Ads by Google Ads by Google

Onosa’i i Mea Tiga

Vaega: 105

 

Ia manuia le alo atu o le atunu’u i faiva ma tiute o le a feagai ai i lenei aso. Ae alo maia, o le a toe fa’aauau atu la tatou tala, na muta mai ina ua taumafai Lilo e fa’ailoa i lona tina le mea ua tupu i le to’alua o lona tuafafine, le tamaloa Palagi o Roger, peita’i, ua le saofia, ona o lea ua sagai ane nei e fai le taumafataga.

 

O lea fo’i ua taunu’u ane tama’ita’i o le aiga, ae tau futi futi ulu ai ma le lo’omatua o Loleta i lana tama teine o Mataniu. Ua toafa le fanau teine a Loleta ma Lilo, ae o lea ua toe ma’itaga Loleta. O le isi fo’i la lea mea ua itaita gofie ai ona o lona ma’i o lo’o tauave nei. E moni lava o le tama a Loleta ma Lilo le tene o Mataniu, ae na tausi mai lava e le lo’omatua o Malia, o le a fo’i lea, e tau fa’alekeakea ai le teine i lona tina moni o Loleta.

 

Ae manatua fo’i, o Mataniu, e le o se afafine o Lilo, ae ua le manatu lava le tama i na itu, ua alofa fa’amaoni i a Mataniu, ma ua pei lava o sona ia afafine na ifo mai i lona manava. O le ala fo’i lea, ua manatu ai le lo’omatua o Malia, e tausi e ia le teine. Fai mai, e o’o mai i le taimi lea ua sefuluiva tausaga o Mataniu, e leai se isi o le nu’u o iloaina lea tulaga. E o’o fo’i i a Mataniu, na te le o iloaina e le o sona tama moni Lilo, fai mai ua tanumia lava i le palapala ia mea uma.

 

Ua le toe manatua e Lilo le mea na alu ane ai e va’ai lona tina, ae maise fo’i o le nofonofo mai a si ona tuafafine, ae fai mai le tala, a tilotilo ane nei le tama i lona tuafafine ma lana tama, toe toe a pau mai i fafo le fatu o le tama. Ae, sa taumafai lava Lilo ina ia fa’ato’ato’a lelei mea uma, ma lona manatu e tasi, e faia e le Ali’i le taimi ma le aso, e sologa lelei ai mea uma.

 

Ua le uma le viga o Filipina i lona tuagane, pe ua maua se feso’ota’iga ma lona to’alua, ae tali ane i ai Lilo, atonu e i ai se aso, ai fo’i o pisi Roger i lana galuega. Na fa’apea ane nei i ai lona tuafafine, ia ta’u mai ia te a’u le numera o le telefoni, ou te fia talanoa i lona to’alua po’o a mai.

 

Sau se taimi i le fa’asologa o la tatou tala, ona tatou su’eina lea po’o fea ua o’o i ai le malaga a Roger, po’o le mea ua maua e le vaega a le iSiS po’o fea fo’i o apilitia ai si toeaina.

 

Fai mai, ua amata lava ona mamafa i le loto o Filipina lona to’alua, aua ua le maua mai se tala po’o fea ua alu i ai, pau le la tala na fai ae e le i alu ‘ese atu, e alofa i a te ia, ae a fanau fo’i o se teine ia fa’aigoa i lona tina, ae a fanau mai o se tama, ia fa’aigoa i le igoa o lona tama. O mana’oga ia a lona to’alua na fai ane ia te ia, a’o le i alu lana malaga, o lea lava ua fai e  Filipina.

 

Ae o le igoa lea ua fa’aigoa ai e lona tina, o Ali’ioaiga, ae ua mulimuli mai ai i tua le igoa o le tama o Roger, ia ua fiafia fo’i i ai Filipina i le igoa ua fa’aigoa ai e lona tina si ana tama. O se fiafiaga sili i le loto ma le mafaufau o le lo’omatua o Malia le tama o Ali’ioaiga, fai mai, e le mafai ona moe le lo’omatua ae e le i sogi ane i le pepe.

 

O le isi lea itu na va’ai toto’a i ai Lilo, o le auau o lona tina i le tama a lona tuafafine, ma ua atili ai ona mafatia le loto o Lilo, aua ua na le iloa nei, po’o le a le ituaiga fa’aaliga o le a ia faia i lona tina, e tusa ai ma mafatiga o le a o’o i ai Filipina. Ua le mafai e le tama ona toe taofia pe toe natia se mea, o lea na ia sema ai loa lona taimi, e talatalanoa ai ma lona tina.

 

E faia pea...