E ui i le tulaga e pei ona amata ai galuega mo le tatalaina i lalo o le maota fono tuai a le atunu’u, o le aso Gafua o le vaiaso fou e pei ona fa’atulaga mai i lalo o le Fa’avae Toe Teuteu a Amerika Samoa, lea ua fa’amaonia e toe tatala aloaia ai le tauaofiaga lona 2 a le Fono Faitulafono, mo lana nofoaiga lona 35 e pei ona nofoia nei.

I se fa’atalatalanoaga a le Samoa News ma le afioga i le Fofoga Fetalai o le maota o sui i le vaiaso na te’a nei, tofa Savali Talavou Ale, sa ia fa’amaonia mai ai le sauni o maota e 2 mo ana galuega masani i le vaiaso fou.

“E pei ona silafia e le atunu’u tulaga i le amata ai ona tatala i lalo o vaega o le maota fono tuai i le taimi nei, peita’i e ui o lea ua tatala i lalo se vaega o le maota fono, o le a fa’aauau pea ona tatala galuega a le fono i le vaiaso lona lua o le masina o Iulai o lenei tausaga”, o le saunoaga lea a Savali.

“O le maota maualuga a le Senate lea ua fa’amoemoe latou te fa’aaogaina le Fale Samoa a le Fono Faitulafono, ae o le maota o sui ua fa’amoemoe latou te fa’aaogaina le isi itu o le Fale Laumei i Utulei e fa’atino ai ana galuega fa’a palemene e pei ona masani ai”, o le saunoaga lea a Savali.

“E ui lava i tulaga e pei ona i ai galuega mo le maota fono fou a le atunu’u, ae ua manatu Ta’ita’i o le Fono, e le avea ia tulaga ma auala e taofia ai galuega fa’atino e pei ona filifilia i ai afioga i Senatoa ma Faipule e ala i le tautuaina o le atunu’u”.

O se tasi o galuega tele e pei ona saunoa Savali o le a alo atu i ai le Fono Faitulafono e iloiloina i le tauaofiaga lenei, o le talanoaina lea o le paketi a le malo mo le tausaga tupe fou 2018.

“E le o mautu mai se tulaga i galuega o le paketi a maota e lua, ae pei ona silafia i tausaga e 3 ua mavae atu, sa tu’u fa’atasia ai lava iloiloga a le fono faitulafono mo le paketi a le malo, ma o lo o tau fuafua atu fo’i i ai ina ia tu’u fa’atasia galuega mo le paketi i lenei tauaofiaga, ae o le a mafai ona toe fa’amautu atu lena tulaga i se taimi o i luma”, o le saunoaga lea a Savali.

E pei ona masani ai maota e lua i taimi o ana galuega fa’atino, e le gata i tauaofiaga e masani ai i taeao ta’itasi, ae i ai fo’i taimi e fa’ataunu’uina ai iloiloga a komiti eseese mo le talanoaina o ni mataupu e fesiligia ma fia malamalama i ai afioga i senatoa ma faipule, ma o ia galuega uma e pei ona saunoa Savali, o le a fa’ataunu’uina uma i nofoaga ua filifilia e galulue ai maota e 2.