Pago Pago - AMERIKA SAMOA

Ina ua le ausia e le Maota Fono ia le fuainumera o le korama e mafai ai ona fa’ataunu’uina le Iloiloga Tu’ufa’atasi a maota e lua, mo le Tupe Faasoasoa mo le Tausaga Tupe 2025, ua faapea ai nei ona toe tolopoina mai lea iloiloga i le taeao nei.

O le taeao o le aso Lua na amata tolopoina mai ai lenei iloiloga, ina ua fiu le Maota Maualuga e faatasi sui o le Maota o Faipule e tatau ona auai atu mo lenei iloiloga tu’ufa’atasi ae peitai, sa leai nisi na auai atu.

O lea na tolopoina mai ai i le taeao ananafi, ae peitai, ina ua le toe atoa foi le korama mo lenei iloiloga, o lea ua toe tu’u mai ai mo le taeao nei.

Ona sa malaga atu i atunu’u i fafo le afioga Senatoa Utu Sila Poasa, o lea na sui tulaga ai lona sui soatau, le afioga i le Senatoa ia Magalei Logovii ma sa fa’aalia le sui taitaifono lona taofi mau i lona talitonuga, e le mafai e le malo ona ausia le tupe aoina lotoifale lea o lo’o taumateina i le $165.9 miliona, i le paketi o le tupe tausaga 2025.

Na saunoa Magalei, o lo’o faavae lona talitonuga i taimi na avea ai o ia ma Tausitupe a le malo, ma ia lapata’ia mai ai e faapea, pe a taga’i i tupe aoina o le tausaga nei, ma tausaga tupe e lua ia ua te’a atu, o le averesi o le aofaiga o tupe aoina e le malo, e $128,500 ae o le maualuga e mafai ona aoina e le malo, e pe a ma le $136 miliona.

Sa ia ta’ua foi e faapea, sa si’itia foi e le Faigamalo ia le aofaiga o tupe aoina lotoifale mo le tausaga tupe 2024, ona o tupe faaopoopo mai i le tausaga tupe 2023, semanu e le ausia le fuainumera na ta’ua i totonu o le paketi.

E le gata i lea, sa saunoa foi le afioga i le sui taitaifono, e leai ni tulafono mo tupe aoina ua pasia, e mafai ona maua ai ni alagatupe fou mo le malo.  Ma ua si’i e le faigamalo le latou paketi, ina ia tutusa ma tupe fa’aaluina, mo mea o lo’o manana’o ai, ae e ‘unrealistic’ le paketi.

O lea sa fautuaina ai e Magalei le fa’aitiitia o le paketi mo Polokalama Faapitoa, lea na silia teisi ma le $25 miliona, i lalo i le $11 miliona.  Sa ia toe saunoa ai, o lo’o manino mai le le ausia e le malo o la latou sini faatuina mo tupe aoina lotoifale, mo lenei tausaga.

Sa saunoa foi Magalei i nisi o mataupu, e pei o le le mafai e le faigamalo ona fa’amatu’u se vaegatupe mo le kolisi, o le tuai ona totogi o lafoga a tagata faapea ma le tele o pisinisi o lo’o faatalitali le totogiina o a latou tautua.

Ae peitai, sa le’i auai le afioga i le Senatoa ia Togiola T.A. Tulafono faapea le afioga i le Fofoga Fetalai ia Savali Talavou Ale, i le manatu fa’aalia a Magalei.  I so la’ua manatu fa’aalia, i le tolu tausaga ua tuana’i atu, na mafai ona sili atu tupe aoina sa mafai ona ausia e le faigamalo, nai lo le aofaiga sa taumateina, ma o le mafuaaga lea na pasia ai ni iugafono taufa’aofi, mo tupe fa’aopoopo.

Na saunoa foi Togiola, ua le mulimulita’i le Maota Fono i lona tiute aua e le o mataituina ia ripoti o le fa’aaogaina o tupe a le malo.

Sa fa’atula’i e le afioga i le Fofoga Fetalai se manatu, ina ia toe si’i se vaegatupe mo le Kolisi, talu ai molimau a le peresetene o le Kolisi i le tele o aitalafu a le ASCC.

Ae peitai, na saunoa Togiola, o le tupe fa’aagaga mo le kolisi mo le tausaga tupe fou, e silia ma le $5 miliona, ma i sona talitonuga, ua lava ma totoe lea, ae afai e toe manaomia e le kolisi nisi tupe, e mafai ona toe faaulu mai seisi a latou talosaga, i le tausaga fou.

Ina ua toe saunoa Magalei, sa ia toe faamanatu mai ia Togiola le pa’u foi o tupe aoina lotoifale, a’o avea o ia ma kovana.  Na ta’ua e Magalei, i lena taimi a’o avea Togiola ma kovana, sa ia fautuaina ai o ia ua le toe iai se tupe i totonu o le vaegatupe lautele (general fund account) ma ia talosagaina ai le fa’aitiitia o taimi faigaluega a tagata faigaluega a le malo.

Ma ua talitonu Magalei, o le mea foi lena o lo’o tupu nei.  Sa ia fesiligia pe aisea e le o maua uma ai lafoga a tagata.  Pe aisea foi ua tele faasea mai i kamupani i le le totogia o latou mo a latou tautua.  Sa saunoa Magalei, o lo’o ia malamalama i le mea o lo’o tupu ona ua leva ona ia galue i totonu o le Ofisa o tupe a le malo.

Na saunoa sa’o mai ai Magalei, ma ia faapea mai, o lea ua si’i e le Ofisa o Paketi ia le latou tupe fa’asoasoa ina ia kava ai tupe fa’aalu ale faigamalo, ae e leai se tupe e faatupeina ai.

Sa fa’aalia e le afioga i le Fofoga Fetalai lona faanoanoa tele e tusa ai ma saunoaga a Magalei ma ia fautua mai ai, ina ia aua le lafoina faamatalaga e tau ina ia faamalieina ai i latou o lo’o faafogafoga mai, ae ia manatunatu i le mea sili mo le malo.

O lea, na fa’atuina mai ai loa e Togiola ia se lafo ina ia pasia loa le paketi e pei ona fa’aulufaleina mai, ae na fesiligia e le Peresetene o le Senate, le afioga Tuaolo Manaia Fruean, le autu moni o a latou iloiloga ma le suesueina o molimau.

Na ia fautuaina ai le toe iloiloina ma le toe soalaupuleina o vaega taitasi o le paketi, ina ia mafa ona saili ai suiga e tatau ona faia.

Sa saunoa mai Togiola ina ia tu’uese le paketi mo Polokalama Faapitoa, mo le taimi nei ae pasia le paketi e pei ona talosagaina mai e le faigamalo.  I sona talitonuga, e na o le paeti mo Polokalama Faapitoa e mafai ona fa’aaoga e faia ai suiga lea o lo’o manaomia ona faia.

Sa faamamafaina e le sui Fofoga Fetalai o le Maota o Sui, le afioga i le Faipule ia Fetui Fetu, le manino mai o faamaoniga o le fa’aaoga sese ma le so’ona fa’aaoga o tupe, ma ia fautuaina ai le Maota Fono ina ia faia vave se fuafuaga.  Sa ia ta’ua foi e faapea, o le taimi lava lenei e tatau i le Fono ona fofoina tulaga faaletonu o lo’o i totonu o le paketi ma ia tu’uina mai ai ma se lapataiga, o lo’o maitau mai e le mamalu lautele, pe afai e faia se galuega a le Maota Fono.

O lea, sa faaleoina mai ai e le afioga i le Peresetene o le Senate le toe fa’aauauina o lea iloiloga i le aso Lulu.  Ma o lea taeao, sa aufaatasi uma ai afioga i Senatoa o le komiti o Paketi ma Tupe Faasoasoa, i le faia o ni suiga se tolu i le paketi mo le tausaga tupe 2025:

• Fa’aopoopo se tupe i le ‘matching fund’ a le Medicaid.
• Faaopoopo se tupe i le vaegatupe mo le umusaga o le Fale Fono fou
• Si’itaga o totogi a Kovana Faaitumalo.

Na fa’atalitali ai loa le maota maualuga, mo le taunu’u atu o sui o le Maota o Faipule mo le soalaupuleina o le paketi, ina ia mafai ona faaulufaleina ai nei suiga.

Ae peitai, na atoa le afa itula o faatalitali sui o le maota maualuga, ae e leai nisi o sui mai i le maota o Faipule na malaga atu, o lea na toe tolopo ai e le Peresetene o le Senate lenei iloiloga mo le taeao ananafi.

Ae o’o mai i le taeao ananafi, sa le’i atoa le korama faatulafonoina e mafai ai ona faataunu’uina lenei iloiloga.

O lea sa toe tolopoina mai ai le iloiloga mo le taeao nei.