Ads by Google Ads by Google

Tala I Vaifanua


Le tama'ita'i ulumatua, Elenoa Tarrant Ameperosa, a le susuga le Ta'ita'i Vi'iga Tarrant ma le faletua ua ia ta'ita'ia maia le Ta'aloga na tapena i ai le aiga o le ta'ita'i mo le aso fa'apitoa e tatalaina ai faitoto'a o le Malumalu ma le Hall Tele a le Ekalesia Penetekoso i Pago Pago, i le afiafi o le aso Lulu na te'a nei. [ata: Leua Aiono Frost]

O se va'aiga lea i le Ta'alolo ua aga'i atu i le nofoaga o lo'o tutula'i mai ai le malumalu ma le hall tele a le Ekalesia Penetekoso lea na tatalaina i le afiafi o le aso Lulu. [ata: Leua Aiono Frost]

TATALA MALUMALU & HALL PENTECOSTAL CHURCH

 

O le malumalu ma le Hall mo gaoioiga eseese e fa'atino a le Ekaleisa Pentecostal na tatala aloa'ia i le afiafi o le aso Lulu i Sina Siufaga, Pago Pago ma ua fa'afiafiaina atili ai le Ekalesia Penetekoso fa'atasi ma le latou Faife'au Rev. Lagofa'atasi Ae ma le faletua California Vi'iga Tarrant-Ae ma le pa'ia o aiga.

 

"O lenei malumalu na fa'ato'a sua le eleele i le aso 1 Ianuari, 2016 ae faato'a amatalia sa'o galuega o lona fausaga i le aso 18, Ianuari 2016, peita'i fa'afetai i le a'ao ta'ita'i ma le a'ao faivavega o le Atua, o lenei ua mae'a, ua tatou fa'aulufaleina mo ona sauniga pa'ia,” o se tala lea a le faletua o le Ta'ita'i Filigata Vi'iga Tarrant ua malaga mai mo le fa'amoemoe, e fesoasoani i le faletua ia California mo tapenaga o le fa'amoemoe.

 

O le malumalu ma le Hall ua fausia fa'atasi lava, ma o le tau aofa'i e $110,543.73, aua o le Matuaofaiva, o le Palama ma le Fai-Eletise o le susuga lava le Fa'afeagaiga Lagofa'atasi Ae."Ua maulalo lava le tau o le galuega lenei ona ua fesoasoani malosi le Atua e fa'aosofia le agava'a i nei fo'i taleni, peita'i e le'i a'oga ai lava, pe maua ai fo'i se tusi pasi, ua tago atu lava e fausia le fale mo le galuega a le Atua, ae tuu mai e le Atua le atamai e ala i le faitau i tusi ma fa'avasega ai mea e fa'atino,” o se molimau lea e tusa o le galuega.

 

I le aotelega o le foa'i po'o saoga a le Ekalesia na maua ai le $117,000. Talu mai le amataga, ina ua tu'ua e le Ta'ita'i o le Ekalesia Penetekoso Rev. Vi'iga Tarrant le galuega ina ia alaala i Kalefonia, sa tuu le galuega ia Rev. Lagofa'atasi Ae i le 2012, e na'o le to'a fitu lava aiga sa i ai, peita'i, ua atoa nei le to'a 27 o aiga ua galulue ai.

 

I le taimi nei e na'o le lua lala o lenei Ekalesia Penetekoso, o le pogati lenei ua mae'a fausia ai lenei malu, ae o le lona lua o lala o lo'o ua galulue i ai le susuga le Ta'ita'i ma le Faletua Rve Vi'iga ma Filigata Tarrant i Temecular, Kalefonia, ma o lo'o fa'atautaia mo so'o se tagata lava e fia ulufale ma tapua'i, ua fa'atautaia mo na'o tagata Samoa i lena vai a'ai.

 

Ina ua fesiligia le Fa'afeagaiga ona o le matagofie o le tutula'i mai o le galuega i le mauga, e talavou fo'i i la'ua ma le faletua ua galulue ai, ae fa'ailoa mai le la'ua tali, "O le Atua e ona mea uma, ua fuafua fo'i e tua'a ina ia fausia le malumalu i le fale sa alaala ai. O le alofa lena e ao ina tu'uina atu i le Atua, ua o'o i le fale ia avea ma taulaga, ae ua faia ma le loto atoa ma le agaga atoa, e auauna atu ai!"

 

O le tala'aga o lenei nofoaga ua fausia ai le Malumalu sa mua'i fa'atuina lea malumalu tuai i le nofoaga sa fa'atautaia ai le Day Care i le tausaga 1996, peita'i o le tausaga 2004 na avea ai loa lena nofoaga ma malumalu. Uma lea soso'o mai ma le fa'alautele o le malumalu ua fa'ase'e mai i le nofoaga lona lua o le Day Care, ae ua fa'atoateleina atili lava le Ekalesia. Ua o'o mai ai loa ina fa'aaoga le Fale sa alaala ai le Taitai ma le Faletua ma le fanau. Lea ua toe fa'aleleia atoa ma ua fausia ma le Hall i lona fogafale lona lua.

 

AFUAFUA FALE MO PESEGA A SAMOA - OPERA HOUSE

 

Ua amata fuafuaga fa'ataoto i Samoa le fausia ose Faletele mo Pesega - Samoa Opera! ma ua fa'ailoa mai le tulaga o lea fale o le lotoa o le a'oga a Leififi Intermediate School i Malifa.

 

O le susuga le Minisita o A'oga  Loau Keneti Sio, lea sa saunoa ma fa'ailoa lea fa'amoemoe e amatalia i le tausaga fou. Peita'i ua maua mai se tala tusia i le Leitio a Niu Sila, o lea galuega atoa e faitau miliona lona tau, ae sa fa'auia mai se kamupani mai Saina.

 

Peita'i o le taumafaiga ina ia fa'atula'ia se Faletele mo Pesega, o se mea sili fo'i ua maua e ona tagatanu'u ina ia fa'alautele atili ai le tomai o tagata Samoa e tauva ma fa'aleleia atili latou taleni pese. O nisi ua lauiloa i lea foi taleni mai Samoa ua aofia ai Moses MacKay, Isabella Meleane Moore, Johnthan Lemalu ma Marlena Devoe, ae maise fo'i o le ali'i pese lauiloa o Jerome Grey.

 

Ua fa'ailoa mai o le nofoaga muamua sa i ai le Matagaluega o A'oga, Ta'aloga ma Aganuu lea ua mae'a soloia i lalo nei fale ae fa'aavanoa le nofoaga lea mo le Faletele o Pesega a le atunu'u.

 

O le fausaga o fale tifaga, Fale mo Pesega ma isi fo'i fale mo le fa'atinoga o nei taleni ua fausia uma o se meaalofa foa'i fua a le Malo o Saina mo atunu'u laiti o le Pasefika, o se latou fesaosoani sa mua'i fa'ato'ai i atunu'u sa vaivai le tamaoaiga tausi.

 

I se lomiga mai Saina i le tausaga 2009 na fa'ailoa ai ana galuega foa'i nei e afua mai ituaiga o galuega e fausia lelei, o fale ma nofoaga fa'apitoa mo le fa'aleleia o taleni a tagata lautele o atunu'u ua talosaga mo le fesoasoani ma sa fa'ailoa mai e tusa ma le 2,025 poloketi e mafai ona latou fa'atinoa e ala i lena foa'i, e le totogia ni tupe fa'asili mo ne ituaiga o poloketi fa'atupe.