O le aso 1 Setema lea ua fa’atulaga e le malo e fa’amanatu aloaia ai le aso mo tagata faigaluega i totonu o le atunu’u, i se sauniga faapitoa o le a fa’ataunu’uina lea i le malae ta’aalo a le Veterans Memorial Stadium i Tafuna.

O le mataupu e faatatau i le faapolokalameina o le Aso mo Tagata Faigaluega i lenei tausaga, o se tasi lea o mataupu sa talanoaina i le fono a le Kovana ma lana Kapeneta i le vaiaso na te’a nei, ona o le manatu ina ia umi se taimi e tapena atu i ai le malo atoa ai ma kamupani ma pisinisi tua i le fa’atauaina o lenei aso taua.

I le fa’aautuina ai o le Aso mo Tagata Faigaluega i lenei tausaga i le autu, “Auaunaga le Fa’atuaoia”, na taua ai e le Faatonusili o le Matagaluega a Tagata Faigaluega a le malo ia Eseneiaso Liu le mae’a lea ona fa’atulaga o le polokalame mo lenei fa’amoemoe, ma ua i ai fo’i Kamupani ma Pisinisi tua ua fa’aalia lo latou sauni e auai i le fa’amanatuina o lenei aso taua.

Talu lava ona tula’i mai le faigamalo a Lolo ma Lemanu, o le 5 ai lenei o tausaga sosoo o fa’amanatuina pea lenei aso taua, e fa’afetaia ai le auaunaga ma le tautua a tagata faigaluega i totonu o le atunu’u.

O se tasi o vaega o le polokalame mo lenei tausaga e pei ona taua e le Komiti o le Tapenaga o loo taitaia e le susuga Muavaefa’atasi John Suisala, o le filifilia lea o le Pulesili a le Pulega o le Eletise ma le Suavai (ASPA), le afioga i le Matua ia Utu Abe Malae ma Failauga Faapitoa o le polokalame.

Ua taua fo’i e le Komiti le i ai o le sao o Kamupani ma Pisinisi tua i le fa’atinoina o le sauniga, e pei o le sisiina lea tagavai atoa ai ma le faitauina o le poloaiga faalaua’itele a le ali’i kovana.

O sui mai le Aufai Faiva, Aufai Faatoaga faapea ai ma Faalapotopotoga a Tama ma Teine i le atunu’u (boy scouts), ua faatulaga latou te sisiina tagavai a le Iunaite Setete ma le tagavai a Amerika Samoa.

O le sui mai le Fale’aiga a le McDonald’s Restaurant ma le Pulesili a le Kamupani a le Nana, le Tausi ia Fiapa’ipa’i Fruean, o i laua ia o le a faitauina le poloaiga fa’alaua’itele a le kovana e aloaia ai le aso faapitoa mo tagata faigaluega i le atunu’u.

E pei ona faia i tausaga uma lava ua mavae atu, o le a aloaia fo’i tautua a ni isi o tagata faigaluega a le malo ma le atunu’u ua fai i lagi le tuligasi’a, e ala i se tula’i fa’aaloalo, pe a mae’a ona faitauina o latou suafa.

Ua fautuaina Matagaluega ma Kamupani tua ina ia tu’uina atu le lisi o a latou tagata faigaluega ua maliliu, ina ia mafai ona aloaia o latou suafa e tusa ai o le latou tautua i le atunu’u.

O le a i ai fo’i ni meaalofa faapitoa mo ni isi o tagata faigaluega ua tele tausaga o le latou tautua, e pei fo’i ona faia i tausaga ta’itasi.

O fa’afiafiaga mo lea aso o le a fa’atinoina lea e Tama ma Tina matutua mai le Ofisa a le TAOA, faapea ai ma sui o le Kamupani a le Nana i le atunu’u.

Na taua e le afioga i le ali’i kovana ia Lolo Matalasi Moliga le taua tele o lenei polokalame, e mafai ai e le malo ona fa’aali le agaga faafetai ma le fa’amalo i tagata faigaluega o loo tautuaina galuega i totonu o le atunu’u.