Ads by Google Ads by Google

Fa’asea to’atele o tagata mai fafo i suiga ua faia Ofisa Femalagaaiga


[ata: SN]
ausage@samoanews.com

Ua avea suiga ua fa’atula’i e le Loia Sili i le tautua a le Ofisa o Femalagaaiga a le atunu’u ma mafua’aga o le tele o fa’asea ma ni isi o tagata mai fafo, o lo o autova’a atu mo le pu’eina o a latou I.D mai le Ofisa o Femalagaaiga, ina ia tusa ai ma tulafono tau Femalagaaiga lo latou aumau ai i le teritori.

 

O le suiga fou e pei ona fa’ataoto e le afioga i le Loia Sili ia Talauega Eleasalo Ale, ua avea ai le aso Lulu o vaiaso uma, o le aso lea e pu’e ai I.D a tagata mai fafo, suia mai ai i le tulaga tuai sa i ai, o le mafai lea ona pu’e le I.D a le tagata mai fafo i soo se aso o le vaiaso.

 

Na fa’atumulia le Ofisa o Femalagaaiga i Utulei i le to’atele o tagata na laulaututu i le laina mo le tele o itula, ao tau fa’agasolo le pu’eina o a latou I.D. O ni isi o i latou na toe fo’i e le i pu’eina ni I.D ina ua fiu e tutu i le laina. Ae o isi na toe fo’i ona o galuega ma ni isi o fuafuaga fa’atino.

 

Na taua e se tasi o Tama matua i le Samoa News e fa’apea, afai ua i ai ni fa’aletonu i totonu o le tautua a le Ofisa o Femalagaaiga, e tatau la ona saili e le malo le auala e fofo ai ia fa’afitauli, ae le o le faia o suiga e pagatia ai tagata mai fafo o lo o maua ai tupe a le malo i tausaga uma.

 

“Aisea o le a safa ai fua matou o tagata mai fafo pe afai o lo o masalomia le le fa’amaoni o tagata faigaluega i le fa’atinoina o a latou tiute. I lo’u lava taofi na o a’u, afai o tagata faigaluega a le Ofisa o Femalagaaiga le mafua’aga, e tatau ona fai i ai se fuafuaga, ae le o le faia o nei suiga ua tele ai le safa ma le tigaina o tagata mai fafo, ae o i latou nei o lo o maua ai isi vaega tupe mo le malo,” o le fa’asea lea a se tasi o Tama.

 

Na taua e se tasi o tagatanu’u o Amerika Samoa na oo atu e fa’afou pepa nofomau a ni isi o lona aiga mai Samoa o lo o ia sponsor e fa’apea, e le mafai e le malo ona foia le fa’afitauli o lo o tula’i mai, se’i vagana ua sui tagata faigaluega o lo o masalomia lo latou fa’atinoina o nei faiga le fa’amaoni.

 

“E le fou le mataupu e fa’atatau i I.D pepelo o lo o tuuina atu e le Ofisa o Femalagaaiga i tagata mai fafo. Sa tutupu i nofoaiga ua mavae, lea fo’i na mafua ai ona molia ni isi o tagata faigaluega i le tulafono ma fa’asala i le falepuipui ina ua ta’usala i latou. E le o tagata mai fafo la le mafua’aga, o totonu lava o le lotoifale a le malo,” o le saunoaga lea a le sponsor.

 

Na taua e le afioga i le Loia Sili a le malo ia Talauega Eleasalo Ale i le Samoa News e faapea, o suiga e pei ona faia i le tasi lea o le aso e pu’e ai I.D a tagata mai fafo, o se tasi lea o vaega o le fuafuaga a le kovana ua fa’ataoto, ina ia taofia ai le tuuina atu o I.D pepelo i tagata mai fafo.

 

Na fesili le Samoa News pe le o i ai se fuafuaga e toe iloilo toto’a lenei suiga, ona o tulaga fa’aletonu e pei ona molimauina i le to’atele o tagata ua a’afia uma i lenei suiga, ae na saunoa le Loia Sili e fa’apea, o le a se’i toe vaavaai i ai i se taimi o i luma.

 

Na taua e se sui o le Komiti Fa’afoe a le Ofisa o Femalagaaiga i le Samoa News e fa’apea, talu ona fa’atula’i mai e le Kovana le latou Komiti Fa’afoe fou lenei, ua tele talosaga mo pepa nofomau tagata mai Asia ua latou teena.

 

O le tele o talosaga a tagata mai Asia sa teena, o talosaga na fa’aulu e pisinisi o lo o pulea fo’i e tagata Asia, mo se avanoa latou te sponsor ai tagata Asia e galulue i a latou pisinisi, i lalo o le vaega o le Tulafono lea e mafai ai e le pisinisi ona sponsor tagata mai fafo.

 

Ua le masino le tele o taimi e fautuaina ai e afioga i Senatoa ma Faipule sui o le faigamalo, ina ia silasila toto’a i auala e fa’atonutonu ai le soona ulufale mai o tagata mai fafo i le atunu’u, aemaise lava i tagata mai Asia.

 

O popolega e pei ona fa’aalia e ni isi o Senatoa ma Faipule, o le tele o galuega ua ave uma e tagata mai Asia, ae o galuega nei sa tatau ona galulue ai tagatanu’u o Amerika Samoa.