Ads by Google Ads by Google

Fa’asea Fitafita Tuai: Fa’aletonu tautua Falema’i VA i Hawaii

Le afioga i le ali’i faipule ia Vesi Talalelei Fautanu Jr  [ata AF]
tusia Ausage Fausia

Ua fa’aalia le tagialao mai o ni isi o tama fanau a le atunu’u sa tautua i vaega ‘au a le malo tele o Amerika, o lo o autova’a atu i le falema’i mo Fitafita Tuai i Hawaii mo togafitiga, i le fa’aletonu o le auala o lo o ofoina atu ai e le Pulega a le Falema’i la latou tautua mo i latou.

O se fonotaga sa auai ni isi o Fitafita Tuai sa faia i Hawaii i le vaiaso na te’a nei, na mafai ai ona tu’ufa’atasia sa latou talosaga ma filifilia ai se tasi o latou totino, o ia fo’i lea o le Faipule mai le Itumalo o Manu’a #1, afioga Vesi Talalelei Fautanu Jr mo le fa’aooina mai lea o so latou finagalo e tusa ai o lea fa’aletonu.

O ni isi o Fitafita Tuai mai Amerika Samoa o lo o a’afia i lenei tulaga fa’aletonu, sa malaga atu i latou i le Falema’i mo Fitafita Tuai a le malo tele i Hawai’i mo a latou talavai masani, ma latou molimauina ai tulaga fa’aletonu e pei ona a’afia ai i latou, i le leaga o le tausiaina o i latou, mamao o Fale Talimalo e nonofo ai ma le nofoaga o lo o i ai le Falema’i e faia ai talavai, ma ua i’u ai lava ina toe fo’i mai ni isi o i latou ua le mafai ona fa’ataunu’uina talavai, ona ua le talafeagai taimi o vaalele atoa ai ma le tele o le tupe e mana’omia e tausia ai i latou ao i ai i Hawaii.

Na taua e le afioga i le ali’i faipule ia Vesi i se fa’atalatalanoaga ma le Samoa News i le vaiaso na te’a nei i luga o le telefoni e fa’apea, o le fa’afitauli lea ua to’atele Fitafita Tuai mai Amerika Samoa ua a’afia ai, o ni isi e maua nofoaga e fa’amautu i ai mo a latou talavai, ae o isi fo’i e le maua se nofoaga e fa’amautu i ai, ona tau saili lea o ni Fale Talimalo e nonofo ai, ae na o le $20 le tupe e totogi e le Falema’i mo le taumafataga i le aso.

Ua lata i le 3 masina o i ai le afioga i le ali’i faipule ia Vesi i Hawai’i mo ana talavai ma ni isi o fonotaga, ma ua fa’amoemoe e toe taliu mai i le atunu’u i se taimi o le masina lenei o Aokuso.

“O se tasi o fa’afitauli lea ua a’afia ai nai Fitafita Tuai mai Amerika Samoa e malaga mai i Hawaii mo a latou talavai, ua le toe taliaina e le Falema’i o Fitafita Tuai le polokalame sa latou totogiina ai le pasese o se tagata e malaga mai ma le Fitafita Tuai mo ana talavai, ma fesoasoani i le fa’ainuina o fualaau ma isi lava tulaga e mana’omia, pe afai o le Fitafita Tuai o se tagata e matua tulaga fa’aletonu lava lona malosi, ma ua mana’omia ai lona faletua poo se isi o le fanau e to’alua ma le tagata ma’i, o le isi tulaga faigata lena o lo o tula’i mai i le taimi nei, e leai se tagata malosi e fesoasoani i le tagata ma’i o lo o malaga mai mo le fa’atinoina o soo se mea e mana’o i ai”, o le saunoaga lea a Vesi mai le telefoni i Hawaii.

O le to’atele o nai Fitafita Tuai o lo o malaga i Hawaii mo a latou talavai, e le tele ni vaega tupe latou te maua, se’i vagana lava le litaea mai le malo tele, e le lava fo’i ni tupe e totogi ai ni ta’avale e feoa’i ai, o le mafua’aga lena e pu’e ai le pasi e o ai i a latou talavai, ae afai la e mamao le nofoaga lea o lo o i ai le fale talimalo o lo o nonofo ai latou, ae tau pu’e le pasi i le vaveao e malaga atu ai i le talavai, o ni isi o i latou e taunu’u atu ua te’a mamao le taimi o le talavai, ma i’u ai lava ina le fa’ataunu’uina, ma ua avea ai ma tulaga ua fa’aletonu ai ma a latou fa’amaumauga i tulaga o talavai.

“E lagona le fa’anoanoa pe a vaavaai atu i le tulaga o lo o ofo atu ai le tautua a le Falema’i o Fitafita Tuai i Hawaii nei i nai o tatou Tama ma Tina mai Amerika Samoa, ma ua fesiligia ai le mafua’aga ua fa’apea ai ona fa’atino la latou tautua”, o le saunoaga lea a Vesi, ma ia taua ai lana fuafuaga i le valaauina lea o se iloiloga ma le Ta’ita’i o le Ofisa o Fitafita Tuai i le atunu’u pe a taunu’u mai, se’i fesiligia i se fesoasoani a le Ofisa mo Fitafita Tuai a le atunu’u o lo o malaga atu i fafo mo a latou talavai”, o le saunoaga lea a Vesi.

Sa ia taua fo’i le tatau lea ona i ai se tagata faigaluega se to’atasi e galue i Hawai’i, ina ia fesoasoani i Tama ma Tina matutua o lo o aga’i atu mo le fa’atinoina o a latou talavai, ina ia taofia ai le toe tula’i mai o lenei fa’afitauli i le lumana’i.

“Ou te talitonu le agaga o le Kovana e fia fesoasoani i Fitafita Tuai, ae foliga mai i le tulaga lea ua i ai le tautua a le Falema’i o Fitafita Tuai i Hawaii nei, ua amata ona le toe fa’atauaina le auaunaga sa ofoina atu e tautua ma puipuia ai le filemu i totonu o le malo tele i tausaga ua mavae, ona o lea ua vaavaai atu, ua sona fetulina’i solo nai o tatou tagata e saili ni nofoaga e nonofo ma fa’amautu ai, ae ua le fa’ataunu’uina la latou tiute e tatau ona faia”, o le saunoaga lea a Vesi.