Pago Pago - AMERIKA SAMOA

O le vaveao o le aso 29 o Aukuso, na sulufa’i atu ai se tina i le Ofisa a Leoleo e ripotia ia Melania Vaivao, ina ua masalomia i le fa’ao’olima ia te ia, i se latou Bingo na fai.

E tusa ai ma le faamatalaga a Ann Pouvale, lea na sulufai i le ofisa a leoleo, a’o la iai ma lona toalua i le Bingo, sa fa’ate’ia i la’ua ina ua savali ifo i o la luma ia Vaivao ma fesili atu pe aisea e la te tilotilo atu ia te ia (Vaivao), ona palauvale lea o le ua molia.

Sa ta’ua e Pouvale lona tali atu i le ua molia, e fa’aaoga lona mafaufau, o la e faalogologo mai tagata.

Ma na ta’ua e Pouvale, le toe savali atu o le ua molia, ma tu’i ona mata ma se’i ese mai lana filifili auro sa tautau i lona ua.  O le taimi lea na oso atu ai lona to’alua ma taofi le ua molia.

O le to’alua a Pouvale, o se leoleo ma sa mafai ona ia fa’amaonia le faamatalaga a lona toalua.

Sa iai foi ma seisi molimau na faatalanoaina i lea po, o se leoleo fo’i, ma sa ia ta’ua le savali atu o se fafine, ae o lo’o tilotilo agai ia Pouvale ma ia fesili atu ia Pouvale, po o le a.  Ae tali mai Pouvale, “E keke mai e a ou fela?”

Na ta’ua e le molimau, sa faapea a ia, ai o se taaloga a le to’alua lea o lo’o fai, ae na fa’ate’ia o ia, ina ua savali mai Vaivao ma tu’i foliga o Pouvale ma kola atu lona ofu.

O lea na oso atu ai le molimau ma fesoasoani i le to’alua a Pouvale, i le tau fa’ato’ato’a o fafine ia e toalua, faapea ma nisi sa  iai i le Bingo i le po lea. 

Sa ta’ua e le molimau le vevesi o le po, e na te lagonaina ni upu palauvale se’i vagana ai le lalau e leisi fafine o leisi.  Na toe fo’i Pouvale i lona nofoa ae na toso le ua molia, agai i tua o le fale ‘ie.

Na faatonuina foi fafine e to’alua, e le pule o le Bingo, ina ia o ese, pe afai e le mafai ona fifilemu.

Sa faapea ona tulai le to’alua a Pouvale ma fa’amaulalo atu i le ‘au Bingo, ae toe amata ona ‘e’e mai le ua molia.  Sa ta’ua e le faamasino lona faatonuina o le to’alua a Pouvale ina ia fa’afilemu o ia, ina ia aua ne’i fa’ateteleina le vevesi.

Ma na mafai ona toe fa’aauau le ta’aloga i lea afiafi.

Ina ua fa’atalanoaina e leoleo ia Vaivao sa ia ta’ua le tupu o se fa’afitauli i le va o ia ma Pouvale ma lona to’alua, ae e le’i o i le Bingo.  Ma ina ua ia toe va’ai i le ulugalii lea i le Bingo, sa le mafai ona taofiofi lona ita.

Ua molia nei Vaivao i moliaga e aofia ai;

Faitau 1:  Fa’ao’olima i lona tulaga e tolu, o se vaega ‘A’ o soligatulafono mama, lea e mafai ona fa’afalepuipui ai i le o’o atu i le tausaga, po o se sala tupe e $1,000; po o faasalaga uma e lua.

Faitau 2:  Faatupu Vevesi i Nofoaga Faitele, o se vaega ‘B’ o solitulagatulafono mama, e mafai ona nofosala ai i le falepuipui, i le o’o atu i aso e 30, po o se sala e $500; po o faasalaga uma e lua.

E $1,000 na fa’atulagaina e mafai ona tatalain ai i tua le ua molia, e faatalitali ai lona faamasinoga.