Ads by Google Ads by Google

Tolopo fonotaga Polynesian Leaders Group


Lolo Moliga - Kovana, AS

- MISELA I LE PASEFIKA

 

Ua fa’ailoa e Kovana Lolo Moliga ua ia fautuaina ta’ita’i o le Polynesian Leaders Group (PLG), ua alagatatau lava ona tolopoina le fonotaga a i latou sa tatau ona talimalo ai Amerika Samoa ona o le mislea o lo’o pepesi nei.

 

Na tusia se tusi e Kovana Lolo Moliga ia Tesema 19, 2019 ma ia fa’ailoa atu ai i ta’ita’i uma ua aofia i lenei fonotaga, “Ua iloga mai e o’o lava ina fa’aauau lenei pepesi a le misela i le vaitau tonu o le fonotaga, ma ua talafeagai ai ona tolopoina le fonotaga sa tatau ona talimalo ai Amerika Samoa ia Ianuari 28 & 29, 2020. E sili pe a fa’ataunu’uina lea fonotaga ia  Aperila 14 -16, 2020.”

 

O le fa’alua ai lenei ona tolopoina lenei fonotaga ona o talosaga fa’auia atu a le Malo o Amerika Samoa, ae sa tatau lava ona faia lea fonotaga ia Iulai, 2019. Peitai na talosaga le tatou Kovana ina ia faia le fontoaga lea ia Iulai i Tuvalu, ae fesoasoani atu Amerika Samoa. O le aso lea na tuupoina mai i ai le taligamalo a Amerika Samoa, o Ianuari 2020, lea fo’i ua le gafatia.

 

Ua fa’ailoa fo’i fa’alaua’itele i lana tusi lea lona agaga fa’amaulalo ma ua fa’amalulu atu fo’i i ta’ita’i o malo uma o aofia i lenei fonotaga ona o le toe tolopoina o lenei fonotaga, ae ua leai se alofaga ona o le manumanu i le soifua lautele ina ne’i afaina i lenei vaitau ua pipisi tele le misela i atumotu o le vasa pasefika, ae o lea fo’i e aofia ai na malo i le fonotaga.

 

“E ui ina ua tolopo fa’alua lenei avanoa e Amerika Samoa, ae o lo ua i ai lona lagona maualuga, e le o fa’avaivai ai le naunau mai o i latou e usufono ina ia auai i le taligamalo a Amerika Samoa ia Aperila 14-16, 2020,” o sana toe upu lea i lana tusi na taua’aoina i malo uma o totino o le PLG.

 

Ua ia fa’amamafa i lana lea tusi, “O le pipisi ai fo’i o le Misela i atu motu o le pasefika, ua avea lea ma nisi o mataupu e ao ina taga’i toto’a i ai tatou sui usufono, aua ua iloga ona tatou pagatia ai, a’o mataupu fo’i nei e vave tele le a’afia ma lutia ai o tatou malo fa’aatumotu.”