Vaega: 120

Alo maia, o le a toe fa’aauau atu la tatou tala. Na muta mai la tatou tala, ina ua i ai nei Roger le to’alua lea o Filipina i totonu o le faleoloa tele lava, ma o lo’o fa’asolosolo pea lana matamataga i totonu o le faleoloa. Fai mai, e maofa le va’ai a le ali’i Palagi ona o mea uma o lo’o maua e Amerika ma Hawaii, o lea fo’i ua maua i le faleoloa lenei.

O lea la e fa’asolosolo le maimoaga a si ali’i, a’o lea lava e mata’i lelei mai e Samala’ulu ma le ali’i ave ta’avale o Semo. Fai mai, na ta’u nei e Semo i a Samala’ulu, o le tamaloa na sau e va’ai Filipina. E pei e oso le teine i se niu, e le i toe fai ane se tala i a Semo, ae ua tamo’e nei e va’ai po’o fea o i ai Filipina.

E taunu’u ane le teine i totonu o le ofisa, ae tu’u loa i lalo ma le telefoni na talanoa ai Filipina i a Samala’ulu. E le i toe fa’atali le teine, na ona a’apa atu lava u’u mai ma le lima o le uso o lona tina ma fa’anatinati loa i le itu o lo’o i ai oloa. “Samala’ulu, e te valea, o le a le mea ua tupu, e i ai se mea ua tupu.?” O le fesili ane lea a Filipina, ae ua leai se tala a le teine i lea taimi.

Ua toso fa’anatinati atu nei e Samala’ulu ia Filipina e va’ai pe o ai lea tamaloa palagi na o ane ma Semo. Fai mai, e fetaui lava le taunu’u ane o Filipina ma Samala’ulu, ae tu tonu loa ma Roger i luma o le mea o lo’o fai ai fa’atauga. Fai mai, na tasi lava le va’ai a Filipina, ona iloa loa. Ua tu nei ma u’u lona fatu, ua pei a pe i lea taimi, na solo mili ifo nei i lalo, ae ua fa’atu i luga e Samala’ulu ma Semo.

“Filipina, Filipina tu mai i luga, ‘aua e te fa’apena, na tamo’e fa’anatinati nei Samala’ulu e fai i tama o lo’o galulue i tua e alu fa’avave se tasi e logo Lilo, o lo’o fai le la galuega ma Vesi. Ua fa’apea lava ona fai, ua taunu’u ane nei tama ma Lilo, ae ua amata ona tau to’a mai Filipina. Na fesili nei Lilo i lona tuafafine, pe o le a le mea ua tupu, ae ua na o le fa’asinosino nei e Filipina i lona tuagane le tamaloa Palagi, lea o lo’o fealualua’i solo i totonu o le fale oloa.

Fai mai, ina ua va’ai Lilo i le tamaloa, na tasi lava lona manatu, o Roger, le to’alua o lona tuafafine ma o le tama fo’i lea o Ali’ioaiga. Ua tu Lilo, ua le iloa po’o le a le mea o le a fai, ae ua a’apa ane i ai le lima o Filipina. “Lilo si o’u tuagane, ia e alofa mai ia te a’u, ma ia e alofa fo’i i si a’u tama o Ali’ioaiga, o le mea lava lenei na ou fai atu ai ia te oe, ‘aua e te popole mai ia te a’u ma si a’u tama, e lagona lava i lou loto ma lo’u mafaufau, e toe fo’i mai lava si o’u to’alua ia te a’u ma si a’u tama, “Lilo, ia e fa’amagalo i si o’u to’alua, o a lava mea tele na tutupu ina ua alu ‘ese atu, ae sa taula’i lava la’u va’ai ma lou loto atoa, e i ai se taimi e toe fo’i mai ai i a te a’u, Lilo, malie lou finagalo oe si o’u tuagane, ia e alofa i mata o si a ma tama, ma talia le toe fo’i mai o si o’u to’alua fa’amolemole.”

Fai mai, o tagata faigaluega uma sa i ai, e fa’ate’ia uma, aua e leai se tasi o ona iloaina le mea lea e tupu, ua na o Lilo ma Vesi ma Filipina. Fai mai, e fai lava tala a Filipina ma a’apa atu ua fusi mai si ona tuagane, ma lona loto fiafia.

“Lilo, sau ta o e fa’afeiloa’i i si o’u to’alua, ua leva ona alu, o lea ua toe fo’i mai, sau ta o, se i o’u feiloa’i atu i si o’u to’alua, ua leva ona ma valavala.” Ua alu nei le solo a Lilo ma lona tuafafine i le mea o lo’o i ai Roger.

“Roger, Roger, is that you, is it really you, talofa e, i si o’u to’alua, sau se i ta feiloa’i. Ua na o le tu o le tamaloa Palagi ma tilotilo ane, ae sa ia iloa lelei o Filipina lea. E le i toe fa’atali le tamaloa, na savali fa’anatinati ane nei ma fusi mau si ana manamea, o lea ua toe feiloa’i i le manuia.

E faia pea...