Ads by Google Ads by Google

Fesiligia e ni isi Faipule tulafono fa’afoe ai iloiloga

Le afioga i le ali’i faipule ia Maugaoali’i Le’apai Tusipa Anoa’i  [ata AF]
Paketi a le Fono
ausage@samoanews.com

O tula’i soo mai pea o le fa’afitauli o lo o fai ma mafua’aga e ala ai ona le fia auai ni isi o afioga i Faipule i iloiloga o le Paketi, o le vave aloaia lea e le Ta’ita’ifono o le mau ae o lo o si’i atu pea aao o Faipule ma Senatoa mo le fia maua o le avanoa e fesiligia ai molimau a le malo, ua fesiligia ai e ni isi o afioga i Faipule tulafono ma ta’iala o lo o fa’afoe ai iloiloga o le paketi a le Komiti So’ofa’atasi a le Fono Faitulafono.

 

Talu ai e le o se taimi muamua lenei ua tula’i mai ai le fa’afitauli lea, o le vave fa’amuta o iloiloga i le mae’a ai lea ona fa’alua pe fa’atoluina fo’i le mau, na taua ai loa e ni isi o afioga i Faipule le mafua’aga e ala ai ona latou naunau e fai eseese iloilioga o le paketi a maota ta’itasi, ina ia maua ai le avanoa o sui latou te fesiligia ai mataupu e fa’atatau i le paketi.

 

O le fa’afitauli lenei na tula’i mai i le taeao ananafi ina ua aloaia e le Komiti Soofa’atasi le mau e fa’aagafua ai sui o le Kolisi So’ofa’atasi, ae o lo o to’atele pea isi Senatoa ma Faipule o lo o si’i o latou aao mo le fia maua o ni avanoa e fesiligia ai molimau.

 

Ina ua tuua e sui o le Kolisi So’ofa’atasi le maota maualuga o lo o fa’atautaia ai iloiloga a le Komiti So’ofa’atasi, na saunoa ai loa le afioga i le ali’i Faipule ia Maugaoali’i Leapai Tusipa Anoa’i i luma o le Komiti So’ofa’atasi ma fa’ailoa i ai lona lagona fa’anoanoa, i le fiu e si’i lona lima ae leai se avanoa na tu’uina atu ia te ia.

 

Saunoa Maugaoali’i e fa’apea, e tele naua isi mataupu taua sa ia fia fesiligia ai sui o le Kolisi Tu’ufa’atasi e fa’atatau i fesoasoani tupe o lo o maua e fanau aoga e totogi ai a latou pili ma tusi aoga (financial aid), po o maua uma e fanau aoga nei fa’amanuiaga tau tupe, ona o lo o i ai ni isi o matua ma fanau aoga o lo o fa’asea fai mai, e le o maua uma e fanau vaega tupe e tatau ona latou agava’a i ai, peita’i ua le mafai ona fa’aleo lea fesili, ona ua vave fa’amuta e le Ta’ita’i o le Komiti So’ofa’atasi le iloiloga.

 

Na talosaga Maugaoali’i i le Laulau, ina ia taumafai e fa’asoa pea avanoa i sui mamalu e fa’aleo ai a latou fesili, ona o lo o tapua’i mai o latou itumalo.

 

Na lagolagoina e le afioga i le tama’ita’i faipule ia Vui Florence Saulo le finagalo o Maugaoali’i, ma ia talosagaina ai fo’i ma le agaga maualalo le Komiti So’ofatasi, ina ia tatala pea le avanoa i sui o lo o i ai a latou fesili e fia fa’aleo, nai lo le mae’a lea ona fa’aali o latou finagalo, ona latou fa’atula’iina loa lea o le mau e fa’aagafua ai molimau.

 

Na maitauina e le Samoa News le fiu o Maugaoali’i ma Vui, fa’apea ai ma isi sui o le Komiti e pei o le afioga i le ali’i Senatoa ia Magalei Logovi’i e si’i o latou aao mo ni avanoa, ae sa fa’atula’i lava e le afioga a Laolagi Fonoti Savali Vaeao le fesili, po o ai e finagalo e aloaia loa le mau e fa’aagafua ai molimau, lea fo’i na fulisia i ai le maota.

 

Na fautuaina e le Fofoga Fetalai ia Savali Talavou Ale afioga i faipule, ina ia silasila toto’a fo’i i le fa’aiuga ua faia e le Laulau ina ia aloaia ma amanaia, tusa lava pe ua le oo atu le avanoa e fa’aleo ai o latou finagalo.

 

E 4 Ofisa o le malo na iloiloina e le Komiti So’ofa’atasi a le Fono a latou paketi i le taeao ananafi, lea e silia laititi lava i le itula le umi na fesiligia ai paketi a Ofisa ia ae mae’a.

 

Na taua e se tasi o Faipule e fa’apea, tusa lava pe ua i ai tulafono e lima ta’ita’iina ai galuega fa’a Palemene, ae leai lava se mafua’aga e ala ai ona fa’anatinati le fa’atinoina o galuega a le Fono, ona o lea o lo o totogi Senatoa ma Faipule latou te fa’atinoina galuega mo le atunu’u i aso uma mo le 24 itula o le aso, 7 aso o le vaiaso, ma le 365 aso o le tausaga.

 

Ae na fa’ailoa e Laolagi i luma o le Komiti Soofaatasi i le taimi na mae’a ai la latou iloiloga ananafi, o le fa’aiuga e fa’amuta ai le iloiloga a le Kolisi Tu’ufa’atasi, e le o se fa’aiuga na faia e le Laulau, o le fa’aiuga na fulisia uma i ai totino o le Komiti So’ofa’atasi.