia i se isi solitulafono i totonu o le 12 masina o lana nofovaavaaia. Ua poloaina fo’i o ia na te totogi le salatupe e $125 i le fa’amasinoga.