TU LUA O PO MA AO
VAEGA 37
E faatalofa atu i si o tatou aiga i lenei taeao fou. Tatou te si’i faatasi le mua ma le viiga faafetai i le Tapaau i le Lagi ona o Lana pule faasoifua, o Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama. E faafetai atu foi ia te outou o lo o lagolagoina lenei auaunaga i vaiaso taitasi.
Ae saga’i mai loa, o le a toe soso’oina le tatou tala i le alii o Tavita ma le tamaitai o Tepora ma le tau sailiga o le ‘diary’ faitatala lenei ua fasiotia ai nai mafine o Rasela ma Tina.
*****************
Na gata mai le tatou tala i le vaiaso ua mavae, i le taimi o lo o iai Tepora ma Tavita ma uso o tina a Tepora, i se pati a le nu’u ma o lo o taumafai Tepora e ave’ese mai uso o lona tina mai le pati e aunoa ma le iloa e tagata, ona o le alii o Iosefa.
O Iosefa, o se tagata e sau mai i le nofoaga na tupu ma soifua mai ai Tepora i lona aiga moni. Ae ona o se faalavelave sa tula’i mai, na ta’uleaga ai le aiga o Tepora, o le mafua’aga lea na o ese ai Tepora ma uso o lona tina mai lo latou nu’u.
Ua fefe Tepora ina ne’i iloa e Iosefa, le alii mai lo latou nu’u moni, o ia ma uso o lona tina, ona ia ta’uina lea i tagata o lo o i le pati, e le o lona igoa moni ia Tepora ma le mafuaaga moni na o ese ai mai lo latou nu’u.
A’o tutu Tepora i fafo o le fale e tau mafaufau se auala e ave’ese mai ai uso o lona tina mai totonu o le pati, ae fa’ate’ia o ia i le pa’i atu o se tagata i lona tau’au ma lona liliu mai o Tavita. Ae atili faateia le tamaitai ina ua ia ta’u atu ia Tavita le mea o lo o manao ai, ae faapea mai Tavita, “Ou te iloa o lo o e taumafai e sola ese mai ia Iosefa ma ou te iloa foi le mafuaaga. Ou te iloa e le o lou igoa moni ia Tepora.”
Na pei e oso Tepora i se niu ina ua fai atu le tala lea a Tavita. “Na faafefea ona e iloa? Ae o le a le umi talu ona e iloa?” o le fesili atu lea a Tepora. “Leai, ou te le o fia iloa i le taimi nei. Na o le pau le mea taua, o le matou o ese atu ma uso o lo’u tina, ae le i iloa mai matou e Iosefa.”
Ae na faate’ia le tamaitai o Tepora i le faapea atu o Tavita, “Se’i uma se ta siva ona tatou o lea.” Ua fiu Tavita e toso atu Tepora i totonu o le fale e la te sisiva, ae ua tu faamalo ia Tepora.
“E te le o malamalama i la’u tala lea e fai atu?” o le fesili atu lea a Tepora, ua amata ona ita, “Afai ae iloa e Iosefa matou ma uso o lo’u tina, e ono afaina ai foi oe ma lou aiga.”
E ui lava i le finau atu o Tepora, ae toso atu lava lona lima e Tavita i totonu o le fale ma aga’i atu i le mea o fai mai ai le siva. Ua u’umau mai e Tavita le pui manava o Tepora mo le la siva uosi ma sa taumafai malosi lava Tepora e fiafia i le la uosi, ae ua le mafai ona o lona popole tele i le tagata lea o lo o i totonu o le fale.
Ua amata ona pulato’a mai tagata o lo o i totonu o le fale ia Tavita ma Tepora lea o lo o sisiva. Ma na lagona lelei e Tepora le taimi na iloa mai ai la’ua e le alii o Iosefa. Ma na faate’ia Tepora, ina ua ta’ita’I atu e Tavita le la paga ma tu tonu lava i luma o Iosefa.
E FAIA PEA!