Ads by Google Ads by Google

Lata to’a 3,000 tagata o lo o maua penefiti mai le Litaea malo


[ata: foa'i]
ausage@samoanews.com

E silia i le to’a 3,000 le aofa’i o tagata faigaluega a le malo o lo o tali a latou penefiti o le litaea i le taimi nei. O se vaega lea o le molimau sa tuuina atu e le Taitaifono a le Komiti o le Litaea, afioga a Va’anatiu Iafeta Tofala ma le Pulesili o le Ofisa o le Litaea, tofa I’aulualo Talia Fa’afetai, i le iloiloga a le Koimti o le Litaea a le maota o sui i le vaiaso nei, e fa’atatau i le mataupu e sii ai le pasene mo tagata ua maua litaea (COLA).

 

O le autu o le iloiloga a le maota o sui, o le fesiligia lea o le Ofisa o le Litaea a le malo i sa latou fuafuaga e fa’atatau i le COLA mo tagata ua tali a latou penefiti o le litaea.

 

O le mataupu e fa’atau i le COLA na fesiligia e le afioga i le ali’i faipule ia Timusa Tini Lam Yuen i le vaiaso na te’a nei. Na taua e Timusa e fa’apea, ua fesiligia e ni isi o Tama ma Tina matutua i lona itumalo o ia, i le mafua’aga ua taofia ai e le Ofisa o le Litaea le COLA, poo le fa’amanuiaga e tatau ona faaopoopo i luga o a latou penefiti o loo maua i tausaga ta’itasi.

 

Saunoa I’aulualo e fa’apea, o le fonotaga a le Komiti Fa’afoe i le masina o Fepuari na te’a nei, na pasia ai le tatau lea ona fa’aauau le COLA na taofia mai i le tausaga na te’a nei.

 

Ina ua fesiligia e faipule ia molimau poo lava se tupe a le litaea e faatupe ai le COLA, na tali I’aulualo, o lo o lava le tupe e fa’atino ai lea siitaga, pau le itu e ala ai ona taumafai le Ofisa o le Litaea e tau taofiofi le fa’amatu’uina mai o le COLA, o le vaai mamao lea i le tulaga lelei o le tupe i le lumana’i, ina ia mavae atu tupulaga i aso nei ae o loo tulaga lelei pea le teugatupe e tua i ai tupulaga o le lumana’i.

 

O le fautuaga a molimau mai le ofisa o le Litaea, e tatau ona toe faaopoopo i luga le aofa’i o le saofaga o loo tipi mai e le malo ma tagata faigaluega, ina ia tupu ai pea i luga le tupe ma atili ai pea ona lelei mo tagata litaea.

 

O le taimi nei, e silia i le $2 miliona le aofa’i o le tupe e fa’aalu e le Ofisa o le Litaea e fa’atupe ai siaki a tagata litaea i le masina. O le fa’afitauli o loo tulai mai, e na o le $800,000 le tupe o loo maua mai i saofaga i masina ta’itasi. O le mafua’aga lea e manaomia ai le to ese mai o le $1.5 miliona mai totonu o le teugatupe ina ia fa’aatoa ai le $2 miliona e mana’omia i masina taitasi.

 

Talu mai le amataga o le tausaga nei, e tusa ma le $210 miliona le aofa’i o le tupe o loo i totonu o le teugatupe a le litaea a Amerika Samoa. O se tupe na taua e I’aulualo o loo lelei ma tupu pea i luma.

 

O se tasi o mafua’aga ua mafua ai ona maualuga le aofa’i o tagata e agavaa i le litaea, ua to’atele naua tagata faigaluega a le malo ua agava’a i le litaea ma’i. E le gata i lea, o tatgata matutua ua tele tausaga e soifua ai, ma atili ai lava ona to’atele le aofa’i o tagata litaea.

 

Na taua e le Ta’ita’i Komiti ia Vailoata E. Amituana’i le taua tele o le fonotaga ma sui o le litaea a le malo, ina ia fa’amanino ai mataupu o lo o fia malamalama i ai le atunu’u aemaise sui mamalu o le fono.

 

Saunoa Vesi Talalelei Fautanu Jr e faapea, afai o le tulaga lea ua i ai le to’atele o tagata o loo agava’a i penefiti o le litaea, e manaomia le sii i luga o saofaga e totogi e tagata faigaluega ma le malo.