Pago Pago - AMERIKA SAMOA

O le aso ananafi, Aso Lulu, Setema 4, 2024, na faamoemoe e faataunu’uina ai se iloiloga a le Komiti o le Falemai ma le Soifua Maloloina a le Maota o le Senate, ma le Faatonusili faate’a a le LBJ, le susuga ia Dr. Akapusi Ledua, faapea le COO fa’ate’a a le LBJ, o Dr. Jean Anderson.

Ae peitai ua toe tolopoina lea iloiloga, e toe faataunu’uina i le aso Gafua o le vaiaso fou.

Sa fa’ailoa atu e le Taitaifono o le Komiti a le Senate, le afioga i le Senatoa ia Tuiasina Dr. Salamo Laumoli faapea le Peresetene o le Senate, le afioga Tuaolo Manaia Fruean, i afioga i Senatoa i le aso Lua na se’i mavae atu nei, ua toe tolopoina lenei iloiloga mo seisi aso, i lalo o se fautuaga mai i le loia a le Senate, ona o nisi o mataupu e tusa ai ma le fa’ate’aina o Ledua ma Jones, e ono tu’ua’ia ai nisi o molimau, i le solia o le tulafono.

Ae peitai, ina ua mae’a ona faia le fa’aaliga a Tuiasina ma le Peresetene o le Senate, e tusa ai ma le toe ta’atia o lenei mataupu mo seisi taimi, sa fa’aleoina e le afioga i le Senatoa ia Alo Paul Stevenson, lona le malamalama i le mafua’aga tonu o le a fa’ataoto ai lenei mataupu ma ia fesiligia le mafua’aga tonu o lea faaiuga.

Sa fa’amanino mai e le afioga Tuaolo e faapea, ua fautuaina le taitaifono o le Komiti o le Soifua Maloloina, ina ia tolopoina lenei iloiloga ona o lo’o iai ni mataupu e ono tu’ua’ia ai nisi o molimau, i lo latou solia o le tulafono.

Na saunoa Tuaolo, o sona atugaluga o iai, ina ne’i o’o atu lenei mataupu i luma o le faamasinoga, ae avea tali a molimau i fesili o le a fesiligia ai i latou e le komiti, ma tulaga e ono tu’u’aia ai i latou, i se taimi mulimuli mai.

Ae na fa’amamafaina mai e le Peresetene o le Senate, afai o iai se talitonuga a i la’ua ia ua fa’ate’aina e le komiti faafoe a le falemai, e le o tonu ma sa’o le faate’aina o i la’ua, e mafai ona o faaulu se la tagi e faasaga i le komiti faafoe, ma o le a tatalaina uma mai ai lenei mataupu i luma o le faamasinoga.

Sa faamanino mai e le afioga i le Senatoa ia Togiola T. A. Tulafono e faapea, e le fa’atui’ese i le faaiuga ua faia mo le tolopoina o le iloiloga ona o le fautuaga mai i le loia a le Senate, lea ua lagolagoina e le Peresetene.

Ae peitai, sa saunoa Togiola, o lo’o iai sona popolega ona o lea sa iloiloina e le Senate ia le vaegatupe e $36 miliona lea na fa’aaoga e le Faigamalo e aunoa ma se fa’atagana mai i le Fono, ae e leai se tulaga faapea e tau fa’aeteete po o ni puipuiga ina ne’i a’afia tagata faigaluega a le malo na su’esu’eina, i tulaga o le tulafono.

Na saunoa Togiola, e o’o lava i fesili ia na fesiligia ai tagata faigaluega a le malo lea na molimau i na iloiloga, sa ono a’afia ai faatonusili ma i latou o lo’o i tofi taitai, ae na fesiligia lava e aunoa ma se fa’aeteete, ona sa autasi le Fono, e tatau ona tuliloaina lea mataupu se’ia o’o i lona iuga.

Sa fa’aalia foi e Togiola e faapea, na fa’aalia le autasi o le Fono, ina ua o latou pasia, e aunoa ma se fa’atui’ese, ia se i’ugafono lea sa talosagaina ai le Loia Sili ina ia ave se faatalosaga i le Faamasino Sili, mo le filifilia o se Loia Tutoatasi, e na te su’esu’eina tulaga, ua talitonu le Maota, o solitulafono, i taimi na faia ai le iloiloga.

Na finau Togiola, o le toe fa’ata’oto o lenei mataupu e aunoa ma le faatulagaina o se aso e faia ai se iloiloga, o lona uiga, e o’o lava ina le faia se iloiloga ma e fa’afoliga mai ai, ua ‘alo ese ia le Fono ma o latou tiute faatulafono.  Sa faamamafa e le afioga i le Senatoa, po o le a lava tulaga e tulai mai i lenei iloiloga, o la latou matafaioi, o le fofola atu lea i luma o le atunu’u ma faailoa atu iai tulaga o lo’o tutupu i totonu o le malo.

O lea, na talosagaina ai e le afioga Togiola ia le Peresetene o le Senate, ina ia toe saili se finagalo o le loia a le Senate, mo se faamalamalamaga manino i le mafuaaga o le toe tolopoina o lenei iloiloga ma ia tagataga’i i itu uma, ona o lo’o faatalitali le atunu’u ma o lo’o latou mata’i mai foi gaioiga a le Fono, o lo’o faia.

Ae i sona lava manatu fa’aalia, ua saunoa le afioga i le Senatoa mai i le itumalo a Sua, e le tatau ona taofi pe tolopoina se iloiloga e latou te iloa, o le a fa’ailoa mai ai mea moni o lo’o tutupu i totonu o le faigamalo.  I sona manatu, e tatau ona fa’ata’atia uma tulaga uma ma soalaupuleina mea e ao ona faia ma le faaiuga sa’o e tatau ona faia.

Sa fautuaina e Togiola ia le Maota ina ia aua le popole i ni tagi e ono tula’i mai e faasaga i le malo, aua o le aia tatau lea a le tagata ua fa’ate’aina pe afai ae talia e le faamasinoga a latou apili.  Sa ia faamamafa mai foi e faapea, ua noatia le Fono ma o lo latou tiute lea i le mamalu lautele, o le tuliloaina o le mea tonu.

O lea na toe fa’alauiloa mai ai e le afioga i le Peresetene o le Senate, le taofia o tauaofiaga a le Maota, ae se’i fono le Komiti o le Soifua Maloloina ina ia soalaupuleina lenei mataupu.  Na faapea foi ona a’ami ia le loia a le Maota Fono, ia Mitzie Jessop-Taase ina ia mafai ona auai i lea fonotaga.

Ae peitai, ina ua la’a amata ona saunoa Jessop-Taase e faamanino lenei mataupu, sa fa’atuina e le afioga Senatoa Magalei Logovi’i se mau ina ia tu’ua e sui o vaega fa’asalalau ma ni isi sa auai i le iloiloga, ia le maota.  Ma sa faapena ona faia.

E pe a ma le 15 minutes na faia ai le fonotaga a le Komiti o le Soifua Maloloina ma ina ua toe fa’aauauina tauaofiaga ale Maota Maualuga, na fa’alauiloa mai ai loa e le afioga Tuaolo le toe fa’atulagaina o le iloiloga a le Komiti o le Falemai ma le Soifua Maloloina, i le aso Gafua, Setema 9, 2024.

Sa faapea foi ona fa’alauiloa mai ai le iai o se molimau faaopoopo i lea iloiloga, o le susuga ia Stanley Iakopo, lea o lo’o fa’auluulu i le Ofisa o Tagata Faigaluega a le LBJ.