Ads by Google Ads by Google

Pili e sii ai totogi o laisene o ta’avale fa’aulu i le Maota o Sui

ausage@samoanews.com

Ua i luma o le maota o sui se pili mo se tulafono tau fa’aofi e fa’atulaga ai totogi fou mo le lesitalaina o ta’avale i le Ofisa o Ta’avale Afi a le malo i Tafuna.

 

O lenei pili sa fa’aulufale lea e le afioga i le sui fofoga fetalai ia Fetu Fetui Jr, ma o lo o lagolagoina e isi afioga i faipule e aofia ai Vesi Talalelei Fataunu Jr, Gafatasi Afalava, Lavea Fatulegaee Mauga, Fagaoatua D. Salavea, Sataua Dr. Mataese Samuelu ma Manumaua W. Wilson.

 

E pei ona taua i le tino o lenei tulafono, o le totogi mo le laisene ave ta’avale fou e $12 o loo i ai nei, o le a si i luga i le $20, ae o le laisene ave ta’avale la’upasese e $8 o lo o i ai, o le a sii i luga i le $13, atoa ai ma le pemita ave ta’avale e 6 masina mo i latou fa’atoa amata ona ave ta’avale, e $10 lea ua sii i ai mai le $5 o lo o i ai.

 

Mo le fa’afouina o le laisene ave ta’avale e $12 o lo o i ai, o le a si’i i le $17, ae mo le laisene ave ta’avale la’upasese e $8 pe a fa’afou, o le a sii i le $20. O le laisene ave ta’avale mo le tagata malaga mai i le atunu’u o lo o $9 ae ua fuafua e sii i le $12, ae o le isi laisene ave ta’avale faapitoa (provisional driver’s license) o lo o $9 lona tau o le a sii i le $15.

 

E pei ona taua i le tino o lenei tulafono, o le $5 e maua mai i siitaga e pei ona taua, o le a teuina i totonu o se teugatupe faapitoa i le teugatupe tele a le malo, e fa’amoemoe e fa’aaoga e le Ofisa o Leoleo mo le fa’afouina o a latou mea faigaluega e aofia ai ma le fa’atauina o sapalai e fa’aaoga i le pu’eina o laisene ave ta’avale.

 

E le gata i laisene ave ta’avale o le a suia o latou tau, ae oo lava fo’i i le lesitalaina o ta’avale o le a suia fo’i lo latou tau.

 

O le totogi mo le fa’afouina o le ta’avale e $32 o lo o i ai nei, o le a sii i le $40, ae o le totogi e $3 mo le tane e tasi i le mamafa o le ta’avale, o le a sii i le $15. O le $8 o le a maua mai i lenei siitaga o le a teuina lea i totonu o se teugatupe faapitoa a le malo, e fesoasoani ai i le Ofisa o Leoleo mo le fa’atupeina o ana galuega fa’atino.