Ads by Google Ads by Google

Tala I Vaifanua


O le laina o sasao ai le vasega tofia o ta'ita'i o le LDS i Amerika Samoa. [ata: foa'i]

O le va'aiga lea i le tumu o le fonotaga na auai vaega ta'itasi a le Ekalesia a Iesu o le Au Paia o Aso e Gata Ai i Amerika Samoa. [ata: foa'i]

O le fa'ae'ega i luga o le taualuga o le Maota Fono i Apia, Samoa. [ata: foa'i]

Fonotaga Komiti Tete'e Fuala'au ma Ta'ita'i LDS - AS

 

O le aso To'ona'i na te'a nei sa potopoto ai Ta'ita'i o le Ekalesia a Iesu o le Au Pa'ia o Aso e Gata Ai i Malaeimi, e feutagai ma le Komiti Tofia a le Kovana e Tete'e Atu i Fuala'au & Vaila'au Fa'asaina atoa ma le Inu Ava.

 

O lea aso sa atofaina ina ua fa'atagisia e le malo se fesoasoani mai Ekalesia, ina ia tutu fa'atasi tagata uma e fa'alauiloa a'afiaga tuga o le olaga e o'o i ai lotoifale i tulaga aafia i le fualaau fa’asaina.

 

O sui o le Komiti a le malo sa auai e aofia ai Laolagi F.S. Vaeao, Motusa Tuileama Nua, faatonusili o le Matagaluega o le Soifua Maloloina, fa'atonusili o le Saogalemu Fa'alotoifale Samana Veavea, Komesina o Leoleo Le'i Sonny Thompson, ma Dr. Mikaele Etuale.

 

Sa tu'ufa'atasia e le Komiti a latou folasaga e fa'ailoa ai le tuga o o'otiaga e o'o i ai so'o se tasi e tagofia fualaau fa’asaina. "O nisi e fai ma fa'atala ula pe malie fo'i i le fa'alogo, le ta'uta'u so'o o le ula marijuana, ula sikaleti, ula 'aisa, ai kokeni, ae le o faigofie pe a o'o ina lutia ai le lotoifale o aiga, ae maise pe afai o i ai le fanauiti i na lotoifale. E ogaoga a'afiaga o na fanau nei e o'o lava i le lumana'i,” o se tala lea a Etuale.

 

O tala uma e afua mai le a'afiaga o le mafaufau ma fa'aiuga e faia e le sui ua tagofia nei mea fa'asaina, e o'o i le auga ma foliga va'aia o le tagata o lo'o ua mae'a tagofia nei mea uma, sa matua o'o i ai le Komiti, ina ia va'aia lelei e matua ma ta'ita'i o le LDS atoa i Amerika Samoa, ona nofouta lea e faia i ai se gaoioiga i se talavou po'o se matua ua iloga mai ai na uiga.

 

O ala fo'i o fa'atau atu ai i le mamalu lautele e i latou o lo'o umia nei fuala'au ma vaila'au fa'asaina fa'apea ma sikaleti, ua mae'a folasia mo le silafia i le tusa ma le 650 o ta'ita'i atoa o le motu na auai i le fonotaga.

 

Ua fa'ailoa mai e Kalili Hunt, le sui fa'asalalau a le LDS i Amerika Samoa, o lenei fonotaga sa mua'i fa'ato'ai mai ia Elder Fata, lea la sa fa'auia mai loa ma le talosaga i taita'i uma o le LDS i le atunu'u ma afua ai ona poto le vasega o ta'ita'i i ona vaega eseese mai Siteki uma e lima i lea aso atofaina.

 

"O le avanoa fo'i ua maua, e le o fa'atauagavale i ai, aua e to'atele lava e fa'apea, e le o tagofia e le fanau ma tagata totino o le Ekalesia mea nei, aua e ao ina fa'amama ai le olaga o le tagata e tautua i lenei ekalesia, peita'i e ao lava ina mataituina, e leai se tasi e le sasi. Afai o sasi ai se tasi, ia maua mai a'oa'oga nei e matauina e tagata uma, ma fa'ao'o atu ai fo'i se fesoasoani, po'o talavou po'o matua e ao ina tima'ia uma lava,” o se tala lea a Hunt.

 

"I a'oa'oga ua fa'alogoina ma va'aia i ata na fa'asolo, e le o faigofie lava le galuega tau fa'amamaina o le atunu'u mai nei mea uma. Ona o le naunau o nisi i le tupe vave ma le tupe tele e maua ai, ae ua le taga'i toto'a i afaina e o'o i olaga o i latou e tagofia ma a'afia ai, ae maise o latou aiga atoa ai ma tulaga tau le soifua laulelei o aiga, ma soligatulafono e alia'i mai nei mea uma, e matua faigata lava,” o se tala lea a le tama matua ia Tigi Mataali'i sa maimoaina ma pu'eata i lea taimi o le fonotaga.

 

"O le isi mea mata'utia, ona e le o mailoa ala ua fa'atau atu ai ma fe'avea'i ai nei mea uma. Ua e manatu lava oe e le o faia e lau fanau, ae fa'autagia matua ma aiga uma, alofa ma ia mata'ala. A va'aia loa ua fealua'i se talavou ma ni mea e tele ae le mana'omia so'o i le soifuaga e pei ona masani mai ai, ona iloa lea e i ai se mea o fa'alilolilo ai. Matauina fo'i le i ai pea o se tupe i lau fanau, saili po'o fea e na te aumaia ai nei vaega tupe e tagolima i ai,” o se toe fa'amamafa mai lea a Mataali'i.

 

Ona o lenei vaitau ua tele mai mea e fou ia i tatou matua, ua fautuaina, e taga'i toto'a i fa'asalalauga nei e avatu i televise a le Komiti e tete'e i fuala'au ma vaiala'au fa'asaina, ia utagia ai ala fou ua mafai ona fa'atau ma fe'avea'i ai nei vaila'au fa'asaina.

 

Fa'amavae Alofagia Nomura mai Komiti Fa'afoe ASTCA:

 

O le aso Gafua na te'a nei sa tuuina atu ai le Kovana Sili, le tusi fa’amavae a Alofagia Nomura mai le Komiti Fa’afoe a le ASTCA, lea sa avea ai o ia ma totino.

 

O Nomura tula’i mai i lenei tofiga i le tausaga e 2013, ma e na'o i la'ua ma Faiivae Alexander Godinet sui tuai o lenei Komiti Fa'afoe na toe tofia mai i le Komiti Fa'afoe Tuai.

 

I lana tusi fa'amavae, sa ia fa'afetaia ai le Kovana i lona mau fa'atuatuaina o lona tagata e avea ma sui totino o le Komiti Fa'afoe mo le ASTCA, ae peita'i, ua ia iloa lelei, e le toe gafatia e ia ona tauave tiute na tofia ai o ia e fa'atino mo lea Komiti.

 

Ona o nei mafuaga tatau, ua taua'ao atu ai lana fa'amavaega ina ia motusia lana tautua ia Setema 11, 2017. Ina ua maua le so'otaga ma Nomura ina ia fesiligia se mafuaga ua le gafatia ai e ia ona fa'aauau ona tiute i le Komiti Fa'afoe a le ASTCA, peita'i sa ia fa'ailoa mai, e le mafai ona ia talanoa i nei mataupu ma e moni lava ua mae'a ona taua'aoina lana tusi fa'amavae mai lea tofiga taua.

 

Fa'ae'e le Taualuga o le Fale Fono o Samoa:

 

Ona o lo'o fa'atautaia fo'i galuega toe fausia o le tatou Maota Fono i Amerika Samoa nei, ae ua va'aia fo'i le galuega o le Maota Fono o Samoa, ua o'o ina mae'a fa'ae'e lona taualuga atoa i le fa'aiuga o le vaiaso na te'a nei i Mulinu'u.

 

Ua toe fa'afoliga lava fo'i le maota fou i le foliga o faletele Samoa ma ua va'aia fo'i le fausia lelei i u'amea i le taimi nei o ona iviivi ma lona fausaga atoa.

 

E tusa ai ma le folasaga fa'alaua'itele a le Palemia Tuilaepa Malielegaoi na ia fa'ailoa ai, "E tatau lava ona tatou tu'u i talosaga lenei galuega e le faigofie lona fausaga, ia sao ma uli mea uma o fesaga'i ma ali'i kamuta ae maise o le matuaofaiva ia mau fo'i lana tofa ia leai se mea e sasi o le fausaga ua mae'a fa'ataoto mo i latou e galulue aga'i i ai. Afai ae mae'a le galuega e matua fa'afetaia lava le a'ao ta'ita'i o le SIlisiliese."

 

Sa ia fa'ailoa mai o le tinoitupe o fa'atino ai e ala mai le Malo o Ausetalia ma o le Kamupani Faufale a le Graig's Construction lea latou te fa'atautaia lea galuega tele a le Malo o Samoa.