Ads by Google Ads by Google

Fa’afetaia le tautua a tagata faigaluega uma a le atunu’u

 Ta’ita’i o le Fono i le taimi o le savali a le Fono Faitulafono, i le fa’amanatuina o le aso o tagata faigaluega i le atunu’u i le taeao o le aso Faraile na te’a nei.  [ata AF]Se vaaiga i tagata faigaluega a le malo ma pisinisi tua i le fa’amanatuina o le aso o tagata faigaluega i le atunu’u i le aso Faraile na te’a nei.  [ata AF]
"E le mafai ona manuia se fa’amoemoe pe afai e le tasi le loto o tagata faigaluega ma o latou ta’ita’i........."

Na fa’aaoga e ta’ita’i o le malo ma le atunu’u le polokalame e fa’ataua ai le sao ma le tautua a tagata faigaluega lautele i Amerika Samoa, lea na fa’atautaia i le malae ta’aalo i Tafuna i le aso Faraile na te’a nei, e fa’afetaia ai le tautua ma galuega lelei o lo o fa’aauau pea ona fa’atinoina e i latou uma ua taua, o tagata faigaluega i totonu o le atunu’u.

 

I le fa’aautuina ai o le polokalame mo lenei tausaga i fuaitau nei, “E manuia pe a tatou galulue fa’atasi”, na fa’atauaina ai i saunoaga a i latou uma sa maua le avanoa e saunoa fa’afetai ai le upu o le “galulue fa’atasi” ma le “loto e tasi” i soo se galuega e fa’atinoina i totonu o galuega.

 

Na matua fa’atumulia le malae taaalo i Tafuna i tagata faigaluega a le malo fa’apea ai pisinisi tua, na lolofi atu e auai i le molimauina o le tausaga lona 4 lenei talu ona fa’atauaina e le faigamalo a Lolo ma Lemanu le aso fa’atauaina mo tagata faigaluega i le Teritori.

 

O le susuga i le Feagaiga ia Rev. Elder Evagalia Ioane mai le Ekalesia EFKAS i Utulei na ta’ita’ia le sauniga lotu pu’upu’u e tatala aloaia ai le polokalame, soso’o ai loa ma le sisiina o tagai a le malo tele atoa ai ma le tagavai a Amerika Smaoa, e pei ona galulue i ai ali’i ma tama’ita’i Leoleo.

 

Na si’itia e le susuga Rev. Elder Ioane le tala e fa’atatau i le taimi na filifilia ai e le Atua le au tau a Iosua mo le tauina o le taua, lea na fa’aitiitia le au tau i le to’a 300 tagata totoa’, o i latou ua tasi o latou loto ma sauni e tau mo Isaraelu.

 

“E le mafai ona manuia se fa’amoemoe pe afai e le tasi le loto o tagata faigaluega ma o latou ta’ita’i, e le mafai fo’i ona manuia se taumafaiga pe afai e feeseesea’i ma fefulituaa’i tagata o se atunu’u, ae afua loa ona loto gatasitasi tagata uma, ona vaaia loa lea o tulaga manuia i soo se taumafaiga”, o se vaega lea o le saunoaga a Rev. Elder Ioane.

 

O le afioga i le Tama’ita’i Fa’atonusili o le Ofisa o Galuega Lautele a le malo ia Faleosina Voigt na lagiina le vi’i o le tagavai o le malo tele, ae o le afioga ia Tapumanaia Galu Satele Jr, le sui fa’atonusili o le Ofisa e Puipuia aia tatau o tagata e i ai manaoga fa’apitoa o le tino ma le mafaufau, na lagiina le vi’i o le tagavai a Amerika Samoa, ao taina e le faili a le Silva Band si’i o tagavai e lua.

 

O le afioga i le Fa’atonusili o le Matagaluega a Tagata Faigaluega a le malo, tofa Le’i Sonny Thompson na fai ma fofoga o le aso, lea na ia fa’alauiloaina i laua e to’alua na faitauina le Poloaiga Fa’alaua’itele a le Kovana e fa’ataua ai le aso faapitoa mo tagata faigaluega a le malo, le susuga ia Kalili Hunt, o le Pulesili lea o Tagata Faigaluega a le kamupani i’a a le Samoa Tuna Processor Inc na faitauina le gagana faaperetania, ae o Tofiga Tufele, o le Taitaifono o le Asosi a Tausima’i i Amerika Samoa na faitauina le gagana Samoa.

 

E to’alima i latou na saunoa i saunoaga fa’apitoa eseese o le sauniga, e pei ona fa’atulagaina i le polokalame a le Komiti sa latou tu’ufa’atasia le polokalame mo aso o tagata faigaluega lautele i le atunu’u, ma o ni isi o i latou nei e aofia ai le Peresetene o le Senate, le afioga i le Tama’ita’i o le Ao ia Gaoteote Palaie Tofau ma le afioga i le ali’i kovana sili, le tofa i le Tootoo ia Lolo Matalasi Moliga.

 

Na taua e le afioga a Gaoteote i lana saunoaga e fa’apea, i le silia ai i le 46 tausaga o lana tautua i vaega ‘au a le malo tele fa’apea ai ma lana auaunaga i totonu o le malo o Amerika Samoa, sa ia a’oa’oina mai ai i le tele o nei tausaga, e 2 ituaiga tagata o lo o i ai i soo se galuega, o le tagata faigaluega ma le tagata ua tofia e fai ma ta’ita’i.

 

“Atonu e talitonu uma ta’ita’i o le atunu’u o lo o i ai i le fa’amoemoe i lenei aso i la’u fa’amatalaga lenei, o outou uma o loo laulaututu mai i lalo o le malae i lenei aso, o outou moni ia ua fa’alupe, o tagata faigaluega o lo o fitaituga i le fa’atinoina o galuega i aso ta’itasi, ae o ta’ita’i uma e aofia ai ma a’u o lo o i totonu o le fale i lenei aso, matou te talitonu fa’atasi, o i matou nei ua taua o ta’ita’i, matou te fa’aeaea ma fa’afetaia la outou tautua o lo o fa’atinoina i le aso ma le po, ona o lo outou naunau e tautua le malo, aiga ma le atunu’u”, o le saunoaga lea a Gaoteote.

 

“O outou o meatotino a le malo, e fa’amemelo ma fa’afetaia e le malo la outou tautua, o la outou tautua matavela, o la outou tautua fa’amaoni, o la outou tautua le fa’alogologo tiga, e le gata i tagata faigaluega uma lava i Amerika Samoa, ae fa’apea ai fo’i i alo ma fanau o loo tautua i vaega ‘au a le malo tele, matou te fa’apea atu, ua mafua ona manuia faufuaga fa’ataoto a le malo, aiga ma afioaga i aso ta’itasi, e mafua mai i la outou galuega o lo o fa’atinoina, ua outou le fa’atali i se laolao, pe fa’atali fo’i i se taui, ae ua outou galulue punoua’i e faia mea lelei uma ma le fa’amaoni ina ia manuia ai le atunu’u”, o le saunoaga lea a Gaoteote.

 

E lei fa’agaloina fo’i e le afioga a Gaoteote i lana saunoaga le tautua a Toa o Samoa, o lo o tauina le taua ona o le manatu i le puipuiga o le saogalemu o tagata uma ma le lalolagi, i le taimi o lana saunoaga fa’afetai.

 

I le malolo litaea mai ai i le vaega a le Fua va’a a le malo tele sa tautua ai mo tausaga e 22, na taua ai e le afioga i le Tama’ita’i o le Ao le faigata o le galuega o le ofoina atu lea o le ola e puipuia ai le saogalemu o tagata uma.

 

“E le fa’agaloina le tautua toto o loo fa’atinoina e alo ma fanau a Samoa i soo se tafa o taua, fa’amalo mo la outou tautua fita, e le faigofie la outou galuega, o le galuega e fitifiti ma lamatia ai le soifua, ae tou te le fa’atafa ai lava, ona o le manatu e fa’atino le auaunaga sli mo le atunu’u”, o le saunoaga lea a Gaoteote.

 

I le mae’a ai o saunoaga fa’apitoa o le aso, na fa’ai’u ai loa le polokalame i ta’aloga, ae taualuga i sauniga i pese fa’aleaganu’u, lea na saunoa e le Ofisa o Tagata, i lalo o le ta’ita’iga a le afioga i le ali’i Fa’atonusili ia Ale Tifimalae ma lona Ofisa.