Pago Pago - AMERIKA SAMOA

E ui i le tele o fa’asea ma muimuiga mai i nisi o le mamalu o le atunu’u, ae peitai, na fa’aalia e Afioga Senatoa i le amataga o le vaiaso, le tumau pea o la latou faaiuga, e fa’aauau pea ona fa’asalalauina ma le pu’eina, e le gata i luga o televise ae faapea upega tafailagi, ia tauaofiaga a le maota i aso taitai, e aofia ai ma iloiloga o sui Faatonu.

Ina ua lata ina tapunia la latou tauaofiaga masani, sa saunoa ai e Afioga i le Peresetene o le Senate, ia Tuaolo Manaia Fruean, e tusa ai ma le tele o fa’asea ua va’aia o feavea’i i luga o upega tafa’ilagi, e tusa ai ma amioga fa’aalia a nisi o sui o le Senate, i taimi o iloiloga a sui Faatonu, ua filifilia e le kovana mo tofiga taitai i totonu o lana kapeneta.

Ma sa fa’alauiloa mai ai e Tuaolo le taloina o se fonotaga i le 8:30 i le taeao ananafi, mo le soalaupuleina o lenei mataupu, e faia ai se fa’ai’uga, pe tatau pea ona fa’aauau ona fa’asalalau ia tauaoafiaga a le Maota.

Sa saunoa Tuaolo i le toatele o tagata Samoa i le militeri ma i atunu’u i fafo, o lo’o fiafia e matamata i vaega o a latou iloiloga o lo’o fa’asalalau i luga o le ‘YouTube’, ona o lo’o latou nofo malamalama ai i isi mataupu taua o lo’o a’afia ai le malo.

Ae peitai, sa fa’aalia e Tuaolo sona atugaluga ona o le tele o fa’asea, ua fesiligia ai le mafuaaga ua le su’esu’eina ai sui Faatonu, se’ia vagana le talanoaina o faia fa’aleaiga.

Sa ia ta’ua nisi ua tu’ua’ia le Afioga i le Senatoa ia Togiola T.A. Tulafono ona o le malolosi o lona su’esu’eina o nisi sui Faatonu, ae leai ni fesili mo isi sui Faatonu.  Aemaise ai nisi ua faia ni faamatalaga le matagofie e fa’atatau i le tama matua, le Afioga i le Senatoa ia Muagututi’a Tauoa.

Na toe faaleoina e Tuaolo sana saunoaga na faia i se iloiloga i le vaiaso ua mavae, lea na ia faamamafaina ai le le’i fa’aopoopoina atu o Tutuila ma Manu’a i le Iunaite Setete, e ni tagata na umia ni fa’aailoa faaleaoaoga.  Ae ona o le tofa ma le faautaga mamao a tua’a ua lagomau mai i tia sa, lea ua ‘ae’ae ai le teritori, i faamanuiaga mai i le malo o Amerika.

Ma na saunoa Tuaolo, ua iai nisi ua o latou manatu, ua sili atu tulaga e latou te iloa, mo Amerika Samoa ma ua o latou fautuaina le tatau ona palotaina o sui o le Senate, e pei o Faipule o le Maota o Sui. 

E le gata i lea, ua iai nisi ua lauina i latou o toeai’ina, e le malamalama i le faagaioiga o le malo.  Ma o se tulaga na ta’ua e le Afioga i le Peresetene, e le moni ma le fa’aalia o le le fa’aaloalo.

Na fa’aalia e Tuaolo e faapea, e le popole tele lona tagata i fa’asea ua faia faasaga ia te ia, ona ua loa ona iai i totonu o faiga polokiki ma ua masani ai.  Ae popole lona loto ona o afioga i Senatoa o le maota, aua o ia sa mana’o e pu’e ma faasalalau ia tauaofiaga a le maota, amata mai i le fa tausaga ua tuanai.

Ma o le mafua’aga lea sa ia finagalo ai ina ia soalaupuleina lenei mataupu, ma a finagalo iai afioga i Senatoa e aua le toe pu’eina a latou tauaofiaga, o le a faapea loa ona faia.

Ae peitai, i le finagalo fa’aalia a le Afioga i le Senatoa ia Togiola T.A. Tulafono, sa ia ta’ua ai e faapea, e leai se malosi i lenei lalolagi e mafai ona taofia tagata mai i le tomumu ma le fa’asea, po o le taufa’aleaga o seisi tagata.  Sa ia faamamafaina e faapea, o le natura lea o le tagata ma o a latou fa’asea, o se auala lea ua latou manatu, o lo’o fesoasoani ai ina ia fa’alauiloa mea o lo’o latou manatu, o sese.

Ma na saunoa foi Togiola, e tatau i sui o le maota ona talia le mea moni, e le ‘au uma loto o tagata i a latou fa’ai’uga o le a faia, e aunoa ma se fa’atu’i’ese.  E iai lava le tagata, o le a fa’asea ma le tagata o le a tomumu.

O lea sa ia u’una’ia ai le Senate ina ia opogi fa’asea ma fa’atu’I’ese a tagata, aua e aoga nisi o nei fa’asea, e mafai ai ona fa’aleleia la latou galuega o Senatoa.

Na fa’aalia foi e Togiola le salalau o le mataupu ona o ‘Api o Foliga’ (Facebook), lea ua maua ai e so’o se tasi, mai i matai alii ma tulafale, seia o’o i se tamaititi/teineititi a’oga e 14 tausaga, ia le avanoa e faaleo ai o latou lagona.  

Sa saunoa Togiola, e tofu tagata uma ma le aia tatau e fa’aali ai o latou manatu.

Ma na ia u’una’ia ai le Peresetene ole Senate, ina ia fa’aauau pea ona fa’asalalau ia tauaofiaga a le maota, i luga o upega tafa’ilagi, aua o i latou o lo’o faasea, ua na o sina fasi fuainumera, pe a faatusatusa atu i le toatele o lo’o faaalia o latou agaga fa’afetai, i le faatinoga o latou tiute.

Na finau le Afioga i le Senatoa a le itumalo o Sua, o le tulaga lea o lo’o manana’o iai tagata.  Ia matala uma mataupu ma iloiloga, i la latou tagataga’i ma faalogo.  Ma o le tiute lea a le maota, ina ia folasia atu mea uma i luma o tagata, pe fiafia iai pe leai, o le latou na faitalia.

E tusa ai ma le tulaga sa saunoa iai Tuaolo, i le auala o lo’o su’esu’e ai e Togiola nisi o taitai fa’aolioli, ae le fesiligia ni isi, sa saunoa Togiola, o le tulaga e le o manino i tagata, o so’o se sui e o’o atu i luma o le Senate, ua mae’a ona faitau ma nofo malamalama afioga i Senatoa, i o latou tala’aga, fa’alesoifuaga, faaleaoaoga ma tulaga o agava’a faigaluega.

Ma sa ta’ua e Togiola, a ia va’ai i tulaga e iai ni feteena’iga, ona ia su’esu’eina lea o ia tulaga, se’ia faamalieina lona tagata, ua malamalama i lea tulaga ma’oti.  Ae afai e na te iloa, e leai se mafuaaga e fesiligia ai fua se tasi ma ua fa’amalieina lona sui e uiga i lea tagata, e ala i faamaumauga ua o latou maua e uiga i lea tagata, ona le faia lea o ni ana fesili.

Sa lagolagoina e le Afioga i le Senatoa ia Muagututi’a ia le manatu fa’aalia a Togiola ma sa ia ta’ua foi le le tena o sona finagalo i faamatalaga ua salalau e uiga ia te ia, aua o lapisi ia mea uma.

Na saunoa Muagututi’a, o le a ia fa’aauau pea ona faaleoina mea i lona mafaufau ma lona agaga, i taimi o tauaofiaga a le Fono, ma e na te le o popole i manatu a tagata, aua e na o le Atua e na te mata’u iai.

Ma sa fa’apea ona taula’i le pupula a Muagututi’a i se tasi o masini pu’e ata a le Fono ma ia lu’itauina so’o se tasi o fia fa’asea ia te ia, ina ia alu atu i le Maota Fono e fai sa’o atu i ona foliga, ae le o le pisa e pei o se loomatua ma la’u lapisi i luga o upega tafailagi i lalo o igoa pepelo.

Sa fa’aleoina e Tuaolo le agaga fa’afetai i Afioga i Senatoa ona o manatu fa’aalia e tusa ai ma lenei mataupu taua ma ia saunoa e faapea, atonu o le mafua’aga lea e le o finagalo ai le Fofoga Fetalai e fa’asalalau a latou tauaofiaga i luga o upega tafa’ilagi.

Ma lana toe saunoaga, o le a fa’aauau pea ona fa’aalalauina tauaofiaga ma iloiloga a le Senate, i luga o le TV ma upega tafa’ilagi.