Ads by Google Ads by Google

Fa’aauau tufatufaina fesoasoani mo aiga na mafatia i le ‘afa o Gita


O se vaaiga i se tasi o faleie a le FEMA, i se tasi o nofoaga i Tafuna. O nei faleie e fa’atutuina e le malo lotoifale mo aiga sa afaina o latou fale ona o le ‘afa o Gita. [ata: FS]

Vaaiga i totonu o faleie mai le FEMA mo aiga ua fa’aleagaina fale e le ‘afa o Gita. [ata: FS]
ausage@samoanews.com

O le vaiaso nei lea ua toe fa’aauau mai i ai le tufatufaina o meaalofa ma fesoasoani mai le Koluse Mumu, mo aiga uma o le atunu’u na matua pagatia ma a’afia o latou maota ma laoa, ona o le malosi o le ‘afa o Gita na a’afia ai si o tatou atunu’u i le 2 vaiaso talu ai.

 

Ma o le vaiaso ua te’a na amata ai ona fa’atutu faleie mo i latou sa afaina fale i le ‘afa o Gita ma o nei falei mai le vaega a le fetarale o le FEMA.

 

FESOASOANI KOLUSE MUMUA

 

E pei ona fa’amaonia mai i se ripoti mai le Ofisa o le Koluse Mumu i le aso Faraile na te’a nei i le Samoa News, o le itula e 10:00 i le taeao nei lea ua fa’atulaga e tufatufaina ai meaalofa ma fesoasoani mo le itumalo o le Maoputasi, e amata atu lava i Fagaalu seia oo atu i le afioaga i Lauli’i.

 

O le maota o Tupulaga Talavou i Pago Pago lea ua fa’atulaga e tufatufaina ai meaalofa ma fesoasoani e pei ona taua.

 

O le itula e 2:00 i le aoauli lea ua fa’atulaga e tufatufaina atu ai meaalofa ma fesoasoani mo afioga e i ai Amouli, Amaua, Sailele, Aoa, Tula, Alofau ma le motu o Aunu’u. O le maota o le afioga a Fuata I’atala lea ua fa’atulaga e fa’amaopoopo ai lea fuafuaga.

 

O le taeao o le aso Toona’i na te’a nei na tufatufaina ai meaalofa i afioaga e aofia ai Vaitogi, Iliili ma Fogagogo i le maota o le afioga a Mase Akapo i Vaitogi.

 

Ae o le aoauli o le aso Toona’i na oo atu ai le fa’asologa i afioga e aofia ai Malaeloa ma Futiga. Ae o le isi pitonu’u sa aofia ai Faleniu, Malaeimi, Mesepa, Mapusagafou ma Peva’ia’i.

 

O le aso Tofi o le vaiaso na te’a nei, o le ulua’i aso lea na tauaaoina ai meaalofa ma fesoasoani mo ni isi o afioaga i le itu i sisifo ma sasa’e o le motu nei.

 

O afioaga na a’afia i le ulua’i sapalai e aofia ai Nuuuli, Fagaima, Afono ma Vatia. O meaalofa o lo o tauaaoina atu i aiga na mafatia e aofia ai kula, o ogaumu fai meaai, lavalava, falei’e, atoa ai ma le anoanoa’i lava o fesoasoani e moomia i taimi pagatia ua i ai le atunu’u.

 

Ua fautuaina le atunuu aemaise aiga o loo mafatia ina ia aga’i atu loa i nofoaga e pei ona taua mo le tauaaoina o a outou meaalofa ma fesoasoani.

 

FA’AALIGA MAI LE MALO - AIGA AFAINA FALE ‘AFA O GITA

 

O le fa’aiuga o le vaiaso ua te’a sa fa’ailoa mai a le e le ofisa o le malo, le Emergency Operations Center (EOC) in Tafuna, e fa’apea, e fautuaina le mamalu o le atunu’u o e sa fa’aleagaina o latou maota  i le ‘afa o Gita ae le i oo atu i ai le siakiina ina ia va’aalu atu lo latou ofisa i le 699-3800 pe fa’afeso’ota’i lou pulenu’u.

 

FESOASOANI FALEIE A LE FEMA MO LE ‘AFA GITA

 

Mai le ofisa o le EOC, e fautuaina le mamalu o le atunu’u oe sa faaleagaina o latou maota i le ‘afa Gita ae le i o’o atu i ai le siakiina ina ia vala’au mai i le 699-3800 pe faafesootai fo’i lou pulenuu.

 

E tusa ai ma le faasalalauga faalavelave tutupu faafuase’i a le Peresitene o Amerika, ona o le afa o Gita, o lea ua o’o mai ai le vaega a le FEMA mo se fesoasoani i faleie. O le a maua atu se fesoasoani mo i latou uma ua faalegaina o latou maota.

 

E pei ona taua i pepa o fa’amatalaga a le EOC e fa’apea, o le a logoina atu e le pulenuu i latou uma ua faaleagaina o latou maota e tusa o le tufatufaina atu o nei faleie. O le a tufatufaina atu e le Koluse Mumu ia fesoasoani aua aiga ua mafatia i le afa o Gita. 

 

E fautuaina le mamalu o le atunuu, a saogalemu o tou laoa ma maota, ia faaaoga pea e nonofo ai ina ia avanoa ai maota lavea’i mo i latou ua faaleagaina o latou maota ma laoa.  E le avea lou alala ai i maota lavea’i ma auala e tele ai fesoasoani e te maua.