Pago Pago - AMERIKA SAMOA

I le mae’a ai nei o palotaga a le atunu’u, ua toe manumalo ai nei le afioga Uifa’atali Aumua Amata, i le tofi i le Laumua i Uasigitone.

E to’afa sui tauva sa tausinio mo le tofi i Uasigitone, na aofia ai le afioga Uifaatali, faapea ma Luisa Kuaea, Meleage Chapman ma Fualaau Lancaster.  Atonu o le ulua’i tausaga palota lenei, ua tausinio ai ni sui tauva tamaitai e to’afa.  Ma o le ulua’i tausaga palota lenei mo Kuaea.

E to’atolu sui tauva mo le tofi Kovana ma le Lutena Kovana, na tausinio i le palotaga o lenei tausaga, o lo’o aofia ai le afioga i le Kovana Lemanu P.S. Mauga ma le afioga i le Lutena Kovana, le tofa Laapui Talauega E.V Ale; faapea le paga a Pulaalii Nikolao Pula ma Pulu Ae Ae Jr., faapea ma Vaitautolu Talia Faafetai ma Maefau Dr. Mary Taufete’e.

I fa’ai’uga le aloaia mai i fa’asalalauga a le KVZK-TV i le po o le aso Lua, sa fai sina tuai mai o fa’ai’uga mai i afioaga o Pago Pago, Nu’uuli ma Tafuna, ae o motu o Swains ma Manu’a, na muamua taunu’u.

I Manu’a, sa sili ai fuainumera a Vaitautolu ma Taufete’e, soso’o atu ai Lemanu ma Laapui ae mulimuli Pula ma Pulu.

O le fa’aopoopoga po o le pili mo le ‘veto override’ sa faapea ona manumalo ai le ‘Leai’ i Manu’a.

Ae mo tofi i Uasigitone, na silia ai palota mo Amata, soso’o ai ma Kuaea ona soso’o mai ai lea o Chapman ma Lancaster.

I Tutuila nei, sa silia ai palota a Amata i itumalo uma, se’ia vagana ai Swains, lea sa na’o le 3 ana palota na maua mai ai, ae 5 mo Kuaea, 1 mo Lancaster ae 0 mo Chapman.

Na palota foi Swains i le “Ioe’ e tusa ai ma le ‘veto override’, 4-2.

E lata i le tulua o po ma ao i le po o le aso Lua, Novema 5, ua toe 4 itumalo sa faatalitali iai le Ofisa Palota mo le aofaiga o a latou palota, ae o le taimi lea ua molimauina le sili teisi i luma o Pula ma Pulu, ia Lemanu ma Laapui, faapea ia Vaitautolu ma Taufete’e.  Ae o le taimi lea, o lo’o fa’atalitali ai mo le faitauga mai i afioaga tetele e pei o Pago Pago, Nu’uuli ma Tafuna.

Ina ua taunu’u le aofaiga o palota mai i ia afioaga, na va’aia le agai i luga o fuainumera a Pula ma Pulu, i le 1032 mai i le itumalo o le Tualauta, ae e na’o le 682 mo Lemanu ma Laapui.  Ae o le afioaga o Pago Pago, na maua mai ai palota e 472 mo Pula ma Pulu, ae 200 Lemanu ma La’apui.  Mo le itumalo a Ituau, e 427 palota mo Lemanu ma Laapui, ae 379 mo Pula ma Pulu.

Ma ina ua tapunia palotaga i le po o le aso Lua, Novema 5, ma fa’asalalauina ai e le KVZK-TV ia aofaiga le aloaia, e $4284 (42.4%) sa maua e Pula ma Pulu, 3660 (36.2%) mo Lemanu ma Laapui, ae 2169 (21.4%) mo Vaitautolu ma Taufete’e.

Ae e tusa ai ma tulaga o le tulafono, afai e le au palota a sui tauva uma i le 51%, e tatau loa ona faataunu’uina ia se palota ‘run-off’, ma e pei ona sa fa’alauiloa mai e le Komesina o le Ofisa Palota, le afioga Uiagalelei Lealofi Uiagalelei, o le a fa’ataunu’uina le ‘run-off’ i le aso 19 o Novema, i le va o sui tauva e lua, pito maualuga a la palota.  O lona uiga, o le a ‘run-off’ o le a faia i le va o le paga a Lemanu ma Laapui, faapea ma le paga a Pula ma Pulu.