ALOFA I MEAOLA - FA’ALAUILOA E FANAU A’OGA SPA

O le afiafi ananafi na fa’afeiloa’ia fanau e to’afa mai le South Pacific Academy le to’atele o tagata lautele sa i le Laufou Shopping Center ina ia taua’ao ia i latou tusi e fa’amalosia ai le latou mau “Alofa mo Meaola!” O i latou ua ofo le latou tautua ina ia faalautele ai lea feau taua o le alofagia o fagafao po’o meaola o tatou tausia i totonu o le li’o o tatou aiga ta’itasi.

“Afai tatou te tausia lelei a tatou meaola, fagaina i latou ma ave i latou e faia tui puipuia mai le toe toloa’i, ma ia puipuia fo’i mai le a’afia i fa’ama’i o meaola,” O se tala lea a le fanau a’oga na talanoa mai ai. O i latou nei e aofia ai: Clarence Herdrich, Kevin Liang, Patrick Bellosillo ma Dongni Liang o le SPA, Tafuna.

Peita’i, sa i ai fo’i le laulau sa fa’aautu i ai a latou folasaga i autafa mai o le Laufou, ma o iina sa fa’amautu ai le tamaita’i o Pua Toefaeono e fesoasoani e talanoa faasamoa i le fanau sa avea ma latou fofoga fa’afeiloa’ia tagata lautele.

“Ua matou faia lenei galuega, ina ia mautinoa ua fa’aitiitia le aofai o meaola e ta’aloa, ia ofo ane ni aiga e tausia lelei i latou, ma ia silafia lelei fo’i e aiga ta’itasi o i ai latou meaola, e ao ina fagaina sa’o meaola pe afai ua outou alolofa i ai, ma tausia lelei fo’i.”

I pepa sa taulimaina mo tagata lautele ua i ai le vaega e fa’amanino ai le ituaiga o talavai e mafai ona tausia lelei ai fagafao o so’o se ituaiga o meaola ae maise ai lava o Ta’ifau ma Gose poo pusi.

“Ua talosagaina e fafaga meaola i a latou lava mea’ai, peita’i, i le aiga Samoa lava ia, e fafagaina latou meaola i toega o mea’ai a tagata. Ia tautuana, afai o ivi, e fa’aleagaina ai info o maile ma pusi.”

Afai e va’aia ua vaivai se ta’ifau pe ua foliga mai, e ao ina fa’ao’o ane i le Matagaluega o Faato’aga i le vaega o lo’o i ai le foma’i o meaola, e va’aia ma togafitia ai lau fagafao.

Talosagaina fo’i le mamalu femalaga’i i ta’avale, ia alofagia, pe afai e va’aia nai meaola o kolosia le alatele, tu’u avanoa ia fa’asaoina lo latou ola.

I le fa’aaliga o Poloketi o le Talafa’asolopito, sa i ai se tamaititi sa ia tau’avea le Mau mo Meaola, ma ia fa’aulutalaina ai lana galuega fa’atino - “O le Leo mo e Leleoa!” [Voice for The Voiceless] ma sa tula’i mai lea galuega i lona tulaga muamua i lana vaega na tauva ai.

E fa’alagolago lo latou ola maloloina ia i tatou tagata o lona matai, e fa’alagolago fo’i lona saogalemu i la tatou puipuigamalu, peita’i, afai tatou te so’ona fasi i latou ma le tausia lelei, e toe o’o mai tiga ia i tatou e ala i ma’i e afaina fa’atasi ai meaola ma i tatou o tagata, pe a tatou le fa’aeteete lelei i le tausiga mo meaola fa’atasi ma i tatou i le li’o o tatou aiga.

LE GAFATIA E TONGA TALIMALO TA’ALOGA PASEFIKA - PACIFIC GAMES

Ua fa’ailoa mai, ua le gafatia e le Malo o Tonga ona talimalo i le tausaga  2019 ma ua fa’ailoa se manatu o le Peresetene a le Pacific Games - Vidya Lakhan, e mana’omia ona fa’ao’o atu aloa’ia le tala sa’o mai ia Tonga i lenei mataupu.

O le tala mai Tonga na fa’ailoa mai se saunoaga a le Palemia o Tonga, Akilisi Poiva, i le Kaniva News i Tonga lava, ona ua fa’ailoa i ai e le faletupe o le Lalolagi i ta’ita’i o le Malo o Tonga, ia taofia le manatu o i latou e talimalo i le Ta’aloga a le Pasefika ona o tulaga tau tupe o lo’o feagai ma le malo i le taimi nei.

Ina ua fesiligia e le Fiji Times ia Lakhan, pe mata o ai se malo e ono mauaina lea fa’amanuiaga pe a le gafatia e Tonga ona talimalo, ae fa’ailoa mai e ia, “O le a tauva ai fo’i Samoa ma Fiti i lea avanoa.”

Pe afai o le a toe maua e Samoa lea avanoa, o lo’o lelei lava latou tapenaga uma mo ta’aloga eseese aua o i latou sa talimalo i le tausaga 1993 ma le 2007.

MALAGA SUI AMERIKA SAMOA I TONGA

Ua toe fo’i mai i le teritori le au malaga a Amerika Samoa lea na malaga atu mo se asiasiga i Tonga.

O le ‘au malaga e aofia ai le fa’atonu o le Matagaluega o Fefa’ataua’iga, Keniseli Lafaele, le So’oupu a Amerika Samoa i le va ma le Sosaiete Tagata Tonga iinei, Mafi To Sione Kava ma Paul Young mai le ASPA.

A o i ai i Tonga sa va’aitoto’a i ala e mafai ona fa’aaogaina ai le eleele i Tonga o lo’o lisi e Amerika Samoa, faatasi ai ma tulaga i fefa’atauaiga i le va o Amerika Samoa ma Tonga.

O le isi mau sa talanoaina a’ia’i, o le fa’aaogaina lea o le tatou Nofoaga e Fa’aleleia ai Va’a o so’o se ituaiga mo le toe lipeaina o Va’a o le malo o Tonga. Ua mautu atu nei le nipoti a le aumalaga i le ali’i Kovana Sili Lolo Matalasi Moliga mo sana fa’ai’uga i ai, ma fa’alauiloa mai ai sana fa’aiuga o mea e ao ina fa’aaogaina tatau ai lea eleele i Tonga.

O lea eleele e pei ona au silafia na fesuia’i ai se fasi fanua i Tonga mo Amerika Samoa, ae o le eleele mo Tonga i Tafuna mo i latou e fa’atautaia ai ni a latou foi galuega e atina’e ai se manuia mo le Malo o Tonga ma ona tagata. Ua tatou va’aia, ua i ai le maketi a Tonga i lea laueleele i Tafuna. O le faigamalo a Kovana Aifili Paulo Lutali sa faia ai lea fesuia’iga tau eleele.