Ads by Google Ads by Google

TOE FAAAUAU LE ILOILOGA A LE ALII PAGOTA O SIERRA ISAIA


[ata: foa'i]
ausage@samoanews.com

Pago Pago, AMERIKA SAMOA

 

Ua toe tolopo le iloiloga faapitoa a le alii pagota o Sierra Isaia lea na fuafua e faia i luma o le afioga i le ali’i Fa’amasino Sili ia Michael Kruse i le vaiaso na te’a nei, ina ua le maua atu e le itu a le malo a latou molimau ua fuafua e valaauina mo lenei mataupu.

 

Ina ua le maua atu e le malo a latou molimau, na faia ai loa le poloaiga a le Faamasino Sili e toe tolopo le iloiloga mo le isi 2 vaiaso, ina ia lava ai le taimi o le malo e saili mai ai ana molimau mo lenei mataupu.

 

Na faailoa e le loia a le malo i le Fa’amasinoga e faapea, e i ai isi molimau sa latou fesiligia e uiga i le mataupu e faatatau ia Isaia, peita’i sa latou tali mai, latou te le iloa ni faamatalaga e faatatau i lea mataupu. O isi pagota ma Leoleo na latou faailoa i le malo, latou te le iloa poo ai tonu le Leoleo na ia faia le faaiuga e teena ai sui e to’alua o le Ofisa Faanofovaavaaia na aga’i atu e faia se suega faasaga ia Isaia poo ia tagofia fualaau faasaina i le masina o Mati o le tausaga nei.

 

Na faailoa e Kruse i le loia a le malo, o ai uma lava i latou na tali ane latou te le iloa pe le manatua fo’i le Leoleo na faia le faatonuga, ia faatonuina uma i latou ia e oo atu i luma o le Fa’amasinoga ma faaleo atu a latou tali e uiga i lenei mataupu.

 

“E le taitai malolo le Fa’amasinoga sei vagana ua taunuu i le pogai o lenei mataupu ma iloa tonu ai loa le tagata na ia faia lenei gaioiga,” o le saunoaga lea a le Faamasino Sili.

 

Sa ia taua atili e faapea, e le o mautinoa e le Fa’amasinoga i le taimi nei poo ai tonu o lo o pulea le Toese i Tafuna, poo le malo poo pagota fo’i.

 

O le mataupu faasaga ia Isaia na tofu atu i le Fa’amasinoga i le masina o Me o le tausaga nei, ina ua faila e le Ofisa Faanofovaavaaia sa latou talosaga e faaleaoga ai le nofovaavaaia a Isaia, e mafua mai i lona musu e faia e sui o le Ofisa Nofovaavaaia le suega ia te ia e iloa ai poo ia tagofia fualaau fa’asaina i le aso 4 o Mati 2020.

 

O le ulua’i iloiloga lava o lenei mataupu, na valaau ai e le Faamasinoga se tasi o sui o le Ofisa Nofovaavaaia i luga o le nofoa molimau, ma ia faamatalaina ai le faafitauli na tula’i mai i le 4 o Mati na alu atu le la asiasiga i le Toese i Tafuna.

 

O sui e to’alua o le Ofisa Nofovaavaia na aga’i atu i le Toese mo le faia o suega i pagota o loo taofia ai, e aofia ai ma Isaia, o le susuga lea ia Tafito Aitaoto ma Saipale Vaouli. O le susuga a Vaouli na tula’i i luga o le nofoa molimau ma ia faailoa i le Fa’amasinoga le mea tonu sa tula’i mai i le aso 4 o Mati.

 

Na taua e Vaouli i lana molimau e faapea, na faia uma siaki mo isi pagota na aofia i le la lisi, ina ia faia suega i o latou tino ina ia faamaonia ai latou te le o tagofia fualaau fa’asaina, ina ia tusa ai ma tuutuuga o a latou nofovaavaaia, sei vagana ai Isaia e le i mafai ona faia lana siaki i le aso lea, ona sa oso gugu i ona vae ma le mafai ai ona savali, e pei ona faailoa ane e se alii pagota i le Toese. O lea alii pagota e suafa ia Li’a Mila.

 

Na taua atili fo’i e Vaouli i lana molimau le i ai o se alii pagota sa ia polokaina le faitoto’a e ulufale atu ai i le vaega o loo i ai le sela a Isaia, o ia lea Gabriel Tinai.

 

O le iloiloga lona lua o lenei mataupu i le masina o Iulai na te’a nei, na valaau ai e le malo le alii Leoleo ia Mila ma le alii pagota o Tina i luga o le nofoa molimau. Na taua e le ali’i Leoleo o Mila, e le o ia lea na taofia sui e to’alua o le Ofisa Faanofovaavaaia mai le faia o le suega ia Isaia, ae o se alii Leoleo o le Toese sa tiute i le aso lea na ia taofia sui o le Ofisa Nofovaavaaia mai le faia o le suega ia Isaia.

 

Pau le itu e le i mafai e Mila ona faailoa i le Fa’amasinoga, o le suafa o le alii Leoleo o loo masalomia na ia taofia sui o le Ofisa Nofovaavaaia mai le faia o le suega ia Isaia.

 

E 2 vaiaso lea ua tolopo i ai lenei iloiloga ma le faamoemoe e tatau ona oo atu i ai ua tapena le malo e faailoa isi a latou molimau.

 

TALAESE FINAU

 

O le ave ta’avale o le pikiapu lanu mumu lea na taofi e Leoleo i luma o le malae va’alele i Tafuna ina ua le usita’i i faailoilo o le alatele, ua molia nei o ia i lona umia faasolitulafono o vaega o le pauta faasaina o le aisa faapea ai ma lau mamago o le mariuana.

 

O le 2 vaiaso talu ai ona tula’i ai le susuga a Talaese Finau i luma o le Fa’amasinoga Faaitumalo.

 

Ua molia o ia e le malo i le moliaga o le umia faasolitulafono o vaega o le pauta faasaina o le aisa, faapea ai ma le moliaga e tasi o le umia faasolitulafono o vaega o le laau faasaina o le mariuana, o vaega ia o solitulafono mamafa, lea e mafai ona fa’asala ai se tasii le Toese mai le 5 e oo atu i le 10 tausaga, pe faasala foi i le salatupe e oo atu i le $20,000.

 

E $10,000 lea ua faatulaga e tatala ai i tua le ua molia. 

 

TAGI A LE MALO

 

O le aso 23 o Iulai pe tusa o le 4:21 i le afiafi, na vaaia ai e ni Leoleo se to’alua sa tiute i luma tonu lava o le malae vaalele i Tafuna se piki apu lanu mumu o masau mai le auala mai Iliili ma faasasa’o loa i le auala o loo aga’i atu i totonu o le malae va’alele e aunoa ma le tu i se tasi o fa’ailoilo o le alatele.

 

Na toe ta’amilo mai le ta’avale lanu mumu lea na taofi ai loa e Leoleo i se vaega e latalata i le Faleaoga a le Aoga Maualuga a Tafuna. Na fesiligia le ave ta’avale ma iloa ai, o ia o Talaese Finau, o se ali’i e 43 tausaga le matua mai Tafeta. E leai se laisene ave ta’avale a Finau sa i ai i le taimi lea, se’i vagana ai lona ID mai le Ofisa o Femalagaaiga na faamaonia ai o ia.

 

A o faailoa e Leoleo ia Finau le mafua’aga ua taofi ai lana ta’avale, sa vaaia e Leoleo foliga fefe o lenei ali’i atoa ai ma lona minoi solo. Na fesili Leoleo ia Finau pe i ai se mea o faaletonu ae na tali le ua molia, “ua lagona lo’u fefe ina ua lua taofia la’u ta’avale”.

 

Ina ua fesiligia e Leoleo le ave ta’avale i le mafua’aga o lona fefe ae na tali le ua molia, o loo i ai ni fualaau faasaina i totonu o le ta’avale, ae le o ia e ana ia fualaau fa’asaina. Na saili e Leoleo le ta’avale ma maua ai se tamai container pa’epa’e i lalo o le nofoa o lo o nofo ai Finau. 

 

I totonu o le container paepae sa maua ai paipa e 2 o loo tumu ai vaega o le pauta pa’epa’e, faapea ai se tama’i pepa iila o loo i ai lau mamago o le mariuana.

 

Ina ua fesiligia Finau e tusa ai o fualaau faasaina sa maua i totonu o le ta’avale, na ia taua ai i Leoleo, na te lei iloaina o loo i ai ni fualaau faasaina i totonu o le ta’avale i le taimi na ia fa’aaogaina ai le ta’avale, ae ina ua uma ona fai lana fa’atau i se faleoloa i Iliili ae lumana’i ai loa le taofia o ia e Leoleo, na ia vaaia ai se container pa’epa’e i le nofoa pito i tua o le ta’avale.

 

Na ia tatala le container ma ia maua ai fualaau fa’asaina i totonu, o lea na ia tago ai loa ma nana le container i lalo o le nofoa sa nofo ai.

 

Na fesili Leoleo ia Finau poo ai e ana le ta’avale, na tali le ua molia, o le ta’avale a le to’alua a lona aunty o loo ia fa’aaogaina. Na saili e Leoleo faamaumauga ma le pepa lesitala o le ta’avale ma faamaonia ai, o le ta’avale o loo lesitala i lalo o le igoa o Talaese Finau.