Ads by Google Ads by Google

Toe tatala i tua le ali’i na maua i ai fualaau fa’asaina ma pulufana

ausage@samoanews.com

Na toe tatala i tua i le taeao o le aso Gafua o le vaiaso nei se ali’i na taofia e Leoleo i le falepuipui talu mai le aso Tofi o le vaiaso na te’a nei, ona o tu’uaiga i le maua ai lea o fualaau fa’asaina ma pulufana i totonu o lana ta’avale.

 

O le taeao o le aso Gafua na tula’i ai Faamalu Vili i luma o le Fa’amasinoga Faaitumalo. Sa i ai lona igoa i luga o le lisi a le Fa’amasinoga mo tagata ua fa’atulaga a la latou mataupu e fofogaina i luma o le Fa’amasinoga.

 

Peita’i e mae’a lelei galuega a le Fa’amasinoga, e le i valaauina lava le mataupu a Vili. Ina ua fesili le afioga i le ali’i Faamasino ia Elvis P. Patea i loia a itu e lua, pe ua mae’a mataupu a i latou o lo o taofia i le toese i Tafuna, na tali le loia a le malo ia Jason Mitchell, toe tasi lava le mataupu e le i valaauina, o le mataupu lea a le susuga a Vili.

 

Na saunoa Patea e fa’apea, ua mafua ona le valaauina le mataupu a Vili, ona e le o i ai sana faila i luma o le Fa’amasinoga, e leai fo’i se tagi na faila e le malo fa’asaga ia te ia.

 

Saunoa atili Patea e fa’apea, afai la e leai se tagi e faila fa’asaga ia Vili, ua tatau ona tatala o ia e fa’asaoloto.

 

Na faamaonia e Mitchell i luma o le Fa’amasinoga, e leai se tagi tusitusia ua faila e le malo fa’asaga ia Vili.

 

O le taimi lea na tuuina mai ai loa e Patea ma le poloaiga, e tatala faasaoloto ai Vili, ina ua le mafai e le malo ona faila se tagi fa’asaga ia te ia.

 

E le o manino mai i le taimi nei poo fuafua le malo latou te faila se tagi faasaga ia Vili pe leai fo’i.

 

TU’UAIGA FA’ASAGA IA VILI

 

O le mataupu e pei ona taofia ai Vili i le toese, na alia’e mai i le taeao o le aso Tofi o le vaiaso na te’a nei, ina ua faailoa e se fafine i le Ofisa Faanofovaavaaia, o le aisa sa ia ulaina lea na mafua ai ona faamaonia le maua o le aisa i totonu o lona tino e ala i se suega sa faia, na avatu e se Tamaloa o lo o paka lana ta’avale i le vaega e paka ai ta’avale a le Fa’amasinoga.

 

O lea tamaloa e pei ona fa’ailoa e le fafine, o le susuga lea ia Faamalu Vili.

 

Ae o le fafine e pei ona taua, o ia lea o Eniseni Mosese, lea sa faia se suega i lona tino i le aso Tofi na te’a nei ma fa’amaonia ai lona tagofia o le fualaau faasaina o le aisa.

 

Na taua e le malo e fa’apea, ina ua mae’a ona lau le fa’asalaga a Mosese i luma o le Fa’amasinoga Faaitumalo i le taeao o le aso Tofi o le vaiaso na te’a nei, na faatonu ai loa o ia e le Fa’amasinoga e alu i luga o le foga fale lua o le fale faamasino e vaai le Ofisa Faanofovaavaaia.

 

O le mae’a ai ona faagasolo o pepa mo le nofovaavaaia a Mosese, na tuua ai loa e Mosese le Ofisa Faanofovaavaaia ae aga’i atu i lona fale. O ni isi o tuutuuga o le nofovaavaaia a Mosese, o le faasa lea ona ia tagofia le ‘ava malosi poo fualaau fa’asaina.

 

E le i umi ona tuua e Mosese le Ofisa Faanofovaavaaia, ae vaaia e le Ofisa ua toe aga’i atu o ia.

 

O le taimi lea, ua matua ese ai lava foliga ma uiga faaalia o Mosese, e foliga mai o se tagata o lo o i lalo o aafiaga o fualaau fa’asaina.

 

Ina ua fesiligia e se sui o le Ofisa Faanofovaavaaia ia Mosese pe aisea ua vave ai ona tutupu nei suiga i ona foliga ma ona uiga fa’aalia, na ta’utino ai loa Mosese, fa’atoa uma lava ona ula le la paipa o lo o i ai le aisa ma le tamaloa o loo paka lana ta’avale i le vaega e paka ai ta’avale a le Faamasinoga.

 

O le taimi lava lea na toe taofia ai loa i lalo o le vaavaaiga a le Ofisa Faanofovaavaaia ia Mosese ae faagasolo suesuega.

 

Na faailoa atili e Mosese i le Ofisa Faanofovaavaaia e fa’apea, ina ua savali atu e fa’atali sana pasi i luma o le Fale Faatali pasi i Fagatogo, na faafuase’i ona valaau atu le tamaloa ia te ia pe fia lele. Sa ia tali i ai, ioe, o ia e fia lele.

 

Na taua e Mosese lona toe fo’i atu ma ula loa le la paipa o lo o i ai vaega o le aisa ma le tamaloa lea i totonu o lana ta’avale. O lea tamaloa o Faamalu Vili. Na faailoa e Mosese i sui o le Ofisa Faanofovaavaaia lona vaaia o se pepa o loo i ai fualaau fa’asaina i totonu o le ta’avale a Vili.

 

O faamatalaga na tuuina atu e Mosese i sui o le Ofisa Faanofovaavaaia, na mafai ona pasi atu i le Taitai o le Ofisa Faanofovaavaaia atoa ai ma le Masela o le Fa’amasinoga, ma aga’i atu ai loa i latou e saili le vaega o loo paka ai le ta’avale a Vili.

 

O le taimi lea, ua alu ese mai le ta’avale a Vili mai le vaega e paka ai ta’avale a le Fa’amasinoga, ae ua aga’i atu i le vaega e paka ai ta’avale a le Tedi of Samoa. Sa vaaia le tulaga ese o uiga faaalia o le susuga a Vili i le taimi lea, e ala i le paka o lana ta’avale, ona oso lea i fafo ma sivasiva solo ma talo talo i tagata fegasoloa’i i luga o le alatele.

 

Na toe aga’i atu le ta’avale a Vili ma paka i luma o le maketi i Fagatogo, ae o le taimi fo’i lea ua taunu’u atu i ai ma le Masela o le Fa’amasinoga, faapea ai ma le Pule o le Ofisa Faanofovaavaaia.

 

Na taofia faapagota e i latou nei le susuga a Vili mai totonu o lana ta’avale ae saili totonu o le ta’avale mo ni fualaau fa’asaina ma ni aupega.

 

I lalo o le nofova o le ave ta’avale, na maua i ai se taga pepa iila feololo o lo o tumu i lau mamago o le mariuana, faapea ai ma ni pulu fana. Sa maua fo’i isi pulu fana i totonu o le ta’avale o loo salalau solo ai.

 

A o loka lima o Vili, sa vaaia lona taumafai e tago i le taga pito i tua o lona ofu o lo o fai. Na saili le taga o lona ofu maua i ai se tama’i taga pepa iila o lo o i ai vaega o le pauta faasaina o le aisa.

 

O le taimi lava lea na logoina ai loa Leoleo ma tu’u aloaia atu ai e le Masela o le Fa’amasinoga le mataupu a Vili latou te tauaveina, atoa ai ma fualaau fa’asaina ma pulufana sa maua ia te ia, sa tauaao uma atu i Leoleo mo a latou suesuega.

 

Ae mo le mataupu a le tina o Mosese, o le taeao ananafi lea na toe tula’i ai o ia mo le tuuina atu o le faaiuga a le Fa’amasinoga, e mafua mai i lona le usitaia lea o tuutuuga o lana nofovaavaaia, ma ua poloaina o ia na te tuliina aso e 9 i totonu o le toese.