Ads by Google Ads by Google

Onosa’i i Mea Tiga

Vaega: 118

 

Alo maia, o le a toe fa’aauau atu la tatou tala mo lenei aso, ae ia manuia lou alo atu i faiva ma tiute o le a feagai ai. Na muta mai la tatou tala, ina ua tapena le malaga a le tamaloa Palagi o Roger e toe fo’i mai i Samoa e asi mai Filipina, ma ua ola fo’i le tama’ita’i o Mataniu o le tama le la tama.

 

Ae se i toe fa’aauau atu pea la tatou tala, po’o fea o le a o’o i ai le malaga mai a le tamaloa o Roger i Samoa nei. Fai mai le tala, ina ua taunu’u le malaga a Roger i Samoa nei, ua matua’i sui lava le va’aiga a le tamaloa, ua matua’i tele lava le suiga ua i ai, na i lo le mea sa i ai muamua. Fai mai, e ui lava i ia suiga, ae o lo’o manatua pea e le tamaloa le igoa o le nu’u o lo’o nonofo ai Filipina ma lona aiga.

 

Ua oso nei le tamaloa i totonu o le ta’avale la’u pasese ma ua aga’i loa i le nu’u na tu’u ane e Roger i le ave ta’avale. Fai mai, ina ua tu’u ane e le tamaloa Palagi i le ave ta’avale le igoa o le nu’u, fai mai e iloa lelei e le aveta’avale le aiga o Filipina, ona e masani ona alu e fai fa’atau o le faleoloa pe a pisi ta’avale a le aiga.

 

Fai mai, ua fa’ate’ia le ave ta’avale i le tamaloa, ua amata nei le talatalanoaga e uiga i le nu’u ma le aiga o lo’o aga’i i ai le faigamalaga. Na su’esu’e nei e le aveta’avale le tamaloa, po’o ai ia, ae sau le tali a le Palagi, o ia e masani i le aiga o Filipina.

 

Fai mai, ua mata’i mai nei e le ave ta’avale foliga o le tamaloa i le fa’ata, o le va’ai a le tama, o foliga uma lava o le tama a Filipina lea ua alu nei i le Malo, le tama o Ali’ioaiga.

 

Ua le toe tauala le ave ta’avale, e fa’apea ane i a Roger, “Very nice day, yes sir, very nice day.” Na tali le Palagi, “Yes indeed, very beautiful day.” Fai mai na toe tali ane i ai le ave ta’avale, “Sir, are you married or single, you are going so see Pina.?”

 

Ua ‘ata’ata le tamaloa ma tilotilo ane i le ave ta’avale, fai mai na fa’apea ifo mafaufauga o Roger, “Leaga lava mo le mea o le Samoa e faitatala tele, e mana’o e fia iloa lava mea uma, ae e leai lava sana feau e iloa ai fua, tu’u le isu i le mea e tatau ona tu’u i ai, ae le o le tu’u o le isu i le mea e manogi leaga.”

 

Ua toe tilotilo mai le ave ta’avale i le tamaloa lea, e moni lava ua matua, ae e le ave’esea lona lalelei, ma o foliga uma lava o le tama a Filipina. Fai mai, na fa’ate’ia si tamaloa Palagi, ina ua tu fa’afuase’i le ta’avale, ua tau oso ai luma lona nofoa.

 

Na tilotilo ane nei Roger i le ave ta’avale, ua oso a’e ona mafaufauga, pe sili ea ona fesilisili i le tamaloa, ma e foliga mai, e iloa lelei e le ave ta’avale le aiga o Filipina. Ae manatua fo’i, o le Palagi e le tautala, e tu’u lava ana ia pisinisi i si ana taga, e le mana’o e iloa fua e le isi tagata.

 

Fai mai mafaufauga o Roger i lea taimi, “Under the nose, o lalo lava o le isu, very bad….very bad.” E le i umi, ae tu loa ma le ta’avale i luma o le faleoloa o le Mary’s Family Mart. O le va’ai a Roger i lea taimi, o se faleoloa ua sili ona tele, ae ua le mautonu le mafaufau o le Palagi pe aisea ua tu ai fua le ta’avale i luma o le faleoloa, e le o le fale lea o Filipina.

 

E faia pea...