“Na mua’i lapata’i mai Saina ia Amerika, ina ia le oso fua i totonu o fe’ese’esea’iga a malo o Asia i saute, a’o le’i to’ai taunu’u le malaga a le tama’ita’i Failautusi o le Setete Hilary Clinton i totonu o Saina mo le lua aso.” O se fa’alauiloaga lea sa fa’asalalauina i tala tusia i le Associated Press.

Na fa’ato’a o’o atu Hilary Clinton i Saina ae ua mae’a talanoaga sa faia i Initonesia, lea sa tautalagia ai tulaga o fe’ese’esea’iga i le va o malo o Asia i Saute. Peita’i, i totonu lava o Initonesia, sa ia matua fautuaina ai le galulue fa’atasi o malo o Asia ina ia tu’ufa’atasi o latou loto ma tutu fa’atasi e malosi se latou maliliega, ia le toe maluelue ai le nofo lelei, pe fetaumatea’i ai malo.

I le asiasiga lava lea sa talanoaina ai e Clinton ma sui o le Malo o Saina tulaga o i ai Syria, Iran, ma North Korea. Na fa’ato’a to’ai taunu’u Clinton i Bejing i le afiafi o le aso Lua ma sa latou faia fonotaga i le aso Lulu atoa e tusa ai o nei mataupu ua mua’i fa’ataoto.

Na faailoa le manatu o Saina a’o le’i o’o atu le faigamalaga a le tama’ita’i Failautusi o le Setete e fa’apea, “O lo’o i ai le matou fa’amoemoe, ia le ‘auai mai Amerika e ‘au’au ma se tasi o nei malo e fe’ese’esea’i, ae ia tumau pea ‘lona le aia’ i nei mea e vevesi ai faigamalo i le vasa o Saina i Saute.”

O le nusipepa a le Xinhua, sa latou tu’ua’ia le failautusi o le setete, o le a mafua ai ona fa’atetele vevesiga i le va o nei malo i le vasa o Saina i Saute, aua o le a nofo masalosalo le isi malo i le tasi. Ua fa’ailoa mai e fa’apea, “E ui ina e lelei tele fa’aupuga a le tama’ita’i failautusi o Amerika, ae o le taimi lenei e le tatau ai ona oso fa’asalavei mai fua Amerika i totonu o le li’o o malo o lo’o tau tu’ufa’atasia so latou leleiga.”

O le popolega o lo’o ia Amerika, ona o lo ua iloga mai, o le ‘au o Saina i se tasi o nei malo, ua mafua ai ona vevesi atili le mataupu, peita’i, o lenei mataupu, pe afai lava e mafai e nei malo uma ona tu’ufa’atasia se latou feagaiga ma ia fa’amautu atili mea e faia e malo uma, ia laugatasia ai o latou lagona ma fa’aauau ai ona nofo lelei i latou.

Ua fai si malosi o le una’i mai a Saina i le itu vasa o Scarborough Shoal, ma ua fa’ataututu fo’i a latou faigamea i le tai ma va’a o Filipaina ona i lea maea, ae o le ogasami e ao ina tu’u maoti ia Filipaina. O le agaga atoa o Amerika, “Ia taofia pea le nofo filemu o malo uma i lea ogasami o le lalolagi, ina ua nofouta i latou i a latou feagaiga osia, ma tausisi ia fa’amalosia.”

Sa ia toe fa’amamafa mai lava, “E tatau ona mafaia e nei malo i le atuvasa lea, ona utagia feagaiga osia, fa’amalosia malo uma ia tausisi i nei maliliega e aoga uma mo malo ta’itasi o aofia ai, ma ia talitonu e mafai ona nofo filemu malo uma i le tulaga galulue fa’atasi, ae le o le taumafai le isi malo e fa’amataga le isi malo, e fouvale fo’i e fa’aaogaina ai au’upega mata’utia fa’aneionapo.”

I se tasi o fonotaga fa’apenei sa mua’i usuia i Cambodia ia Iulai 2012, o Malo uma nei o Asia na le mafai ona tu’ufa’atasia e i latou se latou maliliega ona o le tele lava o fe’ese’esea’iga talu ai mea na mua’i tutupu i o latou va. Peita’i na finau mai Filipaina ma Viet Nam o Cambodia lea ua leva ona ‘au’au fa’atasi ma Saina ma ua mafua ai ona le gaua’i mai e faia se maliliega.

“E ui ina ua mae’a fa’aalia le finagalo o Clinton i lenei fonotaga, o lo’o lava le avanoa e mafai ai ona aofia fa’atasi Saina ma Amerika i le atuvasa o Asia, ae o lo’o mo’omia pea e Uosigitone ni galuega fa’amautu atili e fa’aleleia ai pea latou so’otaga ma Saina.” O se tala lea na tusia ma i le nusipepa ale Xinhua i Saina.

saunia: Leua Aiono Frost